Ukubungana Pamo na Batiina Lesa

“ABANTU ukuli konse balafuluka ukulubuka ukufuma ku mwenso—umwenso wa lukaakala, umwenso wa kubulwe ncito, no mwenso wa bulwele bwabipisha. Na ifwe bene twalikwata uko kufuluka. . . . Mulandu nshi, lyene, tulelandila pa lwa kulundulula akatiina?” Ico cipusho ca kucincimusha caimishiwe na kalanda wa lyashi likalamba pali kumo na kumo ukwa Mabungano ya Citungu aya “Akatiina ka Bukapepa” ayo yatendeke mu June 1994.

Amamilioni abasangilweko—intanshi mu North America, lyene pa numa mu Europe, Central na South America, Africa, Asia, ne fishi fya pali bemba—balefwaisha ukusambilila ukulundulula akatiina ka musango yo. Mulandu nshi? Pa mulandu wa kuti ukwakanamo kwesu mu mapaalo ayo Yehova Lesa akwatila abantu bakwe kwashintilila pa kukwata kwesu akatiina ka bukapepa. Cali ku mifwaile ya kusambilila pa lwa katiina ka bukapepa e ko aba kubungana baishile capamo, kabili mu kati ka programu wa nshiku shitatu, basambilile ifingi pa lwa iyi mibele ya Bwina Kristu iyakabilwa.

‘Beleni Lesa Akatiina, no Kubaka Amafunde Yakwe’

Uyo wali e mutwe wa bushiku bwa kubalilapo ubwe bungano, ukushimpwa pali Lukala Milandu 12:13. Cinshi cipilibula ukutiina Lesa? Mu lubali lwa kubalilapo fye muli programu, ceyamani we bungano alondolwele ukuti akatiina ka bukapepa kabelebesha umwenso na katiina ka kucindikisha kuli Yehova capamo no mwenso utuntulu uwa kukanafulwisha wene. Akatiina ka bukapepa aka musango yo takaba ka bucamwenso; kaba akatuntulu kabili akalinga.

Ni shani fintu aka katiina katuntulu katunonsha? Ilyashi lyakonkelepo, “Mwifunshika no Kuleka,” lyalondolwele ukuti akatiina ka bukapepa kakatukunta ku kubaka amafunde ya kwa Lesa mu kuba no buseko. Capamo no kutemwa kwa kuli Lesa na bena mupalamano, akatiina ka musango yo kakatupuutamo amaka ya ku mupashi. Ee, akatiina ka bukapepa kuti katwaafwa ukusengauka ukukokomoka muli nakatango wa ku bumi bwa muyayaya.

Mu kukonkapo pali programu kwali ukulanshanya kwa kwipusha ukulangisha ubushininkisho bwa cine cine ukuti akatiina ka bukapepa kuti katutungilila. Abo baipushiwe bashimike fintu akatiina ka kucindikisha aka kuli Lesa kabasongele ukutwalilila mu butumikishi te mulandu ne misuula, ukukanayangwako, nelyo ukupakaswa no kubaafwa ukushipikisha nelyo fye mu kulolenkana ne fya kwesha fya pa lwabo ifyayafya.

Mulandu nshi, nangu ni fyo, abantu bamo bakwatila akatiina ka bukapepa ilintu bambi tabakwata? Mu lyashi lyaleti “Ukulundulula Akatiina ka Bukapepa no Kumwenamo,” kalanda wa lyashi likalamba alondolwele ukuti pali Yeremia 32:37-39, Yehova alaile ukuti Aali no kupeela umutima wa kutiina Lesa ku bantu Bakwe. Yehova alalimba akatiina ka bukapepa mu mitima yesu. Mu nshila nshi? Ukupitila mu mupashi wakwe uwa mushilo ne Cebo cakwe icapuutwamo, Baibolo. Mu kumfwika, nangu cibe fyo, tufwile ukubikako ukubombesha kwa mukoosha ukusambilila Icebo ca kwa Lesa no kushukila mu kukumanina ukupayanya kwapaka ukwa ku mupashi uko acita. Uku kusanshamo amabungano yesu no kulongana kwa cilonganino, ifyo fitwaafwa ukusambilila ukumutiina.

