Ulubuuto Lwabo Talwashimine

MU NSHITA ifyalembwa mu Baibolo fyalecitika kwaliko Inte sha kwa Yehova isha busumino abakumenye ifipindami na mafya. Balolenkene no kukaanya no kupelebela kwamonekesha. Nalyo line, tabalekele pa mulandu wa kufuupulwa. Na kuba, ulubuuto lwabo talwashimine.

Ku ca kumwenako, kasesema Yeremia apeelwe umulimo wa kuba kasesema wa kwa Lesa ku luko lwa bucisanguka ulwa kwa Yuda. Abilishe ukusoka pa lwa bonaushi bwaleisa ubwa Yerusalemu. (Yeremia 1:11-19) Nge ca kufumamo, Yeremia akwete amafya ayengi ukufuma ku bekashi banankwe, abamumwene ngo walewelesha mu kutekunya ukuti kuli no kuba akayofi.

Shimapepo Pashihuri, uwali cilolo mukalamba mu ŋanda ya kwa Lesa, inshita imo aumine Yeremia pa mulandu wa co aseseme no kumubika mu makusu. Mu kuba ne ci calemoneka nge cipindami, Yeremia asosele ukuti: “Nabe casekwa akasuba konse; bonse bene balempumya. Pantu lyonse ilyo nsosa, ndepunda; ndebilikisha, ndeti, Lufyengo no kupumpunta! Pantu icebo ca kwa Yehova caisaba kuli ine ukuseebanya kabili akawele akasuba konse.” Kasesema alifuupwilwe ukufika fye na ku cipimo ca kusoso kuti: “Nshakamulumbule [Yehova], nshakasosele kabili mwi shina lyakwe.”—Yeremia 20:1, 2, 7-9.

Nangu cibe fyo, Yeremia tanakile ku kufuupula. Ukulanda ulwa “cebo ca kwa Yehova,” abilishe ukuti: “Mu mutima wandi mwaba kwati mulilo uulepya, uwacilikilwa mu mafupa yandi. Ninaka ku kuminina mu nda, kabili nafilwa.” (Yeremia 20:8, 9) Pa kukuntwa mu kuluma ukulanda pa lwa fisemo fya kwa Lesa, Yeremia alitungililwe no mupashi wa mushilo kabili afikilishe ukutumwa kwakwe.

Umutumwa Paulo na o alikwete imilandu iingi iya kubela uwafuupulwa, nga ca kuti alinakileko. Ashipikishe amasanso ya mu fyabumbwa, ukubunshiwa, ukupakaswa, no kuumwa. Mu kulundapo, ‘pali ukupamfya kuli wene akasuba na ’kasuba ukwa kusakamane nkuta shonse.’ (2 Abena Korinti 11:23-28) Ee, Paulo cila bushiku aali no kubomba ne mpika, ukusakamikwa pa lwa filonganino fipya ifyo ayafwile ukwimikwa. Mu kulundapo, aali uushapwililika na muli fyo aali no kucululuka no “muunga mu mubili,” napamo amenso yakwe tayali bwino. (2 Abena Korinti 12:7; Abena Roma 7:15; Abena Galatia 4:15) Bamo balandile fye na pa lwa kulwisha Paulo ilyo ashaliko, kabili ifi fyalefika mu matwi yakwe.—2 Abena Korinti 10:10.

Nangu ni fyo, Paulo tasuminishe ukufuupulwa ukumucimfya. Iyo, takwete amaka yacilo buntunse. (2 Abena Korinti 11:29, 30) Cinshi casungilile ‘ulubuuto lwakwe ulwa mu kati’ ku kukanashima? Ica kubalilapo, alikwete ifibusa fyalemutungilila, bamo ukumushindika fye na ku Roma uko apooselwe mu cifungo. (Imilimo 28:14-16) Ica bubili, umutumwa amwene imibele yakwe mu nshila yashininkishiwa. Abalemupakasa no kumukaanya balilubile, te Paulo walubile. Ukulola ku kupwa kwa bumi bwakwe ubwa pe sonde, apimunwine ubutumikishi bwakwe mu nshila yashininkishiwa no kusoso kuti: “Nomba kwambikilwa icilongwe ca bulungami, ico Shikulu, Kapingula mulungami, akapeela kuli ine.”—2 Timote 4:8.

Pali fyonse, Paulo lyonse aletununuka Yehova Lesa mwi pepo, kabili ‘Shikulu aiminine kuli wene mu kumukoselesha.’ (2 Timote 4:17) Paulo asosele ukuti “Ndi na ’maka aya kucite fintu fyonse mu ulenkoselesha.” (Abena Filipi 4:13) Ukumfwana na Lesa na Bena Kristu banankwe, capamo no kupimununa ubutumikishi bwakwe mu kushininkishiwa, fyayafwile Paulo ukutwalilila mu mulimo wa kwa Yehova.

Lesa apuutilemo Paulo ukulembo kuti: “Twinenuka mu kucite cawama; pantu ku nshita iiyene tukalobolola, nga tatutompweke.” (Abena Galatia 6:7-9) Ukulobolola cinshi? Umweo wa muyayaya. E co, kanshi, ba nga Yeremia, Paulo, ne nte sha kwa Yehova shimbi ishingi isha busumino ishalumbulwa mu Malembo. Ee, bapashanye, no kukananakila ku kufuupula. Wileka ulubuuto lobe lushime.—Linganyako Mateo 5:14-16.

[Ifikope pe bula 25]

Paulo na Yeremia tabalekele ulubuuto lwabo ukushima