Ilyashi Lya Bakabilisha ba Bufumu

“Bombo Mulimo wa Bukabila”

BUSHE cinshi cipilibula ukuba kabila? Ili shiwi lyaba kupilibula kwe shiwi lya ciGriki eu·ag·ge·li·stesʹ, ilyaampana mu kupalamisha kwi shiwi eu·ag·geʹli·on, ilipilibula “imbila nsuma.” E co kanshi, kabila ni kashimikila, nelyo inkombe, iya mbila nsuma.

Abena Kristu ba cine bonse ni bakabila pantu babilisha imbila nsuma pa lwa Bufumu bwa kwa Lesa. Cili icalinga kanshi, ukuti umutumwa Paulo akonkomeshe Timote ‘ukubombo mulimo wa bukabila.’ Timote aali no kukatamika uyu mulimo. Paulo amucincishe ‘ukuba uwatekanya mu fintu fyonse’ no ‘kufishapo bukapyunga bwakwe.’—2 Timote 4:5.

Apo twaba bakabila na ifwe bene tulakatamika ubutumikishi bwesu no ‘kuba abatekanya,’ nelyo ukuba abaswatuka ukwakana imbila nsuma pe shuko lya mu nshita ilili lyonse. Abengi muli fyo balisa mu kwishiba Yehova na malayo yakwe pa numa Inte sha kwa Yehova shalandile na bo mu bunte bwa mu lyashi. Ici e cacitike kuli Seymore, umwaume wa ku Barbados.

Seymore aali ni kafundisha pa sukulu lya buteko. Charles, uwali kafundisha walesambilisha fye inshita lubali pa sukulu limo line kabili umo uwa Nte sha kwa Yehova, aali ni kabila wa mbila nsuma uwaswatuka. Aali mutumikishi wa nshita yonse, nelyo painiya, kabili alebomfya ishuko ilili lyonse ilya mu nshita ukwebako bambi imbila nsuma. Cali kupitila mu bunte bwa mu lyashi ubwa kwa Charles e mo Seymore aumfwile ubukombe bwa Bufumu pa muku wa kubalilapo.

Ilyo tapalapita ne nshita Seymore na o aali uwapampamina ukwebako abantu abafulisha icine cisangwa mu Baibolo. E co aletendeka ubunte bwa mu lyashi ku ncito, ukucilisha na bana be sukulu. Nangu ca kuti mu fyalo fimo amasambililo ya fya mipepele tayasambilishiwa mu masukulu ya buteko, uyu muntu wena alipeelwe umulimo wa kusambilisha ifya mipepele ne fyakatamikwa fya mu mibele. Ukufika pali iyi nshita ukwishiba kwa mu Baibolo uko Seymore anonkele kwalipyene pa fintu alemona iyi milandu kale. Pa tushita twa kupembelela kafundisha umbi ukwisa, alelanda na bana be sukulu pa lwa bulayo bwa kwa Lesa ubwa kulete calo cipya ne cilolelo ca bumi bwa muyayaya.

Ni shani fintu abana bayankwileko? Abengi balilangishe ubuseko bwine bwine mu mbila nsuma ya Bufumu bwa kwa Yehova. Mu kupita kwa nshita, Seymore atendeke ukutungulula amasambililo ya Baibolo ku bana be sukulu 13. Balikwete ubuseko ubukalamba ica kuti batantike ukulasambilila Baibolo imiku ibili mu mulungu umo. Lyena abengi aba bene balitendeke ukusangwa ku kulongana kwa Bwina Kristu ku Ŋanda ya Bufumu iya Nte sha kwa Yehova. Ukufika pali ino nshita pali abo 13 paliba 9 abaipeela no kubatishiwa ukuba Inte sha kwa Yehova. Kumfwa kuli Seymore, nomba afishapo bukapyunga bwakwe ukupitila mu kubomba bupainiya bwa nshita yonse kabili ni eluda muli cimo ica filonganino fya Nte sha kwa Yehova mu Barbados.

Ici cili ca kumwenapo fye cimo ica fintu Inte sha kwa Yehova ukupulinkana icalo conse ‘babombo mulimo wa bukabila bwa mbila nsuma,’ inshila imo iyaba kupitila mu bunte bwa mu lyashi. Bakonka ukukonkomesha kwa mu Baibolo ukusangwa pa Abena Kolose 4:5, 6, apasoso kuti: “Mwende aba mano ku ba ku nse; mube ababomfye nshita; ilyashi lyenu libe pe ilya kusenamina, ilyalungwamo umucele, ukuti mwishibe ifyo mufwile ukwasuko muntu no muntu.”