Programu wa cungulo kasuba aiswilwe no kukonkomesha kwa kutetekela Yehova ne Cebo cakwe. Uku kwakonkelwepo no kulanshanya pa nshila shikalamba isho Ubufumu bulingile ukwambukilamo ubumi bwesu nga Abena Kristu.

Lyene kwaishileko ukukonkana kwa kubalilapo pa kukonkana kutatu ukwapeelwe pe bungano. “Akatiina ka Bukapepa Kalatusesha ku Kumfwila Ififwaikwa fya Bulesa” wali e mutwe wa uku kukonkana, uko kwatontomeshe ukusakamana pa lupwa. Ifyakonkapo fili kusupula kwa kupanda amano kwa mu Malembo—kabili ukubomba—ukwapeelwe.

□ Ku balume: Akatiina ka bukapepa kalingile ukusesha umwaume ukutemwa umukashi wakwe ngo mubili wakwe wine. (Abena Efese 5:28, 29) Umwaume tacena umubili wakwe wine ku mufulo, ukuicenda pa menso ya fibusa fyakwe, nelyo ukulanda pa lwa kupelebela kwakwe kwine. E co, lyene, alingile ukusunga umukashi wakwe no mucinshi uo aipeela umwine.

□ Ku bakashi: Akatiina ka bukapepa aka kwa Yesu kamuseseshe ku ‘kutemuna Lesa pe.’ (Yohane 8:29) Uyu mupashi usuma ku bakashi ukupashanya mu kubomba na balume babo.

□ Ku bafyashi: Abafyashi ba Bwina Kristu kuti balangisha akatiina ka bukapepa pa kusunsa ifishingamo fya bufyashi mu kusakamanishisha, ukumona abana babo pamo nge cikwatwa icafuma kuli Yehova. (Ilumbo 127:3) Ubuyo bukalamba ubwa bafyashi bulingile ukuba kukusha abana babo ku kuba Abena Kristu bene bene.

□ Ku bana: Yehova akambisha abana ukunakila ‘abafyashi babo muli Shikulu.’ (Abena Efese 6:1) E ico, ukunakila abafyashi babo kunakila Lesa.

Ilyashi lya kwisalila pali bulya bushiku lyaileikata fye pa nkuntu, apantu lyalandile pa kuyumfwa kwashika ifwe bonse tukumanya lintu twalufya umutemwikwa mu mfwa. Mupepi na pa kati ke lyashi, nangu cibe fyo, kwaishile icishaenekelwe. Kalanda acincimwine ibumba pa kubilisha ukukakulwa kwa broshuwa mupya Ilyo Untu Watemwa Afwa. Ulu lupapulo lwa mabula 32 ulwakwata ifikope fyabalabata, lulanda pa fingi ifingaafwa abo abali no bulanda ukumfwikisha no kubomba no kuyumfwa ne nkuntu isho shimako ukukonka pa mfwa ya mutemwikwa. Bushe walibala aufilwa ica kusosa ku muntu afwililwe? Ulubali lumo ulwa uyu broshuwa lulanda pa fintu twingaafwa abo abali no bulanda. Ilintu balekutika kuli kalanda, abengi mwi bumba baletontonkanya pa lwa muntu umo uwinganonkelamo muli uyu broshuwa mupya.

‘Bombeni Umulimo Washila mu Kuba na Katiina ka Bukapepa no Kucindikisha’

Uyu wali e mutwe wa bushiku bwalenga shibili, ukushimpwa pa AbaHebere 12:28, NW. Mu kati ka programu wa lucelo kwaishileko ukukonkana kwalenga bubili, “Ifilonganino Ifyendela mu Katiina ka Kuli Yehova.” Ulubali lwa kubalilapo lwalandile pa lwa kusangwa ku kulongana. Ukubapo kwesu pa kulongana kulangisha umucinshi wesu kuli Lesa no kupayanya kwakwe ukwa ku mupashi. Pa kusangwako, tulangisha ukuti tulatiina ishina lyakwe kabili twaliba abaswatuka ukumfwila ukufwaya kwakwe. (AbaHebere 10:24, 25) Kalanda walenga bubili alondolwele ukuti pa kuti icilonganino nge bumba lyonse cendele mu katiina ka kuli Yehova, umuntu umo umo afwile ukubomba ulubali lwakwe mu kusungilila imyendele isuma. Kalanda wa kupelako alandile pa lwe shuko no mulimo ifyo Abena Kristu bonse bakwata—ukubilisha imbila nsuma ukwabula ukuleka. Ni pa butali bwaba shani tukatwalilila ukushimikila? Ukufikila Yehova atila fyafula.—Esaya 6:11.

