‘Uwafuntulwa Lelo Uushaonaika’

NGA FINTU CASHIMIKWA NA ULF HELGESSON

Mu July 1983, badokota bakongamine kuli ine no kupunda abati: “Apepemuka!” Cimumena calepa amasentimita 12 califumishiwe mu mongololo wandi mu kulepula kwapikana ukwasendeleko amaawala 15. Nashele uwabulwa amaka umupwilapo.

PA NUMA ya nshiku shinono, bankuushishe ku cipatala cali bakilomita 60 ukufuma mwi tauni naleikalamo ilya Hälsingborg, ku kapinda ka ku kulyo aka Sweden. Mulya batendeke ukulancina. Uwaishibisha ifya kucina asosele ukuti cali no kufwaishe fingi, lelo nalefwaisha ukuti batampeko. Mu cituntulu nalefwaya ukwenda na kabili. Pa kusupila programu wa kutukusha umubili ukwa maawala yasano ubushiku bumo, nalilundulwike lubilo lubilo.

Pa numa ya mweshi umo lintu kangalila enda abombele icilonganino cesu, wene na baeluda ba Bwina Kristu bambi baendele intamfu yalepa ukwisacitilo kukumana kwa baeluda ba mu cilonganino mu muputule wa cipatala umo nali. Fintu umutima wandi wasekelele pali ubu bushininkisho bwa kutemwa kwa bwananyina! Banasi ba mu wadi bapangile ibumba lyonse tii na masangweci pa numa ya kukumana.

Pa kubalilapo badokota balisungwike pa kumona ifyo nalepola bwangu. Pa numa ya myeshi itatu nalitendeke ukwikala mu cicinga ca muntu uushingenda no kwiminina fye pa kashita kanono. Nali uwa nsansa kabili uwapampamina nga nshi pa kwenda na kabili. Ulupwa lwandi na Bena Kristu banandi balinkoseleshe nga nshi ilyo balempempula. Naleya fye na ku ŋanda pa tushita utwipi.

Ukubwelele Numa Ukwine Kwine

Pa numa ya ico, nangu ni fyo, nalishibantukile mu kupola na kabili. Mu kwangufyanya uwaishibisha ifya kucina anjebele amashiwi ya kukalifya aya kuti: “Tawakapole ukucila pano!” Ico batendeke ukubombelapo nomba cali kunkoselesha ukulayendela mu cicinga candi. Nalangulwike pa cali no kucitika kuli ine. Ni shani fintu umukashi wandi aali no kukumamo? Kale kale balimubombele apakalamba na muli fyo aalekabila ukwaafwa kwandi. Bushe nali no kukabila ukutangatwa ne cipatala inshita yonse?

Nalipopomenwe nga nshi. Ubukose bwandi, ukushipa, na maka fyalipwile. Inshiku shalipitile, kabili natwalilile ukube cite. Nshabele fye uwa bulebe bwa ku mubili lelo na kabili nali uwafulunganishiwa lwa mu nkuntu na lwa ku mupashi. ‘Nalifuntwilwe.’ Lyonse naleimona ngo wakosa lwa ku mupashi. Nalikwete icitetekelo icashangila mu kukosa mu Bufumu bwa kwa Lesa. (Daniele 2:44; Mateo 6:10) Nalishininwe ulwa bulayo bwa mu Baibolo ubwa kuti amalwele yonse no kunakuka fili no kundapwa mu calo cipya ica kwa Lesa icalungama no kuti umutundu wa buntunse onse ukabweshiwa ku bumi bwapwililika muli ci calo. (Esaya 25:8; 33:24; 2 Petro 3:13) Nomba nayumfwile uwapomponteka te lwa ku mubili fye lelo na lwa ku mupashi na ko kwine. Nayumfwile ‘uwaonaulwa.’—2 Abena Korinti 4:9.

Ilyo nshilatwalilila, lekeni mwebeko fimo fimo pa lwa cikulilo candi.

Ulupwa lwa Nsansa

Nafyelwe mu 1934, kabili ubutuntulu bwandi ubwa bumi lyonse bwali fye bwino. Mu kubangilila kwa ba 1950, nakumene na Ingrid, kabili twaupene mu 1958 no kwikala mwi tauni lya Östersund lwa pa kati ka Sweden. Ica kucitika cikalamba mu bumi bwesu caishileko mu 1963 lintu twatendeke ukusambilila Baibolo ne Nte sha kwa Yehova. Pali ilya nshita twakwete abana banono batatu—Ewa, Björn, na Lena. Mu kwangufyanya ulupwa lwesu lonse lwalesambilila no kulunduluka bwino mu bwishibilo bwa cine ca mu Baibolo.

