Baacitile Ukufwaya kwa kwa Yehova

Petro Ashimikila pa Pentekoste

IMICEELE yali iyatekanya ulucelo lumo muli shinde wa mu mwaka wa 33 C.E. Kali kashita kaisulamo ukucincimuka! Mu misebo ya mu Yerusalemu mwalemaŋanya fye abaYuda ne nsangu. Bafumine ku fifulo pamo nga Elamu, Mesopotamia, Kapadokia, Egupti, na Roma. Fintu cali ca kusekesha ukubamona nabafwala ifya kufwala fya ku myabo no kumfwa indimi shabo ishalekanalekana! Bamo baendele amakilomita mupepi na makana yabili ukuyasangwa kuli ici cintu caibela. Cinshi ci cine? Pentekoste—umutebeto wa ciYuda uwa kusekelela uwa kwishibisha impela ya kulobolola barle.—Ubwina Lebi 23:15-21.

Icushi calefutumuka ukufuma ku malambo ya pa cipailo ca pe tempele, na bena Lebi baleimba amalumbo ya Hallel (Amalumbo 113 ukufika ku 118). Ilyo fye 9 koloko ya lucelo ishilalila, icintu cimo ica kupapusha calicitike. Kwali “iciunda kwati cipupu cikali ca mwela” ukufuma ku muulu. Caiswile iŋanda monse umwalongene abasambi ba kwa Yesu Kristu 120. Ubulondoloshi bwa mu Malembo butila: “Kuli bene kwamoneke indimi ishabe misasatwe kwati sha mulilo, no kwikala pali bonse umo umo. E lyo bonse baiswilemo Umupashi wa mushilo, batendeke no kulandila mu ndimi shimbi ifyo Umupashi wabapeele ukulanda.”—Imilimo 2:1-4.

Onse Aleumfwa mu Lulimi Lwakwe Lwine

Mu kwangufyanya, abasambi abengi baalefuma mu ŋanda. Ku ca kupapusha, balelanda mu ndimi shalekanalekana isha bali mwi bumba! Elenganyeni ifyo cali ca kupapusha lintu umutandashi ukufuma ku Persia no mukaya wa ku Egupti baumfwile indimi shabo shilelandwa ku bena Galili. Cine cine ibumba lyalipeshiwe amano. Baipwishe abati: “Nga kanshi ici calola mwi?” Bamo batendeke ukupumya abasambi, abati: “Nabakolwe citooto.”—Imilimo 2:12, 13.

Mu kukonkapo umutumwa Petro alimine no kulanda ne bumba. Alondolwele ukuti ici ca bupe ca cipesha amano ica ndimi cali kufikilishiwa kwa bulayo bwa kwa Lesa ubo alaile ukupitila muli Yoele kasesema ukuti: “Nkapongolwelo mupashi wandi pa bantunse bonse.” (Imilimo 2:14-21; Yoele 2:28-32) Ee, Lesa e lintu fye apongolwelele umupashi wakwe uwa mushilo pa basambi ba kwa Yesu. Ubu bwali bushininkisho bwine bwine ubwa kuti Yesu alibuushiwe ku bafwa no kuti nomba aali mu muulu ku kulyo kwa kwa Lesa. Petro atile: “E ico lekeni bonse aba ŋanda ya kwa Israele beshibe bwino bwino, ukuti, Yesu uo imwe mwatanike, Lesa acita wene Shikulu kabili Kristu.”—Imilimo 2:22-36.

Bushe abalekutika bayankwileko shani? ‘Calibapitile ku mutima,’ e fisosa ubulondoloshi, “basosele na kuli Petro na batumwa babiye, abati, Mwe bamunyinefwe, tulecita shani?” Awe Petro atile kuli bene: “Lapileni, no kubatishiwa.” Mupepi na bantu 3,000 e fyo baacitile! Pa numa ya ico, “balecincila mu kusambilisha kwa batumwa.”—Imilimo 2:37-42.

Ukupitila mu kutungulula mu kulanda pali aka kashita kakatama, Petro abomfeshe ulwa kubalilapo pa “mfungulo sha bufumu bwa mu muulu” isho Yesu alaile ukumupeela. (Mateo 16:19) Aya makii yaiswilile amabumba ya bantu yapusanapusana amashuko yaibela. Amakii ya kubalilapo yalengele ukuti abaYuda babe Abena Kristu basubwa no mupashi. Mu kupita kwa nshita, amakii ya cibili na ya citatu yalengele ili shuko limo line ukufika ku bena Samaria na Bena fyalo.—Imilimo 8:14-17; 10:44-48.

Isambililo Kuli Ifwe

Nangu ca kuti ili bumba lya baYuda ne nsangu balishingemweko ukushingamwa kwa mu bwikashi pa mfwa ya kwa Mwana Lesa, Petro abetile no mucinshi ati “bamunyinefwe.” (Imilimo 2:29) Ubuyo bwakwe bwali bwa kubakunta ukuti balapile, te kubasenuka. E co, iyi nshila yali iisuma. Alilangishe ifishinka no kufitungilila ku kwambula Amalembo.

Abashimikila imbila nsuma ilelo kuti caba bwino ukukonka ica kumwenapo ca kwa Petro. Balingile ukwesha ukwimika icishinka ca kusuminishanyapo na balebakutika kabili lyene ukwesha mu mucenjelo ukupelulula na bene ukufuma mu Malembo. Lintu icine ca mu Baibolo calondololwa mu nshila isuma, aba mitima yalungama bakankulako.—Imilimo 13:48.

Ukupimpa kwa kwa Petro no kushipa kwakwe pa Pentekoste fyalipusaninineko no kukaana kwakwe Yesu imilungu fye 7 iyabangilileko. Pali kalya kashita Petro ali ngo waikatwe canshi ku kutiina umuntu. (Mateo 26:69-75) Lelo Yesu alilombeeleko Petro. (Luka 22:31, 32) Ukwabulo kutwishika, filya Yesu amonekele kuli Petro pa numa ya kubuushiwa kwalikoseshe uyu mutumwa. (1 Abena Korinti 15:5) Icafuminemo ca kuti, icitetekelo ca kwa Petro tacabongolweke. Mu kashita fye akepi, aleshimikila mu kushipa. E co, lyene, ashimikile pa Pentekoste no kutwalilila ukufika fye ne mfwa yakwe.

Ni shani nga ca kuti twalilufyanyapo fimo, nga fintu fye Petro acitile? Lekeni tulapile, ukupepela ukulekelelwa, no kubombelapo pa kuti tupokelele ukwaafwa kwa ku mupashi. (Yakobo 5:14-16) Lyene kuti twatwalilila mu kuba no kucetekela kwa kuti umulimo wesu uwashila ulepokelelwa kuli Shifwe wa ku muulu uwa nkumbu, Yehova.—Ukufuma 34:6.