Balilambwilwe pa Kwenda aba Kaele

YEHOVA alapaala no kulambula ababomfi bakwe aba citetekelo. Pambi kuti balolela pa nshita imo ukumona ukufishiwapo kwa mifwaile ya kwa Lesa, lelo fintu kuba ukucankwa lintu ipaalo lyakwe lyakumanishiwa!

Ici calangililwe bwino mupepi ne myaka amakana yabili iyapitapo mu mulandu wa kwa shimapepo wa ciYuda Sekaria no mukashi wakwe, Elisabete, bonse babili aba lupwa lwa kwa Aarone. Lesa aali nalaya ukupaala abena Israele ukukwate ntuntuko nga ca kuti bamubombeele mu citetekelo. Asosele ukuti abana baba cilambu. (Ubwina Lebi 26:9; Ilumbo 127:3) Nangu cibe fyo, Sekaria na Elisabete tabakwete mwana kabili baali abapilulule nshiku.—Luka 1:1-7.

Amalembo yatila Sekaria na Elisabete “bali abalungama bonse babili ku menso ya kwa Lesa, baleenda aba kaele mu mafunde yonse ne fipope fyonse fya kwa Lesa.” (Luka 1:6) Balitemenwe Lesa nga nshi ica kuti tacali cisendo kuli bene ukukonkelela inshila yalungama no kubaka amafunde yakwe.—1 Yohane 5:3.

Amapaalo Yashaenekelwe

Natubwelele ku kupwa kwa shinde nelyo mu kubangilila kwa lusuba lwa mwaka wa 3 B.C.E. Herode Mukalamba aleteka nge mfumu mu Yudea. Kasuba kamo, shimapepo Sekaria aingila Umwashila mwe tempele mu Yerusalemu. Ilintu abantu balongene mu kupepa ku nse ye tempele, aleoce cifutumwino pa lufuba lwa golde. Nakalimo icalangulwikwe nga umo uwa milimo yacindamisha iya cila kasuba, ici cicitwa pa numa ilambo libe nalipeelwa. Shimapepo afwile pambi akwete ili shuko umuku umo fye mu nshita ya bumi bwakwe.

Sekaria amone cipapwa. Iye, malaika wa kwa Yehova eminine ku lubali lwa ku kulyo ku lufuba lwa kocelapo ifyanunke cisuma! Uyu shimapepo mukoloci aba uwacushiwa kabili uwa mwenso. Lelo malaika atila: “Witiina Sekaria, pantu ukupaapaata kobe nakuumfwika; umukashi obe Elisabete akakufyalilo mwana mwaume, na iwe ukamwinike shina lyakwe Yohane.” Ee, Yehova naumfwa amapepo ya mukoosha aya kwa Elisabete na Sekaria.—Luka 1:8-13.

Malaika alundapo ukuti: “Kuli iwe kukabo kusekelela no kwanga; na ’bengi bakasekelelo kufyalwa kwakwe: pantu akabo mukalamba ku cinso ca kwa Shikulu, takanwe umwangashi nangu ica kukola, akesulamo no Mupashi wa mushilo ukufuma na mu nda muli nyina.” Yohane ali no kuba umuNasiri uwa bumi bonse uwaisulamo umupashi wa mushilo uwa kwa Lesa. Malaika atwalilila ukuti: “Abengi ba mu bana ba kwa Israele akabapilibwila kuli Shikulu Lesa wabo. Kabili wene akatangilila mu mupashi na ’maka ifya kwa Eliya ku kupilibwile mitima ya bashibo ku bana, no kupilibwila bacintomfwa ku kushilimuka kwa balungama; ku kupekanishisha Shikulu abantu abateyanishiwa.”—Luka 1:14-17.

Sekaria aipusha ati: “Bushe ni ku cinshi nkeshibile ci? Pantu ine ndi mukote, no mukashi wandi na o untu apilulule nshiku.” Malaika ayasuka ati: “Ni ’ne Gabriele, uwiminina ku cinso ca kwa Lesa; kabili natuminwe ku kulanda kuli iwe, no kubile fisuma ifi kuli iwe. Kabili mona, ulebo watalala, uwafilwo kulanda, bukasuke abwiso bushiku ilyo fikapone fi fintu, pantu tautetekele ifyebo fyandi, ifyo fikafishiwapo mu nshita ya fiko.” Lintu Sekaria afuma mwi tempele, te kuti alande, kabili abantu bailuka ukuti namona icimonwa cacila pa buntunse. Ico engacita fye kucite fishibilo, ukubomfyo mubili ku kulangisha amatontonkanyo yakwe. Lintu umulimo wakwe uwa cintubwingi wapwa, abwelela ku mwakwe.—Luka 1:18-23.