Mu kwipipa pa numa twatendeke ukusambilila, twakuukile ku Hälsingborg. Kulya ine no mukashi wandi twaliipeele fwe bene kuli Yehova kabili twabatishiwe mu 1964. Insansa shesu shalingilishiweko lintu umwana wesu umwanakashi umukalamba, Ewa, abatishiwe mu 1968. Imyaka 7 pa numa, mu 1975, Björn na Lena na bo bene balibatishiwe, kabili umwaka wakonkelepo nasontelwe nga eluda mu cilonganino ca Bwina Kristu.

Incito yandi iya ku mubili yanengele ukupayanishisha bwino ukukabila kwa ku mubili ukwa lupwa lwandi. Kabili insansa shesu shalifulileko lintu Björn na Lena batendeke ubutumikishi bwa nshita yonse. Björn mu kwangufyanya alilaalikwe ku kubombela pe ofesi lya musambo ilya Nte sha kwa Yehova mu Arboga. Ifintu fyonse fyali fye bwino. Lyene, mu kubangilila kwa ba 1980, natendeke ukumfwa ubukali pa mulandu wa cimumena ico mu kupelako cafumishiwe mu kulepula kukalamba mu 1983.

Ukucimfya Ubulebe bwa ku Mupashi

Lintu naebelwe ukuti nshali na kwenda na kabili, ubumi bwamoneke ukuba ubwabulwe subilo. Ni shani fintu nanonkele ubukose bwa ku mupashi cipya cipya? Calyangwike ukucila fintu natontonkenye. Nabuulile fye Baibolo wandi no kutampa ukubelenga. Ilyo nacilileko ukubelenga, e lyo nacilileko ukupokelela ubukose bwa ku mupashi. Ne cacilapo naishiletesekesha Ilyashi lya kwa Yesu ilya pa Lupili. Nalilibelengele mu kubwekeshabwekeshapo no kwetetula pali lyene.

Imimwene yandi iya nsansa mu bumi yalibweshiwe. Ukupitila mu kubelenga no kwetetula, natendeke ukumonako amashuko ya mu nshita mu cifulo ca kumone fipindami. Napuupuutwile ukufwaisha kwandi ukwa kwakana na bambi icine ca mu Baibolo, kabili nalikwishe uku kufwaisha pa kucitilo bunte ku babomba mu cipatala na bantu bambi abo nakumene na bo. Ulupwa lwandi lwalintungilile mu kukumanina kabili lwalikanshiwe pa fya kunsakamana. Mu kupelako nalifumine mu cipatala.

Mu kulekelesha nalibwelele ku ŋanda. Fintu kalya kali kasuba ka nsansa kuli ifwe bonse! Ulupwa lwandi lwapekenyeko imitantikile iyasanshishemo ukunsakamana. Umwana wandi umwaume, Björn, apingwilepo ukusha umulimo pe ofesi lya musambo wa Nte sha kwa Yehova, kabili aishile ku ŋanda ku kwaafwa ukunsakamana. Calensansamusha ukumona ukuti nalitontelwepo ukutemwa ukwingi no kusakamana ukufuma ku lupwa lwandi.

Ukubomba ne Cipindami Cimbi

Nangu cibe fyo, ilyo inshita yalepita, ubutuntulu bwandi ubwa bumi bwalibipileko, kabili cali icakosa kuli ine ukwenda. Mu kupelako, te mulandu no kubombesha kwabamo kuipeelesha ukwa lupwa lwandi, tabali na maka ya kunsakamana pa ŋanda na kabili. E co natontonkenye fyo kuti cacilapo kuwama kuli ine ukuba mu ŋanda ya kulelelwamo. Na kabili, capilibwile ukwaluka ne mibombele ipya. Lelo nshalekele ci ukuba icipindami ca ku mupashi.

Nshabalile ndeka ukubelenga Baibolo no kusapika. Natwalilile ukulanguluka pa co ningacita, te co nshingacita. Naleetetula pa mapaalo ya ku mupashi ayo Inte sha kwa Yehova shonse shakwata. Natwalilile ukupalamina kuli Yehova mwi pepo kabili nabomfeshe ishuko lya mu nshita ilili lyonse ukushimikila kuli bambi.

Pali nomba mpoosa inshita yandi iya bushiku ne fiputulwa fimo ifya kasuba mu ŋanda ya kulelelamo. Ifyungulo kasuba ne fyungulo bushiku mpoosa inshita atemwa pa ŋanda nelyo pa kulongana kwa Bwina Kristu. Icipani citangata abantu calitantika imyendele ya lyonse ukuya no kufuma ku kulongana no kuya no kufuma ku ŋanda. Ulupwa lwandi ulwaipeelesha, bamunyina mu cilonganino, na babomba mu ŋanda ya kulelelwamo balansakamana mu nshila ya kusungusha.

