Ubufuba Bwapene Bonaule Ubumi Bwandi

UBUFUBA bwatendeke ukunyambukila bubi bubi lintu naupilwe ku mulume wandi uwa cibili, Mark.a Ifwe bonse babili, twali no kulasakamana abana ba kusangamo abengi no kubomba na bali kale abanensu ba mu fyupo. Imibele inshita shimo yaleba iyaafya nga nshi ukushipikisha. Ilyo lyonse twalekangana ngo lupwa, calemoneka kwati Mark taleba ku lubali lwandi. Natendeke ukuyumfwa ukuti aali acili natemwa umukashi wakwe uwa kale. Mu cifulo ca kulama ubufuba bwandi, nalibusuminishe ukuti bulame ubumi bwandi. Naleyumfwa uwatiinishiwa lyonse lintu pali umukashi wa kale uwa kwa Mark.

Lyonse fye nalelolekesha Mark, no kulabebeta fye na menso yakwe pa kuti mone uko alelolesha. Nalemumunga ifintu fimo mu miloleseshe yakwe ifintu ifishalipo no kuba. Inshita shimo ukwabulo kumupita mu mbali nalemupeela umulandu wa kutwalilila ukutemwana no mukashi wakwe uwa kale. Pa kashita kamo alicushiwe nga nshi kuli iyi mibele ica kuti alimine no kufuma pa kulongana kukalamba kwa Bwina Kristu. Nayumfwile uwa mulandu pa ntanshi ya kwa Yehova. Nalengele ubumi bwa lupwa lwandi ubwa nkumbabulili pantu kwi pele pele na bana na bo balyambukilweko. Naliipatile ne mwine pa co nalecita, lelo te mulandu no kwesha naleesha, nalifilililwe fye ukulama ubufuba bwandi.

Mu cifulo ca kunjafwako, Mark atendeke ukulandula. Lintu nalemupeela umulandu, aalenkalipila ati, “Bufuba, uli wa bufuba fye iwe.” Amoneke fye no kulacitile fintu ku mufulo ku kunenga ukuba no bufuba. Napamo atontonkenye ukuti ici cali no kupwisha ubufuba bwandi, lelo calengele fye ifintu ukubipilako. Atendeke ukulalolesha abanakashi bambi, ukulalanda pa fyo balemoneka abayemba. Ici canengele ukucishanapo ukuyumfwa uwabotelela kabili uushafwaikwa. Nafikile ku cipimo uko inkuntu imbi, iya lupato, yaishilemoneka. Ilyo cafikile apo, nali uwafulunganishiwa nga nshi ica kuti nshalefwaya ukumona wene no lupwa lwakwe mu menso.

Lintu Baibolo itila “akalumwa kufumuka kwa mafupa,” cine cine kwena e fyo kaba. (Amapinda 14:30) Nomba no bumi bwandi bwatendeke ukwambukilwa. Nakwete ifilonda fya mu nda ifyakokwele sana pa kupola. Natwalilile ukulenga ubumi bwandi ukuba ubwa nkumbabulili pa kuba uwa mutunganya pa cili conse cintu Mark alecita. Nalefwayafwaya na mu matumba yakwe, kabili nga nasangamo apo alembele amanambala ya foni, naletuminako foni ukumfwa uuleasuka. Lwa nkati naleiseka ne mwine, nalelila pa mulandu wa nsoni pa ntanshi ya kwa Yehova. Lelo nalifililwe ukuti ndeke. Nali umulwani wabipisha uwa ne mwine.

Bumupashi bwandi bwaliculile ku cipimo ca kuti nshali na kupepa na kabili. Nalitemenwe Yehova kabili mu cine cine nalefwaya ukucite calungama. Nalishibe amalembo yonse ayakuma ku balume na bakashi, lelo nshali na maka ya kuyabomfya. Pa muku wa kubalilapo mu bumi bwandi, nshafwaile ukutwalilila ukubo wa mweo, te mulandu no kukwata abana abasuma nga nshi.

