Sefya Icibukisho mu Musango Wayana

CALI ni pa cungulo ca pa Nisani 14, 33 C.E., e lyo Yesu aimike Icibukisho.a E lyo apwishishe fye ukusefya Ica Kucilila na batumwa bakwe 12, kanshi te kuti tutwishike pa lwa bushiku. Pa numa ya kufumyamo shikamfutu, Yuda, e lyo Yesu ‘abuulile umukate no kupaala, alimokawile, no kupeela kuli bene, ati, Buuleni, ici mubili wandi. Abuulile no lukombo, kabili ilyo atooteele, apeele kuli bene, na bonse banwenemo; kabili atile kuli bene, Ici mulopa wandi wa cipingo, uuleitililwa abengi.’—Marko 14:22-24.

Yesu akambishe abasambi bakwe ukulaibukisha imfwa yakwe pa mulandu wa kucindama kwa iko. (Luka 22:19; 1 Abena Korinti 11:23-26) Imfwa yakwe yali fye e imo iingalubula umutundu wa buntunse ukufuma ku citiipu ca lubembu lwapyanwa ne mfwa. (Abena Roma 5:12; 6:23) Umukate no mwangashi fintu abomfeshe fyali fimpashanya fya mubili wakwe uwapwililika no mulopa. Ukwishibo bushiku ici ca kucitika caimikwe, kuti twacisefya pa bushiku bwayampanako cila mwaka, kwati fye ni fintu Ica Kucilila ca ciYuda calesefiwa. Lelo tufwile ukusefya mu musango wayana. Mulandu nshi?

Umutumwa Paulo atile abo balelyako ku fimpashanya fya mukate no mwangashi bali no “[kulabile] mfwa ya kwa Shikulu akasuke esa.” (1 Abena Korinti 11:26) Ico ukusefya kuli no kutontomeshapo kanshi cili no kuba ni mfwa ya kwa Yesu na fintu ipilibula ku mutundu wa muntu. Akashita kali no kuba akakatama, inshita ya kubelebesha pa busuma bwa kwa Lesa na pa kutesekesha uko tulingile ukukwata ukulola kuli Yehova na ku Mwana wakwe. (Abena Roma 5:8; Tito 2:14; 1 Yohane 4:9, 10) E mulandu wine kanshi, Paulo asokeele ukuti: “E ico uukalyo mukate napamo akanwena mu lukombo lwa kwa Shikulu mu musango uushiyene, akaba no mulandu ku mubili no mulopa wa kwa Shikulu.”—1 Abena Korinti 11:27.

Mu Musango Uwayana—Shani?

Ukwabulo kutwishika, Lesa tengatemwa nga twasaalula aka kashita pa kuipoosa mu fibelesho fyatwishikwa nelyo ukupitila mu kupokelela imyata ya cisenshi. (Yakobo 1:27; 4:3, 4) Ici te kuti cisuminishe ukusanshamo ifya kucitika fyaishibikwa ifya pa nshita ya Isita. Mu kukonka ukukambisha kwa kwa Yesu ukwa ‘kucite ci ku kumwibukisha,’ kuti twafwaya ukusefya Icibukisho nga fintu fye aciimike. (Luka 22:19; 1 Abena Korinti 11:24, 25) Ici tacingasuminisha iminkofyonkofyo iyasanshiwa ku kusefya na macalici ya Kristendomu. New Catholic Encyclopedia ilasumino kuti “Iminsa ya lelo yalipusanako nga nshi ku mutebeto wayanguka nga nshi uwakonkelwe na Kristu na Batumwa Bakwe.” Kabili pa kulasefya iyi Minsa libili libili, no kulasefya fye na cila bushiku, Kristendomu alipaasukako ku cintu Yesu afwaile kabili alicicita ukuba ca kucitika ca munsaunte.

Paulo alembele Abena Kristu ba ku Korinti pa lwa kulyako mu musango uushayene pa mulandu wa kuti kwalimine ubwafya mu cilonganino ukulosha ku Mulalilo wa kwa Shikulu. Bamo tabacindike ukushila kwa uko. Balesenda ica kulya cabo ica mulaalilo ukufuma ku myabo no kulya pa ntanshi nelyo mu kati ka kulongana. Ilingi line balelya no kunwa mu kucishamo. Ici calelenga ukuti baleshipula no kufubalisha amano yabo. Pa kukanaba abaibukila ku muntontonkanya na lwa ku mupashi, baali ‘abashingashininkisho mubili’ na muli fyo baali no “mulandu ku mubili no mulopa wa kwa Shikulu.” Pa nshita imo ine, abo bashalile umulaalilo ku myabo baali ne nsala kabili balepusaulwa. Ni cikanga cibe fye ukuti takwali nangu umo uwali mu mibele ya kulyako ifimpashanya mu kuba no kutesekesha no kwishiba ukukatama kwa kalya kashita—ukuti ukusefya kwali mu kwibukisha imfwa ya kwa Shikulu. Ici cafuminemo bene ukupingulwa, pantu balelanga ukubulwo mucinshi, nangu fye imisuula kuli kwene.—1 Abena Korinti 11:27-34.

