Bakabilisha ba Bufumu Bacita Lipoti

Imbila Nsuma iya Bufumu Ikabilwa

PA MYANDA ya myaka umulwani mukalamba uwa kwa Lesa, Satana Ciwa, mu mucenjelo alibomfya amakamfulumende ya bupolitiki no butotelo bwa bufi mu kubombesha kwakwe ku kucilikila ukwanana kwa buKristu bwa cine. Lelo ishi nshila shikafilwa. Yesu asobele ukuti “imbila nsuma . . . ya Bufumu ikabilwa [te kutila, “pambi ikabilwa” nelyo, “kuti yabilwa”] ku fyalo fyonse ku kubo bunte ku nko shonse.”—Mateo 24:14.

Ukufilwa kwa kwa Satana kwalimonekesha mu Greece. Muli cilya calo Icalici lya Greek Orthodox lyalyesha ukubinda Inte sha kwa Yehova ukubila imbila nsuma iya Bufumu. Lelo, nga fintu cilelangililwa ku ca kukumanya cikonkelepo, mu nshita yalinga icine ca Baibolo cilafika ku bantu ba mitima ya bufumacumi te mulandu no kukaanya.

Mupepi ne myaka 30 iyapitapo, shimapepo wa mu Greek Orthodox apokelele imbila nsuma kabili alumbulwile fye no kufwaisha kwa kuba umo uwa Nte sha kwa Yehova. Nangu cibe fyo, balupwa lwakwe mu kukosa bakeenye ulu lutampulo kabili bamutitikishe ukuleka ukubishanya ne Nte. Pa kutemuna ulupwa lwakwe, atwalilile ukusupila umulimo wakwe pamo nga shimapepo; lelo, lyonse alishibe ukuti Inte sha kwa Yehova balimwafwile ukusambilila icine no kuti alilekele cene mu kukabushanya ne cifulo ca busambashi mu butotelo bwa bufi.

Nangu ni fyo, pa nshita shimo shimo alelandilako bwino Inte sha kwa Yehova lintu ishuko lya mu nshita lyaimineko. Pa tushita utwingi akonkomeshe fye na bantu ifyo nga balefwaya ukusambilila icine ca Baibolo, balingile ukusambilila ne Nte. Mu kuya kwa myaka bamo mu cishinka balikonkele ifyo alelanda.

Pali nomba line fye uyu shimapepo alilwele nga nshi kabili aishibe ukuti mu kwangufyanya kuti afwa. Ilintu aali mu cipatala, aitile abana bakwe, kabili bonse balongene pa busanshi bwakwe.a Lyene alondolwele kuli bene ukuti nga afwile, kuti bamumona na kabili. Alandile kuli bene pa lwa kusambilisha kwa Baibolo ukwa kuti abantunse bakabuushiwa kuli Yehova ku kwikala muli paradise pe sonde, lelo nga ca kuti mu cituntulu balefwaya ukumona ico ukucitika, bafwile ukusambilila icine ukufuma muli Baibolo no kuifumya abene mu butotelo bwa bufi. Abapaapeete ukubishanya ne Nte sha kwa Yehova no kusambilila ukufuma kuli bene ifya kuba Abena Kristu bene bene.

Mu kwipipa pa numa ya ico shimapepo alifwile. Nangu cibe fyo, ukufunda kwakwe ukwa kushalikapo abana bakwe kwaleteleko ifya kufumamo ifisuma. Umwana mwanakashi wakwe, ukupala balupwa bakwe bambi abengi, alekaanya nga nshi Inte sha kwa Yehova no mulimo wabo. Lelo tasuulile ukulomba kwafumaluka ukwa kwa wishi ilyo alefwa, e co mu kwangufyanya akumenye Inte sha kwa Yehova no kutendeka ukusambilila Baibolo. Ndakai line wene abele Nte, ukupeela ubumi bwakwe kuli Yehova Lesa no kulangisha ukuipeela kwakwe ukupitila mu lubatisho lwa mu menshi.

Mu Greece, pamo fye na mu fyalo fimbi 230, Inte sha kwa Yehova shishintilila pa maka ya mupashi wa mushilo uwa kwa Lesa. Caba kupitila mu kutungilila kwakumanina ukwa mupashi wa mushilo e ko bakanina mu kufikilishiwa kwa busesemo bwa kwa Yesu ubwa kuti: “Mukapokelela amaka ilyo ukeso Mupashi wa mushilo pali imwe; kabili mukabe nte shandi mu Yerusalemu, na monse mu Yudea na Samaria, no kufika ku mpela ya pano nse.”—Imilimo 1:8.

[Futunoti]