Bushe Ukasangwako—kwi Bungano lya “Bakalumbanya ba Buseko?”

UBUSEKO! Bushe ilyo ishiwi lileumfwika ilyeni, nelyo fye ilya cilendo, muli ino nshita yaisulamo amafya? Mu kushininkisha amanyunshipepala tayapeela imilandu iingi iya kubela aba buseko. Inkondo sha mushobo, ukwanana kwa nsala, ukubulwe ncito, ukukowesha kwabipisha, ukukanashikatala kwa mapolitiki, imisoka—ifi tafili fintu ifingesusha umutima no buseko, bushe te ifyo?

Abantu abengi ilelo kuti bafwaya ukuipakisha umusamwe uuli onse ukufuma mu bumi. Ni shani ulwa buseko? Ubuseko bwalondololwa nge “mibele ya nsansa; ukwanga.” Te bengi bakumanya ubuseko bwa cine cine, kabili nga babukwata, ilingi line bwa pa kashita kanono fye.

Nalyo line, ukulosha ku ntanshi ku kasuba kesu, Baibolo yasobele ukuti: “E fyo asosa Shikulu Yehova: Moneni, ababomfi bandi bakalya, na imwe mukaba ne nsala; moneni, ababomfi bandi bakanwa, na imwe mukaba ne cilaka; moneni, ababomfi bandi bakasamwa, na imwe mukaba ne nsoni; moneni, ababomfi bandi bakaanga ku kubuuta ku mutima.” (Esaya 65:13, 14) Ni shani fintu ico cingaba?

Pa kusange casuko, tulemulaalika ukusangwa ku mabungano ya citungu aya Nte sha kwa Yehova ayakacitwa mu 1995. Umutwe wa mabungano uleti “Bakalumbanya ba Buseko,” kabili kuti mwasangwako ukwabulo kulipilishiwa. Programu uwa nshiku shitatu akakwata amalyashi yashimpwa pali Baibolo, ifilangililo, ukulanshanya, na fimbi. Ukupulinkana programu onse, umutwe wa lyashi uwa buseko ukebekeshiwa.

Amabungano yakatampila ku United States mu June kabili yakatwalilila mu misumba ukushinguluke calo ukufika mu kubangilila kwa 1996. Mu kumonekesha, kukabako limo mupepi na imwe. Mulandu nshi te kwipusha Inte sha kwa Yehova abekala mu cifulo cenu? Twamulaalika mu kukaba ukusangwako kulya.