“Mu Tunwa twa Bacece”

LINTU Samwele aali kalume, akakatile mu kushangila ku fishinte fyalungama te mulandu no bubifi bwa bana ba kwa Shimapepo Mukalamba Eli. (1 Samwele 2:22; 3:1) Mu nshiku sha kwa Elisha, umukashana munono umwina Israele uwasendelwe bunkole ku Syria apeele ubunte bwashipa kuli nakulu. (2 Ishamfumu 5:2-4) Lintu Yesu aali ne myaka ya bukulu 12, alandile mu kushipa kuli bakasambilisha ba mu Israele, ukwipusha ifipusho no kupeela ifyasuko ifyo fyasungwishe abalemonako. (Luka 2:46-48) Ukupulinkane lyashi lya kale Yehova alibombelwa kuli bakapepa bakwe abacaice aba busumino.

Bushe abacaice ilelo balalangisha ulya mupashi wa busumino umo wine? Ee, mu cituntulu! Amalipoti ukufuma ku maofesi ya misambo aya Watch Tower Society yalanga ukuti abacaice abengi nga nshi ‘balaipeela’ mu mulimo wa kwa Yehova. (Ilumbo 110:3) Ifya kufumamo fishaiwamina ifya kutukuta kwabo filakoselesha Abena Kristu bonse, abanono na bakalamba, “[ukukananenuka] mu kucite cawama.”—Abena Galatia 6:9.

Ica kumwenako icisuma ni Ayumi, umukashana munono umwina Japan uwabele kasabankanya lintu aali ne myaka ya bukulu mutanda kabili uwacipangile ubuyo bwakwe ukucitilo bunte ku uli onse mwi kalasi lyakwe. Alombele ulusa lwa kubika impapulo shafulilako mu laibrari ya mwi kalasi, ukuipekanya ukwasuka icipusho icili conse ico abanankwe ba pa sukulu bengepusha. Mupepi na bonse abanankwe ba mu kalasi capamo na kafundisha baishilebeleshanya ne mpapulo. Mu kati ka myaka mutanda iye sukulu lyakwe ilya ku praimari, Ayumi atantike amasambililo ya Baibolo 13. Abatishiwe lintu aali mu gredi yalenga bune, kabili umo uwa banankwe abo alesambilila na bo Baibolo abatishiwe mu gredi yalenga mutanda. Mu kulundapo, nyina na bankashi nankwe abakalamba babili aba uyu musambi wa Baibolo na bo balisambilile kabili balibatishiwe.

Imyendele Isuma Yaba Bunte

“Mwende bwino mu Bena fyalo,” e fyasosele umutumwa Petro, kabili Abena Kristu bacaice balakatamika ili kambisho. (1 Petro 2:12) Pamo nge ca kufumamo, imyendele yabo iisuma ilingi line ilapeela ubunte bushaiwamina. Mu calo ca mu Africa ica Cameroon, umwaume umo aishile pa muku walenga bubili ku kulongana kwa cilonganino ukwa Nte sha kwa Yehova kabili aisangile ekele mupepi no mukashana munono. Lintu kalanda alaalike ibumba lyonse ukumona icipande muli Baibolo, uyu mwaume amwene ukuti umukashana munono mu kwangufyanya alisangile icikomo muli Baibolo wakwe wine kabili mu kusakamanisha alikonkelemo ukubelenga. Imibele yakwe yaebekeshe umwaume ica kuti pa kusondwelela ukulongana, aile kuli kalanda no kusoso kuti: “Uyu mukashana munono anenga ukufwaya ukusambilila Baibolo na imwe.”