Ukucita apo Ningapela

Nshiimona ne mwine nge cilema, kabili nshisungwa nge cilema ku lupwa lwandi, nelyo kuli bamunyinane ba Bwina Kristu. Ndasakamanwa mu kubamo kutemwa, ukunenga ukutwalilila ukubomba mu kufumamo cimo pamo nga eluda. Ndatungulula Isambililo lya Citabo pa Cilonganino cila mulungu, pamo pene ne sambililo lya Ulupungu lwa kwa Kalinda ilya cila mulungu mu cilonganino pa Ŋanda ya Bufumu. Cintu cayafya kuli ine ukukupukula amabula ya muli Baibolo, e co umuntu alipeelwa umulimo wa kungafwaako ukucite co pa kulongana. Ndatungulula ukulongana no kupeela amalyashi mu cicinga candi.

Muli fyo ncili ndacite fintu ifingi ifyo naipakishe ukucita kale, ukusanshamo ukucite fipempu fya bucemi. (1 Petro 5:2) Ncite ci lintu bamunyina ne nkashi baisa kuli ine ku kupandwa amano. Na kabili ndabomfya lamya, ukuitendekelako ukutumina bambi lamya. Icifumamo kukoshanya. (Abena Roma 1:11, 12) Cibusa nomba line atile: “Lintu fye ndeyumfwa uwakungumana, e lyo mutuma lamya ku kunsansamusha.” Lelo na ine wine ndakoseleshiwa, ukwishibo kuti Yehova alepaala ukubombesha kwandi.

Pa ntanshi na pa numa ya kulongana, ndabishanya na bana banono mu cilonganino. Apantu njikala mu cicinga candi, tulalanshanya bwino na bene. Nalitemwa ifyo baba abafumaluka kabili abashipita mu mbali. Kalume munono inshita imo anjebele ati: “Mulabomba bwino sana kwati tamwalemana!”

Pa kutontomesha pa co ningacita mu cifulo ca kusakamikwa ne co nshingacita, naliipakisha ukubombela Yehova. Nalisambilila ifingi ukufuma ku fyancitikila. Nalishibo kuti tulakanshiwa no kukoshiwa ku fya kwesha ifyo tupitamo.—1 Petro 5:10.

Abantu abatuntulu abengi, abo namona, balafilwa ukutesekesha ukuti lyonse tufwile ukumona ukupepa kwa kwa Shifwe wa ku muulu mu kukatama nga nshi. Nga tatukukatamike, ukutantika kwesu ukwe sambililo, ukulongana, no butumikishi bwa mwi bala kuti fyasanguka fye icibelesho. Mona uku kupayanya ukuba ukwakatama pa kupusunsuka ukupula muli ino mpela ya cino calo ukwingila mwi sonde lyalaiwa ilya kwa Lesa ilya Paradise.—Ilumbo 37:9-11, 29; 1 Yohane 2:17.

Lyonse tufwile ukusungilila isubilo lya bumi mu calo cipya ica kwa Lesa icileisa ilituntulu mu mitima yesu. (1 Abena Tesalonika 5:8) Na kabili nalisambilila ukukananenuka mu kulwisha kwandi ukukongama ukuli konse ukwa kufuupulwa. Nalisambilila ukumona Yehova nga Tata no kuteyanya kwakwe nga Mayo. Nalisa mu kwiluka ukuti nga twabombesha, Yehova kuti abomfya uuli onse uwa ifwe ukuba umubomfi wakwe uwa kufumamo cimo.

Nangu cingati inshita shimo shimo naliyumfwa ngo ‘wafuntulwa,’ ukucilandila muli yo nshila, ‘nshaonaika.’ Nshabala ndekeleshiwa na Yehova no kuteyanya kwakwe, nelyo ku lupwa lwandi na bamunyina ba Bwina Kristu. Ukupitila mu kubuula Baibolo wandi no kutampa ukuibelenga, nalipuupuutwile ubukose bwandi ubwa ku mupashi. Ndi uwa kutasha kuli Yehova Lesa, uupeela “ukucishamo kwa maka” lintu twamucetekela.—2 Abena Korinti 4:7.

Mu kuba no kucetekela kwakumanina no kutetekela kwa mupwilapo muli Yehova, mu kuswatuka ndeenekela inshita ya ku ntanshi. Ndi uwacetekela ukuti mu kwangufyanya Yehova Lesa akafikilisha ubulayo bwakwe pa lwa paradise wabweshiwa pano pene pe sonde capamo na mapaalo yashaiwamina yonse ayo uyu paradise akaletako.—Ukusokolola 21:3, 4.