Lesa, Ubuteko, na Iwe
“Icalici no Buteko Fyashokana mu Kusala kwa Kumona Abalesuminisha Ukulekana mu Ireland”
UYU mutwe wa muli The New York Times ulelangilila ifyo abantu ilelo bengalolenkana no kusalapo pa kati ka cilefwaya Ubuteko na cintu icalici lyabo lisambilisha.
Ici cipande calondolwele ukuti: “Ilyo kushele fye inshiku sha kupenda ishishifikile na ku mweshi umo pa kuti kubeko ukusala kwa kumona abalefwaya ukufumyapo ifunde libinda ukulekana, Ireland afulishamo baRoma Katolika alemona ukukangana ukushimonaika umo intungulushi sha mu Buteko ne sha mwi calici shileshokana.” Ubuteko bwatubulwile ukuti icibindo ca kulesho kulekana cifumishiwepo, ilintu Icalici lya Katolika mu kukosa lilasenuka ukulekana no kuupa nelyo ukuupwa cipya cipya. BaKatolika ba ku Ireland baali no kusalapo nga kukonka Icalici nelyo Ubuteko. Umwabela ifintu, Ubuteko bwacimfishe fye na mavoti ayanono.
Icacishanapo, pa myaka iingi abantu ba mu Northern Ireland balolenkene no kukansana kwakaluka ukukuma ku lwa mitekele ya calo. Abengi balipaiwa. BaRoma
Katolika na baProtestanti bakwata imimwene ipinkana ukukuma ku Buteko bali no kunakilako: Northern Ireland ukutwalilila ukutekwa na Britain nelyo Ireland onse ukuputukako no kuikwatila ubuteko bwakwe.
Mu kupalako, mu cali kale Yugoslavia, bakateka baafwaya abantu ba fisumino fyapusanapusana, ukusanshako baKatolika na baOrthodox, ukulwa mu bulwi bwa kulwila impanga. Ukukuma ku bekala calo yaweyawe, cinshi cali ukukakililwako kwabo ukwa ntanshi? Bushe baali no kukonka abatungile ukwimininako Ubuteko, nelyo bushe baali no kumfwila Lesa, uusosa ati: “Wilatala misoka . . . Uletemwo mubiyo nga we mwine”?—Abena Roma 13:9.
Kuti pambi watontonkanya ukuti imibele ya musango yu tayakatale aikwambukila nakalya. Lelo kuti yakwambukila. Na kuba, nangu fye ni nomba kuti yakwambukila. Mu citabo cakwe The State in the New Testament, uwasoma ifya mipepele Oscar Cullmann alando lwa “kupingulapo kubimbamo ubumi ne mfwa uko Abena Kristu ba pali ndakai bapatikishiwa nelyo balombwa ukupingulapo mu mibele yaafya nga nshi lintu batiinishiwa na mabuteko ya culukusu.” Nangu cibe fyo, na kabili alando lwa “cishingamo ca cine cine kabili icacindama apakalamba ica Mwina Kristu onse—na ku Mwina Kristu uuleikala mu mibele itwa imibele ya ‘cifyalilwa’ ‘iya lyonse’—ica kulolenkana no kubomba no bwafya bwakakala ubo akumanya pa mulandu wa kuti wene Mwina Kristu.”
E co bushe Abena Kristu ilelo balingile ukuba abasekelela mu kwampana kwa mipepele no Buteko? Mu cine cine balingile. Ukutula na kale na kale, Abena Kristu balyesha ukulundulula imimwene yashikatala ukukuma kuli bakateka ba ku calo. Intungulushi yabo, Yesu Kristu, alipingwilwe, ukusenukwa, no kuputunkanishiwa ku Buteko bwa ciRoma. Abasambi bakwe baali no kusenda bwino ukukakililwako kwa Bwina Kristu ne milimo yabo ku Buteko bwa ciRoma. Ukupituluka mu kwampana kwabo na bakateka kanshi, kwalapayanya ifya kutungulula Abena Kristu ilelo.
[Abatusuminishe Ukubomfya Icikope pe bula 3]
Tom Haley/Sipa Press