Bakabilisha Ba Bufumu Bacita Lipoti

Ukucitilo Bunte Kwatwale Fisabo pa Ŋanda na pa Sukulu

UBUMI bwa Mwina Kristu busanshamo ukucite cisuma kuli bambi, ukucilisha pa kwakana na bene imbila nsuma iya Bufumu bwa kwa Lesa. Amapinda 3:27 yasoso kuti: “Witana busuma ku munobe, ilyo cili mu maka ya kuboko kobe ukubucita.” Mu Argentina Nte wacaice mu mwaka wakwe uwalenga butatu uwa pa sukulu lya ku sekondari alefwaya ukwakana imbila nsuma iya Bufumu na cibusa balesambilila na o. Ico acitile cakwete ifya kufumamo ifyafikile ukutali.

Bushiku bumo Nte wacaice aebele cibusa wakwe ukuti te mipepele yonse yawama. Lintu umulumendo ayaswike ukuti talecita icili conse icabipa, Nte atile: “Taucitapo icili conse pa lwa kwa Lesa na o.” Ici calengele umusepela ukutontonkanya. Pa numa Nte alondolwele ukuti shino ni nshiku sha kulekelesha no kuti pa kunonka ukusenamina kwa kwa Lesa, umuntu afwile ukwishiba Baibolo mu kulungikwa no kuibomfya. Cibusa alesambilila na o alisumine. Lelo bushe ulupwa lwakwe lwali no kumusuminisha ukulasambilila Baibolo? Pa kupeela cibusa wakwe ica kutontonkanyapo, Nte amwipwishe ukubelenga icitabo Kuti Waikala Kuli Pe na pe muli Paradise Pe Sonde.

Inshita yalipitile, kabili uyu cibusa alilekele isukulu. Takuli icaumfwikilwe pa lwa wene ukucila pa mwaka umo. Lyene bushiku bumo Nte wacaice alisungwike ukupokelela lamya ukufuma kuli cibusa wakwe uwasosele ifyo alemona ukuti amasesemo ya Baibolo mu cituntulu yalefikilishiwa. Ilyo line fye Nte atantike ukusambilila Baibolo na wene.

Lintu aile ku ŋanda ya wali cibusa wakwe uwa ku sukulu, amwene ukuti abafyashi ba kwa cibusa wakwe baali abayangwako nga nshi pa lwa co umwana wabo aaleibimbamo. Nangu fye mwaice wa kwa uyu cibusa atontonkenye ukuti umukalamba wakwe aalepena. E co abafyashi baebele umwaice wakwe ukusangwako pe sambililo lyali no kukonkapo. Pa numa, uku ninshi ne filamba nafilengalenga mu menso, uyu mulumendo alondolwele ku bafyashi ukuti umukalamba wakwe taalepena iyo, icalengele nyina ukupunda ukuti, “Mu cifulo ca mpika imo, nomba nakwata shibili!”

E ico, pe sambililo lyakonkelepo umwine wine alisangilweko kabili alisumine ukuti bakalume tabapenene. Pa numa isambililo lya Baibolo lyalitantikilwe wene no mulume wakwe. Mu kwangufyanya ulupwa lonse lwatendeke ukusangwa ku kulongana kwa cilonganino pa Ŋanda ya Bufumu. Mu kupita kwa nshita, banakulwibo na bashikulwibo na bo bene balitendeke ukusambilila Baibolo kabili batampile ukuya ku kulongana. Pali nomba, umulumendo wa kubalilapo alibatishiwa. Alyupa, kabili wene no mukashi wakwe ni bakasabankanya bapimpa.

Mu kulundapo, ukupitila mu bunte bwa mu lyashi pa sukulu, Nte wacaice alyafwa abo asambilila na bo bambi babili pamo pene no kwaafwa nyina ne nkashi iya umo uwa bene ukutendeka ukusambilila Baibolo. Bonse pamo, abantu 11 balisambilile cine ca Baibolo pa mulandu fye wa kuti Nte wacaice takwindile ku kucite cisuma ku bo alesambilila na bo. We ca kufumamo cishaiwamina! Mu cine cine, “Balishuka abantu abo Yehova e Lesa wabo.”—Ilumbo 144:15.