Ifipusho Ukufuma Ku Babelenga
Bushe kuti caba icalinga ukusumina ukulaswa inshindano ya kucingilila amalwele nelyo inshindano ya fya cipatala imbi iikwetemo “albumin” iyafumishiwa ku mulopa wa buntunse?
Ukwabula ukulamba, Umwina Kristu umo umo afwile ukupingula pali ci pa lwakwe.
Ababomfi ba kwa Lesa mu kulungama bafwaya ukumfwila ikambisho lisangwa pa Imilimo 15:28, 29, ukutalukako ku mulopa. Mu kumfwana ne lyo ikambisho, Abena Kristu te kuti balye inama yabulo kucinja nelyo ifya kulya fimo nga soseji wa mulopa. Lelo ifunde lya kwa Lesa na kabili lilabomba na mu milandu ya fya cipatala. Inte sha kwa Yehova balasenda akapepala kasainwa akalondolola ukuti balakaana ‘ukukuushishamo mulopa, uwakumanina, insandesande shakashika, insandesande shabuuta, insandesande sha kucilikila, nelyo plasma ya mulopa.’ Ni shani, nangu ni fyo, pa lwa nshindano sha serum ishakwatamo icipimo cacepesha ica maproteini ya mulopa?
Inte shaliluka kale fye ukuti uyu waba mulandu wa kupingulapo kwa pa lwabo mu kumfwana na kampingu wa umo umo uwakanshiwa na Baibolo. Ici calilondolwelwe mu cipande ca “Ifipusho Ukufuma ku Babelenga” ica mu Ulupungu lwa kwa Kalinda ulwa June 1, 1990, icalandile pa nshindano sha serum isho shiŋanga pambi engatubulula nga ca kuti umo nasansalikwa ku malwele yamo. Ifyasanshiwamo ifikalamba ifya isho nshindano tafyaba ni plasma ya mulopa epela lelo ifya kulwisha amalwele ukufuma kuli plasma ya mulopa iya abo abalundulula amaka ya kucincintila amalwele. Abena Kristu bamo abayumfwa ifyo muli kampingu musuma kuti basumina ukulaswa inshindano sha musango yo balimona ukuti ifya kulwisha amalwele ukufuma mu mulopa wa mwanakashi ali pa bukulu filaya mu mulopa wa mwana mwi fumo. Icipande “Ifipusho Ukufuma ku Babelenga” calilumbulwile ici, capamo ne cishinka ca kuti albumin imo ilapita ukufuma ku mwanakashi ali pa bukulu ukuya ku kanya.
Abengi basanga ici icawamina ukumona, apantu imiti ya kucilikila imo iyo iishipekanishiwa ku mulopa kuti yakwatamo akacipimo kanono nga nshi aka plasma albumin iyo yabomfiwe nelyo ukulundwako ku kushikatalika ifisanshiwemo mu kupekanya. Pali ndakai icipimo cinono ica albumin na kabili cilabomfiwa mu nshindano isha mahormoni ya EPO (erythropoietin). Inte shimo shalisumina ukulaswa inshindano sha EPO pantu kuti shafushako insandesande shakashika na muli fyo kuti fyacilikila shiŋanga wa fya cipatala ukuyumfwa kwa kuti ukukuushishamo mulopa pambi kulekabilwa.
Imibombele ya fya cipatala imbi nakalimo kuti yaisa mu kubomfiwa mu nshita ya ku ntanshi iyo ingabimbamo akacipimo kacepesha nga nshi mu kulinganyako aka albumin, apantu utwampani twa miti ya mu cipatala tulalundulula imiti ipya nelyo ukwalula inshila sha kupangilamo iilipo. Abena Kristu muli fyo kuti pambi bafwaya ukulanguluka nampo nga albumin yaba lubali lwa muti wa kucingilila amalwele nelyo inshindano imbi iyo dokota engatasha. Nga ca kuti baletwishika nelyo nabakwata umulandu wa kusuminina ukuti albumin e mo ili, kuti baipusha shiŋanga wabo uwa fya cipatala.
Nga fintu cilandilwepo, Inte shingi tashakaana ukulaswa inshindano iyo yakwatamo akacipimo kanono aka albumin. Nalyo line, uuli onse uulefwaya ukusambilila uyu mulandu umupwilapo pa ntanshi ya kucito kupingulapo kwa pa lwakwe alingile ukupituluka mu fyebo fyapeelwe mu cipande “Ifipusho Ukufuma ku Babelenga” ica mu Ulupungu lwa kwa Kalinda ulwa June 1, 1990.