Ukucula kwa Buntunse—Bushe Kukatala Akupwa?
UKUMONEKA kwa makankamike pa numa ya kupuulika kwe bomba pa mushiika wafulishapo abantu uwa mu Sarajevo; ukwipayaulula no kulemanika mu Rwanda; abana bali ne nsala abalelilila ifya kulya mu Somalia; indupwa shapelenganishiwa ishilependa fintu balufishe pa numa ya cinkukuma mu Los Angeles; ifinakabupalu fyabulo kwafwiwa ifya mu Bangladesh wapumpuntwa no kubunda. Cila bushiku tulalolenkana no kumoneka kwa musango yo ukwa kucula kwa buntunse pa TV nelyo muli bamagazini ne nyunshipepala.
Ica kufumamo ca bulanda ica kucula kwa buntunse ca kuti kulenga abantu bamo ukulufya icitetekelo muli Lesa. “Ukubako kwa bubifi lyonse kwalipayanya icipindami cabipisha ku citetekelo,” e kulingana no kulandapo kwasabankanishiwe ne bumba lya ciYuda mu United States. Bakalemba balelosha ku mfwa mu nkambi sha kucushiwilwamo isha ciNazi ukupala Auschwitz no kufuma ku mabomba pamo nga lilya lyapuulike pa Hiroshima. “Icipusho ca mulandu Lesa wa bulungi kabili uwa maka engasuminishisha ukulofiwa kwa bumi bwa kaele ubwafulishe fyo cilacululusha kampingu wa muntu wa butotelo no kupelenganya ukwelenganya,” e fyasosa bakalemba.
Ku ca bulanda, ukukonkana kwatwalilila ukwa malipoti ya bulanda kuti kwakwata ica kufumamo ca kukunkumya inkuntu sha buntunse. Cikulu fye ifibusa na balupwa tababimbilwemo, abengi tabaseshiwa pa lwa kucula kwa bambi.
Nalyo line, icishinka ca kuti tulomfwa icililishi, nangu fye ni ku batemwikwa besu bene, cilingile ukutwebako icintu cimo pa lwa kwa Kalenga wesu. Baibolo isoso kuti umuntu abumbilwe mu “cata ca kwa Lesa” kabili “umwabele cipasho [cakwe].” (Ukutendeka 1:26, 27) Ici tacipilibula ukuti abantunse baba nga Lesa mu mimonekele. Iyo, apantu Yesu Kristu alondolwele ukuti “Lesa Mupashi,” kabili “umupashi tawakwata munofu na ’mafupa.” (Yohane 4:24; Luka 24:39) Ukulengwa mu cipasho ca kwa Lesa kulosha ku maka yesu aya kulangisha imibele yapala ku ya kwa Lesa. E ico, apantu abantunse batuntulu balomfwila abacula icililishi, tufwile ukusondwelela ukuti Kabumba wa muntu, Yehova Lesa, aliba uwa cililishi no kuti alambukilwako nga nshi pa lwa kucula kwa fibumbwa fyakwe ifya buntunse.—Linganyako Luka 11:13.
Inshila imo umo Lesa alangilamo icililishi cakwe ni pa kupayanishisha umutundu wa muntu ubulondoloshi bwalembwa ubwa calenga ukucula. Alicita ici mu Cebo cakwe, Baibolo. Baibolo mu kumfwika ilanga ukuti Lesa abumbile umuntu ukuipakisha ubumi, te kucula. (Ukutendeka 2:7-9) Na kabili isokolola ukuti abantunse ba ntanshi bailetele ukucula abene pa kukaana imitekele ya kwa Lesa iyalungama.—Amalango 32:4, 5; Abena Roma 5:12.
Te mulandu ne ci, Lesa acili alomfwila abantunse bacula icililishi. Ici calangwa mu kumfwika mu bulayo bwakwe ku kuleta ku mpela ukucula kwa buntunse. “Moneni, ubwikalo bwa kwa Lesa buli pamo na ’bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:3, 4; mona na kabili Esaya 25:8; 65:17-25; Abena Roma 8:19-21.
Aya amalayo ya kusungusha yashinina ukuti Lesa aliba uwaibukila nga nshi pa lwa kucula kwa buntunse no kuti aliba uwapampamina pa kuleta kwene ku mpela. Lelo cinshi mu kulungatika calengele ukucula kwa buntunse mu kubalilapo fye, kabili mulandu nshi Lesa akusuminishisha ukutwalilila ukufika ku kasuba kesu?
[Abatusuminishe Ukubomfya Icikope pe bula 2]
Pa nkupo na pe bula 32: Alexandra Boulat/Sipa Press
[Abatusuminishe Ukubomfya Icikope pe bula 3]
Kevin Frayer/Sipa Press