Ukuilingulula Kulakabilwa

Bamo balilyako ifimpashanya fya pa Cibukisho, nangu ca kuti, pa numa, baishileiluka ukuti nga tabalelyako. Abo mu kulinga balyako ifimpashanya fya pa Cibukisho balisalwa na Lesa kabili balikwata ubunte bwa mupashi wa kwa Lesa ubwa kushininkishe co. (Abena Roma 8:15-17; 2 Abena Korinti 1:21, 22) Tacaba kupingulapo kwa pa lwabo nelyo umupampamina uubalenga ukuba abalinga. Lesa alipelesha impendwa ya abo abakateka na Kristu mu myulu pali 144,000, impendwa iyo mu kwampanako yaba iyacepako lintu yalinganishiwa na abo bonse abamwenamo mu cilubula ca kwa Kristu. (Ukusokolola 14:1, 3) Ukusala kwatendeke mu kasuba ka kwa Yesu, kanshi kuti caba ukuti ilelo kwaba fye abalyako abanono. Kabili lintu bamo aba muli bene balesendwa mu mfwa, iyo mpendwa ilingile ukulacepelako.

Mulandu nshi umo mu kuluba engaliilako ifimpashanya? Kuti pambi caba pa mulandu wa mimwene ya kuntu alepepa akale—ukuti aba busumino bonse balaya ku muulu. Nelyo kuti pambi caba pa mulandu wa kuituntumba nelyo akaso—ukuyumfwa kwa kuti umuntu umo ali uwalinga ukucila bambi—e lyo no kufwaisha ukulumbuka. Nakalimo ni pa mulandu wa nkuntu shakosa ishiisa ukufuma ku mafya yabipisha nelyo ubusanso ifilenga umo ukukanasekelela mu bumi bwa pe sonde. Kuti na kabili caba pa mulandu wa bucibusa bwapalamisha na umo uwaba no bwite bwa ku muulu. Ifwe bonse tulekabila ukwibukisho kuti ukupingulapo kwa kwa Lesa fye eka, te kwesu iyo. (Abena Roma 9:16) E co nga ca kuti umuntu, ‘pa numa ya kuilingulula,’ asango kuti mu cituntulu tafwaikwe ukulalyako ku fimpashanya, nomba alingile ukuleka.—1 Abena Korinti 11:28.

Isubilo ilyo Lesa aabika pa ntanshi ya bengi aba mutundu wa muntu lya bumi bwa ciyayaya pe sonde lya paradise. Ilyo lyaba lipaalo ilikalamba nga nshi ilya kwenekela, kabili ilyo ilitukumako mu kwanguka. (Ukutendeka 1:28; Ilumbo 37:9, 11) Cikaba ni pe sonde e po aba busumino bakalundana cipya cipya na batemwikwa babo abakabuushiwa no kukumanya abalungami aba kale, pamo nga Abrahamu, Sara, Mose, Rahabu, Davidi, na Yohane Kabatisha—bonse bene abafwile ilyo Yesu talaisule nshila ya ku bumi bwa ku muulu.—Mateo 11:11; linganyako 1 Abena Korinti 15:20-23.

Abo bakwata amasubilo ya pe sonde balasefya Umulalilo wa kwa Shikulu mu musango wayana ukupitila mu kusangwako no kukutikisha mu mucinshi, nangu line tabalyako ku mukate no kunwako umwangashi. Na bo bene balanonkelamo mwi lambo lya kwa Kristu, icibalenga ukuba no kwiminina kwasenaminwa pa ntanshi ya kwa Lesa. (Ukusokolola 7:14, 15) Ilyo balekutika ku lyashi ililepeelwa, ukutesekesha kwabo ukwa fintu fyashila kulakoshiwa, kabili ukufwaisha kwabo ukwa kwikalilila mu kwikatana na bantu ba kwa Lesa kulakula.

Uno mwaka, pa numa ya kuwa kwa kasuba pali Cibili, April 2, Icibukisho cikasefiwa mu filonganino fyonse ifya Nte sha kwa Yehova ifyacila pali 78,000 mu kusaalala kwe sonde. Bushe ukasangwako?

[Amafutunoti]

[Icikope pe bula 8]

Inte sha kwa Yehova shisefya Icibukisho limo cila mwaka