Tulakabila Ifibusa fya Cine

JENNY na Sue balelande lyashi mu kucincimuka. Balemwentula, amenso yalebeka—conse ico balecita cilelangilile fyo umo na umo nayangwako mu kushika mu cintu umubiye alesosa. Nangu ca kuti ifikulilo fyabo fyalipusana, mu kushininkisha kwaliba ifintu fimo ifyo bonse babili basekelamo kabili balicindikana nga nshi.

Kumbi na ko, Eric na Dennis balebombela capamo pa mulimo umo, umo uwa milimo baabombelapo capamo pa myaka iingi. Bali abakakuka, kabili cili icayanguka ukuseka. Ilyo ukulanshanya kwasanshamo imilandu yakakala, mu kufumaluka balanshanya imimwene ya umo na umo. Balicindikana. Kwati ni Jenny na Sue, Eric na Dennis baba fibusa fya cine cine.

Ubu bulondoloshi kuti pambi bwakafya umutima obe, ukukulenga ukutontonkanya pa lwa fibusa fyobe nobe. Lubali lumbi, kuti bwakulenga ukufuluka bucibusa bwa musango yo. Na iwe wine kuti wabukwata.

Umulandu Tukabila Ifibusa fya Cine

Bucibusa ubusuma bulakabilwa pa kuti ubutuntulu bwesu ubwa ku muntontonkanya na ku mubili bube bwino. Ico, nangu cibe fyo, tacilepilibulo kuti ilyo twayumfwa abatalalilwa ninshi pali icilubene. Bakasapika bamo batila ukutalalilwa kwaba ni nsala, icilangililo ca cifyalilwa ica kuti tulekabila ukubishanya. Kwena, kwati fye fintu ifilyo ficefyako insala nelyo ukuifumyapo, bucibusa busuma kuti bwacefyako nelyo fye ukufumyapo ukutalalilwa. Ukulundapo, ukukwata ifibusa ifyatutemwisha te cintu icishingacitika.

Abantunse babumbilwe no kukabila kwa kubishanya. (Ukutendeka 2:18) Baibolo isoso kuti cibusa wa cine, nelyo uwa kubishanya nankwe, “afyalilwo kumanama.” (Amapinda 17:17) Muli fyo, ifibusa fine fine balingile ukwipushanya ku kulombo kwaafwa lintu kwakabilwa. Lelo bucibusa bwalicila pa kukwata fye umuntu wa kwalukilako ku kwaafwa nelyo uwa kubishanya nankwe uwa ku ncito fye nelyo pa kwangala. Ifibusa fisuma filenga umo no munankwe ukulundulula imibele yawamisha. Amapinda 27:17 yatila: “Icela cinone cela, no muntu anone cinso ca mubiye.” Kwati fintu icela cingabomfiwa ku kunona ica kuputwilako na co icapangwa ne cela, e fyo na cibusa umo engatunguluka ukunona ukulamuka ne mibele ya ku mupashi iya umbi. Lintu twalengwe nsoni ku cintu cimo kabili twapopomenwa, imiloleseshe ya kulangulukilako no kukoselesha kwa mu Malembo ukwa kwa cibusa kuti fyaba fya kusumbamo.

Muli Baibolo, bucibusa bwalundanishiwa ku kutemwa, ukubeleshanya, ukucetekelana, ukubishanya. Bucibusa kuti bwaba pa kati ka bena mupalamano, aba ku ncito, na bambipo. Bambi na bo bamona na balupwa babo bamo bamo ukuba fibusa fyapalamisha. Nangu cibe fyo, ilelo, abengi balacisanga icakosa ukusanga no kusungilila ifibusa. Mulandu nshi cabele fyo? Bushe kuti waipakisha bucibusa bwa cine kabili ububelelela?