Mu South Africa mwalibamo isukulu uko abasambi 25 baba bana ba Nte sha kwa Yehova. Imyendele yabo isuma yalifumamo ukushimikwa kusuma ukwa Nte sha kwa Yehova. Kafundisha umo umwanakashi aebeleko umufyashi umo Nte ukuti taumfwikishe ifyo baNte batunguluka mu kukansha abana babo bwino nga nshi, ukucilisha apantu icalici lyakwe line lyashininkisha ukukanaba na maka ya kwafwilisha abacaice. Kafundisha mupya umwanakashi aishile ku kwafwilisha mwi sukulu kabili bwangu bwangu amwene imyendele isuma iya bana ba baNte. Aipwishe umo uwa bakalume baNte cintu engacita pa kusanguka umo uwa Nte sha kwa Yehova. Kalume alondolwele ukuti alingile ukukwata isambililo lya Baibolo, kabili atantikile abafyashi bakwe ukukonkelela ubuseko.

Mu Costa Rica, Rigoberto ailwike ukumfwika kwa cine lintu abanankwe babili aba mu kalasi babomfeshe Baibolo ku kwasuka ifipusho fyakwe pa lwa Bulesa Butatu, umweo, no mulilo wa helo. Ifyo basosele fyali ifyakatama kuli wene te pa mulandu fye wa maka yabo aya kubomfya Amalembo lelo na kabili pa mulandu wa kuti imyendele yabo ishaiwamina yali iyapusana ku intu amona mu macalici ya Kristendomu. Te mulandu no kukanya kwa lupwa, Rigoberto alecito kulunduluka kusuma mwi sambililo lyakwe ilya Baibolo.

Mu Spain Inte sha kwa Yehova shibili—umo uwa bene uwa myaka ya bukulu pabula—shatandalile umwaume we shina lya Onofre. Ilintu Nte wa cikalamba e walelanda ilingi line, Nte wacaice alekonkamo mu Malembo no kwambula yamo yamo ku mutwe. Onofre alyebekeshiwe. Apingwilepo ukuti alefwaya ukusambilila Baibolo ku cifulo cimo cine uko ulya kalume wacaice asambilile ukubomfya Amalembo bwino nga nshi. E ico, ulucelocelo pa bushiku bwa pa Mulungu bwakonkelepo, aile ku Ŋanda ya Bufumu. Ali no kulolela pa nse ukufikila icungulo kasuba, lintu baNte baishile ku kulongana kwabo. Ukufuma ilyo no kuya ku ntanshi, alilundulwike bwino kabili pali nomba line alilangisha ukuipeela kwakwe ukupitila mu lubatisho lwa mu menshi.

Inte Shacaice Ishifumamo Cimo

Ee, Yehova alabomfya abacaice pamo pene na bakalamba ku kufika pa ba mitima yafuuka. Ici na kabili camwenwe mu ca kukumanya ukufuma ku Hungary. Kulya, nasi wa mu cipatala amwene ukuti ilyo lyonse abatandashi baleisa ku kupempula umulwele umo uwa myaka ya bukulu ikumi, balemuletela ifya kubelenga pamo ne fya kulya. Pa kucebushiwa, atwishike pa lwa cintu umukashana wacepe fi engalabelenga kabili asangile ukuti cali ni Baibolo. Nasi alandile kuli wene kabili pa numa atile: “Ukufuma fye pa kutendeka, mu cine cine alensambilisha.” Lintu umukashana wacaice afumine mu cipatala, alaalike uyu nasi kwi bungano, lelo nasi alikeene. Pa numa, nangu ni fyo, alisumine ukusangwa kwi Bungano lya Citungu ilya “Ululimi Lwine Lwine.” Mu kwangufyanya pa numa, atendeke isambililo lya Baibolo, kabili umwaka umo pa numa alibatishiwe—conse ici caishile pamo nge ca kufumamo ca mukashana munono ukubomfya inshita yakwe mu cipatala ukubelenga impapulo sha Baibolo.