“Ukusekelela Muli Yehova E Cele Lyenu” wali e mutwe wa lyashi lyakonkelepo, nga fintu ulandilwepo nomba mu fipande fya kusambililamo muli uno magazini. (Nehemia 8:10) Mulandu nshi abantu ba kwa Yehova babela aba buseko? Kalanda atantawile imilandu iingi. Uwacindama nga nshi wa kuti ukwampana kwapalamisha na Lesa kutulenga ukuba abantu bacilishapo kuba aba buseko pe sonde. Bala citontonkanye, e fyo kalanda acinkwileko aba kubungana, twalikwata ishuko lya kuba pa kati ka bantu abo Yehova akulila kuli Yesu Kristu. (Yohane 6:44) Mwandi mulandu wa maka uwa kubela aba buseko!

Akalume ke bungano ilili lyonse kaba lubatisho, kabili ici tacilefumyako Amabungano ya “Akatiina ka Bukapepa.” Mu lyashi lya kuti “Ukuipeela no Lubatisho mu Katiina ka Kuli Yehova,” kalanda alondolwele ukuti ukukakililwako kwa pa lwabo ukwa bonse ababatishiwa kwakwate mbali shine: (1) Tufwile ukusambilila Icebo ca kwa Lesa mu kuba no kwaafwa kwa mpapulo isho shitwaafwa ukumfwikisha no kubomfya cene; (2) tufwile ukupepa; (3) tufwile ukubishanya na basumina banensu pa kulongana kwa cilonganino; na (4) tufwile ukucitilo bunte kwi shina lya kwa Yehova no Bufumu.

Icungulo kasuba ca pa bushiku bwalenga shibili catendeke no mutwe wa kwebekesha uwa kuti “Abantu Abashalekeleshiwa Kuli Yehova.” Imyanda ya myaka 35 iyapitapo, lintu uluko lwa Israele lwalolenkene ne nshita ishayafya, Yehova apeele ukwebekesha ukupitila muli Mose, ukusoso kuti: “Yehova Lesa wenu . . . takamupoose fye, nangu kumulekelesha.” (Amalango 31:6) Yehova alikalilile kuli uko kwebekesha pa kucingilila abena Israele lintu baingile mu Calo Calaiwe no kupyana cene. Ilelo, lintu twalolenkana ne fya kwesha fyayafya, na ifwe bene kuti twakwata ukucetekela kwakumanina ukuti Yehova takatulekeleshe, kulila fye twakakatila kuli wene no kumfwila ukupanda amano kwa Cebo cakwe.

Ni shani fintu wingasango kucankwa mu kubelenga Baibolo? Mu lyashi lyaleti “Belenga Icebo ca kwa Lesa, Baibolo wa Mushilo, Cila Bushiku,” kalanda atubulwile ukubelenga mu kuba no muntontonkanya wa kufwailisha no kwipusha ifipusho pamo nge fi: Cinshi cintu ubu bulondoloshi bulensambilisha pa lwa mibele ya kwa Yehova ne nshila shakwe? Ni shani fintu ningacishapo kuba nga Yehova muli uku kuloshako? Ukubelenga Baibolo muli iyi nshila kwaba ca kukumanya ca kucincimusha kabili ica kulambula.

Ukusakamana mu kukonkapo kwatontelwe pa kukonkana kwalenga butatu pali programu ukwaleti, “Ukupayanya ku Kwaafwa Abo Abatiina Yehova.” Nangu cingati Yehova te kuti abombele ababomfi bakwe ifipesha amano ilelo, mu kushininkisha alaafwa abo abamutiina. (2 Petro 2:9) Uku kukonkana kwalangulwike ukupayanya kune ukufuma kuli Yehova ku kutwaafwa muli shino nshiku shakakala: (1) Ukupitila mu mupashi wakwe, Yehova alatupeela amaka ku kupwilikisha imilimo iyacila nga nshi pa bukose bwesu bwine. (2) Ukupitila mu Cebo cakwe, alatupayanishisha ukufunda no butungulushi. (3) Ukupitila mu cilubula, alatupeela kampingu wasanguluka. (4) Ukupitila mu kuteyanya kwakwe, ukusanshako baeluda, alatupayanishisha ubutungulushi no bucingo. (Luka 11:13; Abena Efese 1:7; 2 Timote 3:16; AbaHebere 13:17) Pa kushukila mu kukumanina uku kupayanya, tukaba na maka ya kushipikisha na muli fyo ukunonka ukusuminisha kwa kwa Yehova.