Baeluda mu cilonganino ca Bwina Kristu baali ba kukoselesha nga nshi kabili balyeseshe pantu bengapesha ukunjafwa. Lelo lintu balandile pa mulandu wa bufuba bwandi, nalekaana pa mulandu wa nsoni, ukukanafwaya ukusumino kuti nalikwete impika ya musango yo.

Mu kupelako, ubumi bwandi bwalibipileko ku cipimo ca kuti natekelwe na mu cipatala pa kuti ningalepulwa. Ilyo nali mulya naishilemona ukuti ubumi tabwali na kutwalilila filya fine. Ine na Mark twapingwilepo ukupaatukana pa myeshi itatu ukuti tubebete imibele yesu ukwabulo kutemwana kwa mu nkuntu nga fintu twali. Mu kati ka iyi nshita icintu cimo icisuma calicitike. Muli magazini wa Loleni! mwamoneke icipande ica mutwe waleti “Ukwaafwa ku Bana Bakalamba aba Bakunkuma ku fya Kunwa Fikola.”b

Namwishiba, mayo aali uwakunkuma ku fya kunwa fikola. Nangu cingatila nshalepumwa, abafyashi bandi tabatalile abalangishapo icitemwishi ku bene babili nelyo kuli ine. Nshibukishapo mayo ukunkumbatila nelyo ukunjebapo ukuti alintemwa. E co mu cituntulu nakulile ukwabulo kwishiba ifya kutemwa bambi nelyo, ukwishiba icintu na cimbi icacindama, ifya kutemwikwa.

Mayo ilingi line alenjeba pa lwa myangalile ya kwa tata no kuti tengamucetekela. E co ndetunganya nakulile mu kukanacetekela abaume bonse. Pa mulandu wa fintu nakushiwe, lyonse naleyumfwa ngo wacepako kuli bambi, maka maka abanakashi bambi. Ukubelenga cilya cipande ca muli ulya Loleni! kwanjafwile ukumfwikisha ubupilibulo bwa ifi fintu. Pa muku wa kubalilapo, nalyumfwikishe intulo ine ine iya mpika yandi iya bufuba.

Nalangisheko umulume wandi Mark cilya cipande ca muli Loleni!, kabili na o calimwafwile ukuŋumfwikisha mu kuwaminako. Mu kwangufyanya ine na wene twali na maka ya kukonka ukupanda amano kwa Baibolo ku bantu baupana abaletontonkanya ulwa kupaatukana. Twaliwikishenye. (1 Abena Korinti 7:10, 11) Nomba icupo cesu naciwaminako ukucila fintu caba kale lyonse. Ifintu ifingi tucitila pamo, maka maka nga fibimbilemo imibombele ya Bwina Kristu. Mark alalangisha icililishi cacilapo. Ni cikanga fye cila bushiku alenjeba fintu antemwa, kabili nomba mu cituntulu ndacetekela.

Lyonse lintu naishiba ukuti twalakumanya umukashi wa kale uwa kwa Mark, ndapepela ubukose kuli Yehova, ukumulomba ukunjafwa ukuti njisunge mu nshila ya Bwina Kristu iyakosoka. Kabili cilabomba. Nangu fye kuyumfwa kwandi ukwa bulwani ukulola kuli wene kuleya kulepwa. Nshitwalilila ukutontonkanya pa fintu fyabipa nelyo ukuleka ukutunganya kwandi kuncimfye.

Ncili ndakwatako ukuyumfwa kushalinga ukwa bufuba. Bumi fye bwapwililika ubwa mu calo cipya ica kwa Lesa e bukandubulako umupwilapo kuli bwene. Pali ino nshita, nalisambilila ukulama ubufuba, mu cifulo ca kubusuminisha ukundama. Ee, ubufuba bwapene bonaule ubumi bwandi, lelo ku kwaafwa kwa kwa Yehova no kuteyanya kwakwe, nomba nincilapo kuba uwa nsansa, kabili ubumi bwandi bwalibwela fintu bwali kale. Na kabili ninkwata ukwampana kwakosa na Lesa wandi, Yehova.—Casangwilwako.

[Amafutunoti]