Ana Ruth, mu El Salvador, aali mu mwaka walenga bubili mwi sukulu lyakwe ilya ku sekondari. Akwete icibelesho ca kusha impapulo sha Baibolo pe desiki lyakwe pa kuti bambi bengabelenga nga balefwaya. Pa kumona ukuti impapulo shaleluba kabili lyene ukwisamoneka na kabili pa numa ya nshita imo, Ana Ruth asangile ukuti umunankwe wa pa sukulu, Evelyn, aleshibelenga. Pa numa ya kashita kanono, Evelyn apokelele isambililo kabili atendeke ukusangwa ku kulongana kwa cilonganino. Mu kupita kwa nshita, alibatishiwe, kabili nomba alabomba nga painiya wa kwafwilisha uwa libili libili. Ana Ruth ni painiya wa nshita yonse.

Mu Panama nkashi umo atendeke ukusambilila no mwanakashi uwo umulume wakwe atampile ukukaanya icine ku cipimo ca kuti isambililo lyapene lilekwe. Nangu cibe fyo, panono panono imibele ya mutima iya mulume yalitontolwekeko. Inshita imo pa numa, munyina wa ku mubili, Inte, amulombele ukubika indibu ya kutiinya abapuupu mu ŋanda yakwe. Ilintu alebika indibu, umwana wakwe umwanakashi uwa muli munyina umukalamba uwa myaka ya bukulu pabula abwelele ku ŋanda alemoneka uwa bulanda nga nshi. Alimwipwishe icalubene, kabili atile wene na nkashi nankwe umukalamba baile ku kutungulula isambililo lya Baibolo lelo uyo muntu talipo pa ŋanda, e co tali na maka ya kucitila Yehova icili conse bulya bushiku. Uyu wishi mukalamba atile: “Mulandu nshi ushingashimikilila kuli ine? Lyene kuti wacitilako Yehova icintu cimo.” Uyu mwana wakwe umukashana wa muli munyina mukalamba alibutwike mu nsansa ku kuyabuula Baibolo wakwe, kabili isambililo lyalitendeke.

Nyina kwa uyu mukashana (bukwe kuli uyo mwaume) alekutika. Nyina atontonkenye ukuti cali fye kwangala, lelo inshita yonse lintu uyu mwaume aleisa ku ŋanda yakwe, alelomba umwana wakwe umwanakashi uwa muli munyina ukukwata isambililo lya Baibolo. Lintu nyina amwene ukuti bukwe bwakwe aali uwayangwako no kuti alikwete ifipusho fyayafya, apingwilepo umwine wine ukulatungulula isambililo no mwana wakwe umwanakashi ukulasangwapo. Umwaume atendeke ukulasambilila imiku ibili mu mulungu kabili alundulwike lubilo lubilo. Mu kupelako, afikile ku cipimo ca kuipeela kabili abatishiwe pa kulongana kukalamba pamo pene no mukashi wakwe—fyonse ifi pa mulandu wa mibele ya mutima iya mwana wakwe umwanakashi uwacaice uwa muli munyina mwaice.

Ubukose bwa Bacaice Bwapeela Ubunte Bushaiwamina

Baibolo itila: “Kosa, no kuleko mutima obe utalile; kabili, lolela Yehova.” (Ilumbo 27:14) Aya mashiwi yalabomba ku babomfi bonse aba kwa Lesa, kabili abacaice capamo na bakalamba baliyabomfeshe mu kati ka mwaka wapwa. Mu Australia, lintu umukashana wa myaka ya bukulu isano aingile pe sukulu lipya, nyina aile kuli kafundisha ku kulondolola ifisumino fya Nte sha kwa Yehova. Kafundisha atile: “Kale kale fye nalishiba cintu mwasuminamo. Umwana wenu umukashana alinondolwela fyonse.” Uyu mukashana munono tali uwa mwenso ica kufilwa ukutununuka kafundisha wakwe pa lwakwe ku kulondolola icitetekelo cakwe.