Ilyashi lya kupelako pa bushiku bwalenga shibili icungulo lyakwete umutwe wa kuti “Ubushiku bwa kwa Yehova Ubwa Kutiinya Nabupalama,” ukushimpwa pa busesemo bwa kwa Malaki. Kwalibako inshiku sha kutiinya mu lyashi lya kale, pamo nga lintu ubupingushi bwaputunkanishiwe pali Yerusalemu mu 70 C.E. Lelo ubushiku bwacilishapo kutiinya mu ca kukumanya ca buntunse conse bukaba bushiku bwa kwa Yehova ubuleisa lintu ‘icilandushi cikacitwa ku bakaano kwishiba Lesa, na ku bashinakila mbila nsuma ya kwa Shikulwifwe Yesu.’ (2 Abena Tesalonika 1:6-8) Ni mu kwangufyanya kwaba shani ico cikaba? Kalanda alondolwele ukuti: “Impela naipalama! Yehova e waishiba bulya bushiku ne nshita. Takaalule imitantikile yakwe iya nshita. Tulelombwa ukushipikisha mu kutekanya.”

Cali icakosa ukusumina ukuti inshiku shibili kale kale shalipitile. Cinshi cali no kwisa mu bushiku bwa kupelako?

“Tiineni Lesa, no Kumupeelo Mucinshi”

Umutwe wa bushiku bwalenga shitatu washimpilwe pa Ukusokolola 14:7. Mu kati ka programu wa lucelo, ukukonkana kwa malyashi kwaebekeshe fimo ifya fisambilisho ifyo fipusanya Inte sha kwa Yehova ukufuma ku mateyanyo ya butotelo yonse yambi.

Mu lyashi lyaleti “Kukabo Kwima ku Bafwa Ukwa Balungama,” kalanda aimishe icipusho ca kulengo buseko ukuti: “Mu kati ka bulya Bushiku bwa Bupingushi ubwa myaka ikano limo, ni lilali lintu abo abafwile aba busumino muli ino myaka ya kupelako iya micitile ya fintu iya kwa Satana bakabuushiwa?” Cinshi cali icasuko? “Baibolo tailanda,” e fyalondolwele kalanda. “Nangu cibe fyo, bushe tacilimo kupelulula ukuti abo abafwa mu kasuba kesu bakabuushiwa mu kubangilila pa kuti bengakana ne bumba likalamba ilya bakapusunsuka ba Armagedone mu mulimo ukalamba uwa masomo uyo uli no kucitika ukupulinkana Ubushiku bwa Bupingushi? Ee, mu cine cine!” Bushe kukabako bakapusunsuka? Mu kushininkisha bakabako. Ifisambilisho fya Baibolo ne fya kumwenako ifyo fitwebekesha ulwa ici fyalilondolwelwe mu kumfwika mu lyashi lyakonkelepo ilyaleti, “Ukupusushiwa Aba Mweo Ukupula mu Bucushi Bukalamba.”

Inte sha kwa Yehova pa nshita ntali balyumfwikisha ukuti Baibolo yatambika amasubilo yabili—ubumi bwa muyayaya pe sonde lya paradise ku mamilioni yashingapendwa no bumi bwa bumunshifwa ubwa ku muulu ku mpendwa yapelela abakateka na Kristu mu Bufumu bwakwe. Isubilo lya ku muulu lyalilandilwepo mu lyashi lyaleti “Mwilatiina, Mwe Mukuni Unono.” (Luka 12:32) Mu cilolwa ca mibele ya mu calo ca ndakai, umukuni unono taufwile ukutiina; umo na umo uwa bene afwile ukushipikisha ukufika fye na ku mpela. (Luka 21:19) “Ukubulwa umwenso kwabo,” e fyasosele kalanda, “kulakoselesha abo aba mwi bumba likalamba. Na bo bene balingile ukulundulula imibele ya mutima iya kubulwo mwenso ilyo baleenekela ukulubulwa mu kati ka nshita yakulisha iya bucushi iyo isonde talyabala alishibapo.”

