Ifipusho Ukufuma ku Babelenga

Pa Abena Filipi 2:9, Paulo alandile pa lwa kwa Yesu ukuti: “Lesa amusansabike, no kumupeele shina ilyacila [ishina lyonse limbi, “NW”].” Ili ishina ilipya lishina nshi? Kabili nga Yesu alicepako pali Yehova, ni mu nshila nshi ishina lya kwa Yesu lyacila amashina yonse?

Abena Filipi 2:8, 9 babelengwo kuti: “[Yesu pa kusangwa] mu mibele ya buntunse, aipetamike no kubo wa kunakila ukufika na ku mfwa, awe ukufika ku mfwa ya pa [cimuti ca kucushiwilwapo, NW]. E ico na Lesa amusansabike, no kumupeele shina ilyacila ishina lyonse limbi.”

Ici cipande tacilepilibulo kuti apo ni Yehova fye eka e waba ne shina ilyo mu kukumanina lyacila pa mashina yonse, ninshi Yesu afwile ukuba muntu umo wine na Yehova. Nga fintu amashiwi yashingulukako mu Abena Filipi icipandwa 2 yalanga, Yesu apokelele ishina lyakwe ilyasansuka pa numa ya kubuushiwa kwakwe. Pa ntanshi ya kubuushiwa kwakwe, ilyo shina talikwete. Pa lubali lumbi, Yehova lyonse aba uwapulamo, kabili icifulo cakwe tacatala acaluka. Icishinka ca kuti Yesu apokelele ishina ilyasumbuka ukucila pe shina akwete pa ntanshi ya butumikishi bwakwe ubwa pe sonde cishininkisho kuti taba umo wine na Yehova. Lintu Paulo atile Yesu apeelwe ishina ilyacila amashina yonse, apilibwile ukuti Yesu nomba akwete ishina lyasumbukisha pa fibumbwa fyonse ifya kwa Lesa.

Cinshi caba e shina lya kwa Yesu ilyasumbuka? Esaya 9:6 alatwaafwa ukwasuka. Mu kusesema ulwa kwa Mesia uwaleisa, Yesu, ico cikomo citila: “Bukateka bukaba pa kubeya kwakwe, ne shina lyakwe akenikwa, Kabilo wa cipesha amano, Mulungu impalume; Wishi wa nshita pe, Cilolo wa mutende.” Pano “ishina” lya kwa Yesu likumine ku cifulo cakwe icasumbuka no bulashi, icaba na kabili e nshila tumfwilamo “ishina ilyacila ishina lyonse limbi” ilyalumbulwa pa Abena Filipi 2:9. Ikufi lyonse lyalikambishiwa ukufukama kuli Yesu ukwishiba icifulo ca bulashi bwakwe icasumbuka ico Yehova amupeela—icifulo ca bulashi icacila pa cili conse icapeelwa ku cibumbwa icili conse cimbi. Ishiwi lya kuti “limbi, NW,” muli ubu bupilibulo talyaimininwako mu bupilibulo bwa kutendekelako ubwa ciGreek, lelo lyatubululwa fye ku mano ya ici cikomo. “Ishina” lya kwa Yesu talyacila pe shina lyakwe umwine lelo lyacila ishina lya cibumbwa icili conse cimbi.

Fintu twaba aba nsansa ukuilunda kuli bamalaika ba busumino na bantunse ukufukama mu kwishiba ili shina lya kwa Yesu! Tucite ci pa kuinashisha kuli Yesu uwaba mu cifulo casumbulwa kabili ica maka icapeelwa na Yehova kuli wene—“ku bukata bwa kwa Lesa Shifwe.”—Abena Filipi 2:11, NW; Mateo 28:18.