Andrea wa myaka ya bukulu isano mu Romania na o alangishe ubukose. Lintu nyina ashiile icisumino ca baOrthodox pa kusanguka Inte, abena mupalamano balikene ukukutika kuli wene. Kasuba kamo pe Sambililo lya Citabo pa Cilonganino, Andrea aumfwile kangalila wa mulimo aleebekesha ukukabila kwa kushimikila ku bena mupalamano. Atontonkenye mu kusakamanisha pa lwa ici, kabili lintu abwelele ku ŋanda asosele kuli nyina ati: “Nga mwaya ku ncito, nkema, nkapekanye cola candi ne fitabo nga fintu fye mucita, Mayo, kabili nkapepa kuli Yehova ku kunjafwa ukulanda pa lwa cine ku bena mupalamano.”

Ubushiku bwakonkelepo Andrea acitile cintu alaile. Lyene, pa kuipangasha no bukose, alishishe indibu ya pa mwinshi wa mwina mupalamano. Lintu umwina mupalamano aiswileko icibi, uyu mukashana munono atile: “Ninjishiba ukuti ukutula apo mayo abela Inte, tamwamutemwa. Alyesha ukulanda kuli imwe imiku yafulilako, lelo tamwalefwaya ukukutika kuli wene. Ici caliba ica kufulwisha kuli wene, lelo ndefwaya mwishibe ukuti twalimutemwa.” Lyene, Andrea atwalilile ukupeela ubunte bushaiwamina. Mu bushiku bumo, ayanenye ifitabo mutanda, bamagazini mutanda, ututabo tune, na matrakiti yane. Ukutule lyo, aliba uwa lyonse mu butumikishi bwa mwi bala.

Mu Rwanda bamunyinefwe balifwaikwa ukulangisha ubukose bukalamba mu kulolenkana no kukangana kulya. Pa kashita kamo ulupwa lumo ulwa Nte lwabikilwe mu muputule umo abashilika bapekenye ukubepaila. Ulupwa lwalombele ulusa ukuti bapepe intanshi. Ulusa lwalipeelwe, kabili bonse balepepela mu mutalalila, ukufumyako fye umwana mwanakashi, Deborah. Ukulingana na lipoti, Deborah apepele mu kupongomoka ati: “Mwe Yehova, uno mulungu ine na Tata twashalike bamagazini basano. Ni shani tuli no kubwelelako kuli aba bantu ku kubasambilisha icine no kubaafwa ukusanga ubumi? Mu kulundapo, ni shani ndi no kuba kasabankanya nomba? Ndefwaya ukubatishiwa pa kuti ningalamubombela.” Pa kumfwe fi, umushilika umo atile: “Tatwamwipaye pa mulandu wa uyu mukashana munono.” Deborah ayankwileko ati: “Twatootela.” Ulupwa lwalipuswike.

Lintu Yesu aingile mu Yerusalemu mu nshila ya kucimfya mupepi na ku mpela ya bumi bwakwe ubwa pe sonde, asengeelwe na mabumba yakalamba, ayalepunda. Amabumba yasanshishemo abana banono capamo na bakalamba. Ukulingana ne calembwa, bakalume bacaice “baleaula mwi tempele, no kutila, Hosana kuli Mwana Davidi.” Lintu bashimapepo bakalamba na bakalemba bafulilwe pali ici, Yesu ayaswike ati: “Bushe tamwatala amubelenga, ukuti, Mu tunwa twa bacece no tonka e mo mwafikishapo ukutasha?”—Mateo 21:15, 16.

Bushe tacili ca kucincimusha ukumona ukuti nangu fye ni lelo amashiwi ya kwa Yesu yaliba aya cine? “Mu tunwa twa bacece no tonka”—kabili, kuti pambi twalundako atuti, abapungwe na balumendo na bakashana—Yehova alifikishapo ukutasha. Mu cituntulu, lintu caisa ku kulumba Yehova, takwabako umushinku wacepesha.—Yoele 2:28, 29.