Bakabilisha ba Bufumu Bacita Lipoti

Ukushimikila mu Nshita Iishayana

UMUTUMWA Paulo asobele ukuti “mu nshiku sha kulekelesha [muli no kuba] inshita ishayafya.” (2 Timote 3:1) Fintu ayo mashiwi yashininkisha ukuba ayalungika! Abena El Salvador mu Central America pa nshita ntali balikumanya iyi mibele yatapata. Ukucila pa myaka ikumi, cilya calo cali mu nkondo ya bana calo iyo yaleteleko ubulanda ne mfwa ku makana ya bantu ayengi. Nomba inkondo yalipwa, lelo ubulanda bucilipo. Imisoka yalisumbana icabipisha pa numa ya nkondo. Umo uwa bakabilisha ba pa televisioni wa cikaya nomba line alondolwele ukuti: “Ulukaakala no bupuupu bwa kubomfye fyanso nomba fya cila bushiku.”

Inte sha kwa Yehova na bo balyambukilwako kuli ili bimbi lya misoka. Abapuupu balingila mu Mayanda ya Bufumu ayengi kabili baliba ifisoselo. Pa tushita utwingi amabungwe aya misepela yaipangasha ne fyanso yalishinga Amayanda ya Bufumu ilintu ukulongana kwa Bwina Kristu kulecitwa, ukwiba indalama, inkoloko, ne fipe fimbi ukufuma ku basangilweko. Mu mibombele yabo iya lyonse, Inte shingi shalipaiwa ku fipondo.

Te mulandu ne fi fipindami, Inte sha kwa Yehova mu El Salvador shitwalilila ukubombesha mu kushimikila imbila nsuma. Bacite ci mu kumfwila ukukambisha kwa mu Malembo ukwa kuti: “Imbila nsuma ili no kubililwa kabela ku nko shonse.” (Marko 13:10) Kuciliko abengi muli ici calo abalefuluka isubilo lya Bufumu ilyo Baibolo itambika, kabili Inte shiletukuta ukufika ku uuli onse uwa bene. Ubunte bwa mu lyashi buleshinina ukuba inshila ya kushimikila iya kufumamo cimo.

Ilintu aleundapwa pa cipatala cimo, Nte umo abomfeshe ishuko lya mu nshita ilili lyonse ukulanda ku balwele bambi pa lwa malayo ya kwa Lesa aya ku nshita ya ku ntanshi, nga fintu yasangwa muli Baibolo. Umulwele umo uwalwalishe nga nshi mu bulanda alilishike ati: “Nalafwa nomba line!” Lelo imimonekele ya bulanda iya mulwele tayafuupwile Nte ku kwakana imbila nsuma iya Bufumu bwa kwa Lesa. Ukucila, abelengeele umulwele mu kupongomoka ukufuma mu citabo Kuti Waikala Kuli Pe na pe muli Paradise Pe Sonde, icasabankanishiwa ne Nte sha kwa Yehova. Inshiku shinono pa numa, Nte alifumine mu cipatala, uwa bulanda ukuti ulya mwaume ali no kufwa.

Imyaka ine pa numa Nte aile mu kundapwa pa cipatala cimbi. Ilintu aali kulya, umulwele umo alishile kuli wene no kusoso kuti: “Bushe ulenjibukisha?” Aali mwaume untu akumenye imyaka ine iyapitilepo, ulya muntu aali mupepi no kufwa! Mwandi buseko lintu umwaume amukumbatile no kulundako kuti: “Nomba na ine ndi umo uwa Nte sha kwa Yehova!” Umwaume alifukatile isubilo lya Baibolo ilya ku nshita ya ku ntanshi, ukusambilila Baibolo ne Nte sha kwa Yehova, kabili apeele ubumi bwakwe kuli Yehova. Mu kulunda pa kuba Nte na kabili aleakana mu butumikishi bwa nshita yonse nga painiya wa nshita yonse mupepi ne myaka nomba ibili.

Muli ici ca kukumanya, imbuto sha cine ishatandilwe mu bunte bwa mu lyashi shafikile pa mutima wankulako. Ili shuko lya kwaafwa abantu ukufika ku kwishiba icine lilakunta Abena Kristu ba cine ukutwalilila umulimo wa kushimikila te mulandu ne shi “nshita ishayafya.”