Pa kusondwelela programu wa lucelo, ibumba lyatambile mu kuba no kucankwa icilangililo ca mu Baibolo icaleti Ukusalapo Ulolenkana Na Ko. Mu nshiku sha kwa Yoshua, e lyo na muli shilya isha kwa kasesema Eliya, abena Israele balolenkene no kupingulapo. Baali no kusalapo. Eliya atile: “Bushe ukufika pa nshita nshi mukaba abasunta ba mitima ibili? Nga Yehova e Lesa, mukonkeni; nga ni Baali, mukonkeni.” (1 Ishamfumu 18:21) Ilelo, nalyo line, umutundu wa muntu ulolenkene no kupingulapo. Ino taili ni nshita ya kuba uusunta wa mitima ibili. Kusalapo nshi kwalungama? Kumo kwine ngo kwacitileko Yoshua wa pa kale. Atile: “Lelo ine na ’ba mu ŋanda yandi, tulebombela Yehova.”—Yoshua 24:15.

Camoneke, mu kupumikisha, kwati cali cungulo kasuba ca pa bushiku bwalenga shitatu kabili inshita ya lyashi lya cintubwingi ilyakwete umutwe wa kuti “Umulandu wa Kutiinina Lesa wa Cine Nomba.” Pa Ukusokolola 14:6, 7, umutundu wa muntu onse wacincishiwa ukuti: “Tiineni Lesa, no kumupeelo mucinshi.” Mulandu nshi cibelele ice pamfya ukutiina Lesa nomba? Pantu, nga fintu ilembo litwalilila ukusosa, “naise nshita ya bupingushi bwakwe.” Ukupitila mu Mwana wakwe, uyo nomba abikwa pa cipuna pamo nge Mfumu ya Bufumu bwa kwa Lesa ubwa mu muulu, Yehova akaleta ku mpela imicitile ya fintu iya ndakai iishasanguluka, iya bucipondoka. Kalanda alondolwele ukuti iyi e nshila fye yeka iya kuletelamo ukwilulukwa kuli abo abatiina Lesa kabili iya kupusushishamo no kubakilamo umushi wesu uwe sonde. Apantu shino ni nshiku sha kulekelesha isha ino micitile ya fintu, cili ice pamfya ukuti tutiine Lesa wa cine nomba!

Ukukonka pa kusupawila isambililo lya Ulupungu lwa kwa Kalinda ilya ulya mulungu, kalanda wa kupelako alininine pa cisebele. Pamo nge ca kufumamo ca programu we bungano, akatiina ka bukapepa kalikwete ubupilibulo bwalengaminako ku ba kubungana, e fyo alondolwele. Akomaile pa mapaalo ayengi ayo yesa kuli abo abatiina Lesa. Kalanda abilishe ukukakulwa kwa video mupya—United by Divine Teaching. Ileebekesha imbali shaibela isha Mabungano ya pa Kati ka Nko aya “Ukusambilisha kwa Bulesa” ayacitilwe mu 1993-94. Ilyo ilyashi lyalesondwelela, abengi balelanguluka abati, ‘Ni kuli cinshi twingaloleshako umwaka ukonkelepo?’ Amabungano ya citungu aya nshiku shitatu mu fifulo ifingi.

Mu kusondwelela, kalanda aloseshe kuli Malaki 3:16, iitila: “E lyo abali na ’katiina kuli Yehova balesoshanya; na o Yehova alepepeka, no kuumfwa, ne buuku lya kwibukisha lyalembelwe ku cinso cakwe, ilya babela Yehova akatiina, ilya batontonkanye shina lyakwe.” Aba kubungana balisalangene mu kuba no mupampamina wa kutontonkanya pe shina lya kwa Yehova no kumubombela mu katiina ka bukapepa.

[Icikope pe bula 24]

Abaleya ku lubatisho bakabila ukutwalilila ukulangisha akatiina ka bukapepa

[Icikope pe bula 25]

Icilangililo “Ukusalapo Ulolenkana Na Ko” caebekeshe bakakutika ukukabila kwa kuba aba mutima umo pa lwa kubombela Yehova

[Icikope pe bula 26]

Aba kubungana balicankilwe ukupokelela broshuwa mupya “Ilyo Untu Watemwa Afwa”