Sunga Bumpomfu no Kuba uwa Mweo!
“TUKENI Lesa, no kufwa.” Inkupo ya uno magazini ilelangisha muka Yobo, uwamusanshile mu kuba na yo mashiwi. Ico cali mupepi ne myaka 3,600 iyapitapo. Nalyo line uyo musaalula ku mubomfi wa busumino uwa kwa Lesa webekesha ifikansa ifyo filolenkana no mutundu wa muntu ukufika kuli kano kasuba. Yobo wa busumino alilufishe ifintu ifingi—ifitekwa fyakwe, iŋanda yakwe, abana bakwe ikumi. Nomba umubili wakwe walelungulushiwa ku bulwele bwa mutatakuya, ukumwesha ukufika ku mwisulo. Mulandu nshi? Umulwani mukalamba uwa kwa Lesa no muntu, Satana Ciwa, alesupila ukusonsomba kwa kuti umuntu te kuti asungilile bumpomfu kuli Lesa pe samba lya kwesha kwatapata.—Yobo 1:11, 12; 2:4, 5, 9, 10.
Ilelo, nga fintu fye cali mu kasuba ka kwa Yobo, “pano isonde ponse palaala mu maka ya Mubifi,” Satana Ciwa. (1 Yohane 5:19) Mu cituntulu, nga ni lelo ico nacicilanapo ukuba ica cine, pantu nomba ‘uwitwa [Ciwa, NW] kabili Satana, uulufya bonse abaikala mu calo conse,’ alipooswa ukufuma mu myulu ukwisa kuli lino isonde. (Ukusokolola 12:9) Uyu e mulandu kwabela utulanda twafulisha uto tupama umutundu wa muntu mu nshita yesu. Inkondo ya calo iya kubalilapo, iyapuukile mu 1914, yaishibishe “icitendekelo ca kushikitika kwa kupaapa” uko kwatwalilila ukushikilako muli uno mwanda wa myaka uwalenga 20.—Mateo 24:7, 8.
Muli cino calo cakaluka, icabotelela, bushe ulayumfwa ukuti walifika apapela ukushipikisha kwa buntunse? Bushe ulatwishika auti, ‘Bushe ubumi bwalikwate mifwaile?’ Yobo napamo e fyo ayumfwile, lelo tatalile alufye citetekelo muli Lesa, nangula ca kuti alipangile ifilubo. Alumbulwile umupampamina wakwe muli aya mashiwi: “Nsuke ndeke umweo te kuti ndeke bumpomfu bwandi.” Alicetekele ukuti Lesa aali no ‘kwishiba bumpomfu bwakwe.’—Yobo 27:5; 31:6.
Yesu Kristu, Umwana wine uwa kwa Lesa, na o aali no kushipikisha ifya kwesha ilintu aali pano pe sonde. Satana alisanshile Yesu mu nshila shalekanalekana. Ashukile ukukabila kwa ku mubili ukwa kwa Yesu no kwesha ukushintilila Kwakwe pa Cebo ca kwa Lesa, nga fintu cali pa lupili lwa kweseshapo. (Mateo 4:1-11) Alulunkenye Yesu pa kulenga bakalemba ba busangu na baFarise na bo balufishe ukumupakasa, ukumupeela umulandu wa kuponta, no kuumana akapi ku kumwipaya. (Luka 5:21; Yohane 5:16-18; 10:36-39; 11:57) Bacitile icabipisha kuli Yesu ukucila na fintu bakasansamusha ba bufi batatu bacitile kuli Yobo.—Yobo 16:2; 19:1, 2.
Mwi bala lya Getsemane, ilyo Yesu alepalamina ku kalume ka kweshiwa kwakwe, aebele abasambi bakwe ati: “Kwafiite cibi ku mutima wandi, cikanga ne mfwa.” Lyene, “awile ubukupeme, alepepa, ati, Tata, nga cabe cingacitwa, lekeni ulukombo ulu lupitepo pali ine. Lelo, te ifyo ine ntemenwe kano ifyo imwe mutemenwe.” Mu kupelako, pa cimuti ca kucushiwilwapo, mu kufikilishiwa kwa mashiwi ya mu busesemo bwa pa Ilumbo 22:1, Yesu akuutile ati: “Lesa wandi, Lesa wandi, cinshi ico mwandekelesesha?” Lelo mu kupelako Lesa talekeleshe Yesu pantu Yesu asungilile bumpomfu bwapwililika kuli Wene, ukupayanishisha Abena Kristu ba cine bonse icipasho ca kukonka. Yehova alilambwile ukusunga bumpomfu kwa kwa Yesu ukupitila mu kumubuusha no kumusansabika mu myulu mwasumbukisha. (Mateo 26:38-40; 27:46; Imilimo 2:32-36; 5:30; 1 Petro 2:21) Lesa akalambula bonse bambi abasunga bumpomfu kuli wene mu nshila imo ine.
Bumpomfu bwa kwa Yesu tabwapeele fye icasuko cakumanina ku kusonsomba kwa kwa Satana lelo ilambo lya bumi bwakwe ubwa buntunse ubwapwililika lyapayenye icilubula, pa cishinte ico abantunse abasunga bumpomfu benganonkela ubumi bwa muyayaya. (Mateo 20:28) Ica kubalilapo, Yesu alonganika “umukuni unono” uwasubwa abasanguka bakateka banankwe mu Bufumu bwa mu myulu. (Luka 12:32) Pa numa ya ici, “ibumba likalamba” lilalonganikwa ku kupusunsuka “Ubucushi bukalamba,” ukufuma muli bwene ku kupyana ubumi bwa muyayaya mu bwikalo bwa Bufumu bwa kwa Lesa pe sonde.—Ukusokolola 7:9, 14-17.
Yobo wasungile bumpomfu akaba pa kati ka mabilioni ya bafwa abo lyene abakabuushiwa ku kuba ulubali lwa ulya sosaite wa “calo cipya” ica mutende. (2 Petro 3:13; Yohane 5:28, 29) Nga fintu cilangililwe ku nkupo ya ku numa iya uno magazini wesu, kwali icilambu ca bumpomfu mu kasuba ka kwa Yobo lintu Yehova “apaalile Yobo pa numa ukucila pa kutendeka.” Alinonkele ubukose bwa ku mupashi nga umo ‘uushabembwike ku milomo yakwe.’ Lesa alitanunwine ubumi bwakwe ukulundako imyaka 140. Kumfwa ku fikwatwa, alundileko iminkubili ku fintu Yobo akwete akatanshi, kabili Yobo “akwete abana baume cinelubali, na ’bana banakashi batatu,” abana banakashi ukumonwa nga bayembesha mu calo monse. (Yobo 2:10; 42:12-17) Lelo ulubanda ulu lonse lwali fye kusondela libela ukwa mapaalo ayo abasunga bumpomfu bakaipakisha muli Paradise wa “calo cipya.” Nobe wine kuti wayakanamo muli bulya buseko, nga fintu amabula yalakonkapo yalalondolola!
[Icikope pe bula 4]
Yesu aimike ica kumwenapo cawamisha pamo ngo usunga bumpomfu