Ifipusho Ukufuma ku Babelenga

Ukulingana na Abena Galatia 6:8, “uubyala ku mubili wakwe wine, ku mubili akalobololako ukubola; lelo uubyala ku Mupashi, ku Mupashi wine akalobololako umweo wa muyayaya.” “Umupashi” cinshi uwaloshiwako, kabili ni shani muli ifyo twingalobolola umweo?

Inumbwilo sha ciHebere ne ciGreek ishapilibulwa “umupashi” shakwata amabupilibulo ayalekanalekana, pamo nga: (1) amaka yabomba aya kwa Lesa, (2) amaka ya bumi mu bantunse nelyo inama, (3) amaka yakunta aya muntu, na (4) umuntu wa mupashi, nelyo malaika. Ubupilibulo bwa kubalilapo—amaka yabomba aya kwa Lesa—e bupilibulo tusanga pa Abena Galatia 6:8.

Pamo nge fyebo fya kwaafwa, twapaapaata mona Abena Galatia 3:2, apo tusanga ukubomfiwa kwa kubalilapo ukwe shiwi “umupashi” mwi buuku lya Abena Galatia. Paulo aipwishe Abena Kristu ati: “Bushe mwapokelele Umupashi mu kubombe fisosa Amalango, nalimo mu kuumfwa kwa kutetekela?” Lyene, pa Abena Galatia 3:5, asuntinkenye ulya “mupashi” no kucita ifisunguko. E co “umupashi” uo aleloshako wali mupashi wa mushilo, amaka yabomba ayashimoneka aya kwa Lesa.

Pa numa, pa Abena Galatia 5:16, Paulo acilenye umupashi no mubili. Tubelengo kuti: “Ndetila, Endeleni mu Mupashi; e lyo tamwakafishepo ulunkumbwa lwa mubili.” Ku numbwilo “ulunkumbwa lwa mubili” apilibwile umubili wa buntunse uwa lubembu. Muli fyo, pa Abena Galatia 5:19-23, atantawile “imilimo ya bumubili” mu kucilanya ne “fisabo fya Mupashi.”

E ico, pa Abena Galatia 6:8, umuntu “uubyala ku mubili wakwe wine” afwile ukuba ni uyo uuileka umwine ukutungululwa ku lunkumbwa lwa buntunse, ukuyobeka mu “milimo ya bumubili.” Kuti pambi apita mu kusonga kwa kubosha ukwa myendele ya musango yo, kabili nga ca kuti taalwike, mu kushininkisha takanonke ubumi mu Bufumu bwa kwa Lesa nelyo pe samba lya buko.—1 Abena Korinti 6:9, 10.

Pamo nga Abena Kristu baipeelesha tulingile ukufwaisha ‘ukubyala ku mupashi wa kwa Lesa.’ Ico cisanshamo ukwikala mu nshila iyo isuminisha umupashi wa mushilo ukubomba mu kukakuka mu myeo yesu, ukutwaafwa ukulangisha ifisabo fya uko. Tulingile ukusunge co mu muntontonkanya lintu tulesala ifya kubelenga nelyo amaprogramu ya pa televisioni aya kutamba. Tubyala ku mupashi lintu twapeepeeka pa kulongana kwa cilonganino no kutukuta ukubomfya ukufunda kwa baeluda basontwa no mupashi.—Imilimo 20:28.

Ku ca kusekesha, Abena Galatia 6:8 basondwelela no kwebekesha kwa kuti ilyo tulebyala mu kumfwana no mupashi wa mushilo, tukaba mu cifulo ica ‘kulobololako umweo wa muyayaya.’ Ee, ukushimpwa pa cilubula ca kwa Kristu, Lesa akatambulula umweo wabule mpela ukupitila mu kubomba kwa mupashi wa mushilo.—Mateo 19:29; 25:46; Yohane 3:14-16; Abena Roma 2:6, 7; Abena Efese 1:7.