Ica Kulengo Kusekelela

Ukulingana no bulayo, Elisabete mu kwangufyanya akwata umulandu wa kwangila. Aimita, ukufumyapo kuseebana kwa buumba. Umuntu wakwe Maria nao aba uwasekelela, pantu malaika umo wine, Gabriele, amwebo kuti: “Mona, ukemite fumo, no kufyalo mwana mwaume, ne shina lyakwe ukamwinike Yesu. Wene akabo mukalamba, no kwitwa Umwana wa Wapulamo, kabili Shikulu Lesa akamupeele cipuna ca bufumu ica kwa Dabidi wishi.” Maria ali uwaitemenwa ukubomba ulubali lwa “musha wa kwa Shikulu.”—Luka 1:24-38.

Maria akwankwanya ukuya ku mushi wa kwa Sekaria na Elisabete mu musumba wa mu calo ca mpili ica Yudea. Pa kumfwa ukuposha kwa kwa Maria, akana mwi fumo lya kwa Elisabete kaciluka. Pe samba lya kusonga kwa mupashi wa mushilo uwa kwa Lesa, Elisabete abilikisha ne shiwi likalamba ati: “We wapaalwa ni ’we mu banakashi, kabili bwapaalwa ubufyashi bwa mwi fumo lyobe. Kabili cinshi napeelelwa ici, ica kuti nyina wa kwa Shikulu ese kuli ine? Pantu mona, ishiwi lya kuposha kobe ilyo liingile fye mu matwi yandi, na ’kana ka mwi fumo lyandi katinine ku kwanga. Kabili alishuka uwatetekela; pa kuti kukabo kufishiwapo ku fyo alandilwe ukufuma kuli Lesa.” Maria ayankulako mu kuba no buseko bukalamba. Ukwikala kwakwe na Elisabete kwasenda imyeshi itatu.—Luka 1:39-56.

Yohane Afyalwa

Mu nshita yalinga umwana mwaume afyalwa kuli Elisabete na Sekaria abakalamba. Pa bushiku bwalenga cinekonsekonse, akana kasembululwa. Abantu babo balefwaya ukwinika uyu mwana mwaume Sekaria, lelo Elisabete asosa ati: “Iyo, kuti ainikwa Yohane.” Bushe umulume wakwe uyo na nomba uushilanda asumina? Pa ca kulembapo alemba ati: “Ishina lyakwe ni Yohane.” Mu kupumikisha, ululimi lwa kwa Sekaria lwakakulwa, kabili atendeka ukulanda, ukutasha Yehova.—Luka 1:57-66.

Ukwisulamo umupashi wa mushilo, shimapepo uuli no kusekelela asesema. Alanda kwati Kalubula walailwe—‘ulusengo lwe pusukilo mu ŋanda ya kwa Davidi’—kale kale alimikwa mu kumfwana ne cipingo ca kwa Abrahamu pa lwa Lubuto lwe paalo lya ku nko shonse. (Ukutendeka 22:15-18) Pamo ngo wa kutangilila Mesia, umwana wine wa kwa Sekaria uwafyelwe mu cipesha mano ‘akatangilila pa ntanshi ya kwa Yehova ku kupeela abantu ukwishiba pa lwe pusukilo.’ Ilyo imyaka yalepita, Yohane alekula no kukosa mu mupashi.—Luka 1:67-80.

Balambwilwe mu Kufumba

Sekaria na Elisabete baali fya kumwenapo fishaiwamina ifya citetekelo no kutekanya. Batwalilile ukubombela Yehova mu citetekelo nangu ca kuti baali no kulolela pali Lesa, kabili amapaalo yabo ayakulisha yaishile lintu fye baali abatantalila mu myaka.

Nalyo line, we mapaalo Elisabete na Sekaria baipakishe! Pe samba lya kusonga kwa mupashi wa kwa Lesa, bonse bene baliseseme. Balikwete ishuko lya kuba abafyashi na bakasambilisha ba wa kutangilila Mesia, Yohane Kabatisha. Mu kulundapo, Lesa abamwene nga balungami. Mu kupalako, abo ilelo abakonkelela inshila ya bukapepa kuti bakwata ukwiminina kwalungama na Lesa kabili bakapokelela ifilambu fyapaalwa ifingi pa kwenda aba kaele mu mafunde ya kwa Yehova.