Ukusha Ifingi ku Kusanga Ifyafulilako

NGA FINTU CASHIMIKWA NA JULIUS OWO BELLO

Pa myaka 32 nali nine Aladura.a Nacetekele ukuti ukundapa kwa mu citetekelo na mapepo fyali no kupwisha amafya yandi no kundapa amalwele yandi yonse. Nshaleshita imiti, nelyo fye ya kutontololako ubukali. Muli yo myaka, tapali nangu umo mu lupwa lwandi uwatalile atekwapo mu cipatala. Nga ca kuti uuli onse pa bana bandi alwala, nalebapepela akasuba no bushiku ukufikila bapola. Nacetekele ukuti Lesa aleyasuka amapepo yandi no kumpaala.

NALI mu kabungwe ka Egbe Jolly, akalabu ka kwangalila pamo akalumbuka nga nshi mu Akure, itauni lyabela ku masamba ya Nigeria. Ifibusa fyandi baali e bakwatishe fyuma kabili aba maka mu bwikashi bwesu. Deji, imfumu ya Akure, aleisa ilingi line mu kwiisha na ine ku myandi.

E lyo nali uwa mpali, nakwete abakashi 6 na bakanakashi abafulilako. Ubukwebo bwandi bwaleenda bwino. Fyonse fyalengwamina. Lelo, ukupala umuntu wa makwebo mu mulumbe wa kwa Yesu uwa margariti, nasangile icintu cauma umutengo nga nshi ica kuti nalilekele abakashi bandi basano, bakanakashi bandi, nalifumine mu calici, mu kalabu ka kwangalila pamo, no kusuulako ku kulumbuka kwa ku calo ku kusanga uyo margariti.—Mateo 13:45, 46.

Ifyo Naishileba Aladura

Umuku wa kubalilapo naumfwile ulwa baAladura cali mu 1936, lintu nali ne myaka ya bukulu 13. Cibusa we shina lya Gabriel anjebele ukuti: “Nga wayako ku calici lya Christ Apostolic Church, ukomfwa uko Lesa alelanda.”

Namwipwishe nati: “Bushe Lesa alanda shani?”

Atile: “Ukese, ukesaimwena.”

Nalefwaisha ukukutika kuli Lesa. E co ubushiku, naile na Gabriel ku calici. Ici cikuulwa cinono caiswilemo bakapepa. Icilonganino conse catendeke ukwimba ati: “Iseni, iseni bonse! Yesu ni kuno ali!”

Ilyo baleimba, umo alibilikishe ati: “Isa, mupashi wa mushilo!” Umo alilishishe inyenjele, ne cilonganino catalele tondolo. Ukukonka pali co, umwanakashi alisemwike no kubulubusa mu lulimi ulweni. Mu kupumikisha apundile ati: “Kutikeni ubukombe bwa kwa Lesa, mwe bantu! Lesa atila: ‘Mupepeleko abalunshi pa kuti belaipaya abantunse!’” Bonse muli co cifulo balisemwike.

Nalicetekele nati Lesa alandile ukupitila muli ulya mwanakashi, e co umwaka wakonkelepo nalibatishiwe ukuba icilundwa ce calici lya Christ Apostolic Church.

Ukukumana kwa Kubalilapo ne Nte sha kwa Yehova

Mu 1951, nalipokeleko magazini wa Ulupungu lwa kwa Kalinda ukufuma kuli Nte umo uwe shina lya Adedeji Boboye. Mwali fisuma muli magazini, e co nalilembeshe kabili naleibelenga lyonse. Mu 1952, nalisangilwe kwi bungano lya citungu ilya Nte sha kwa Yehova mu Ado Ekiti.

Ico namwene kwi bungano calinsekeshe nga nshi. Nalitontonkenyepo mu kushika pa lwa kusanguka umo uwa Nte sha kwa Yehova lelo nalisuulileko. Ubwafya bwa kuti pali ilya nshita nakwete abakashi batatu na kanakashi umo. Natontonkenye fyo teti njikale no mukashi umo fye mpo.

Lintu nabwelelemo ku Akure, naebele Adedeji ukuleka ukuntandalila, kabili nshalembeshe cipya cipya Ulupungu lwa kwa Kalinda. Natendeke ukubombesha sana mu calici lyandi. Nalepelulula nati, na kabushe, Lesa alimpaala ukutula apo naingilila mwi calici lya Christ Apostolic Church. Nalyupa abakashi batatu no kufyalamo abana abengi. Naliikulila iŋanda. Nshatala ntekwapo mu cipatala. Apantu calemoneke fyo Lesa aleyasuka amapepo yandi, mulandu nshi uwa kuila mu kupepa kumbi?

Ukulumbukilako Capamo no Kufiitwa

Natendeke ukusangula indalama ishingi ku calici. Mu kwangufyanya bancitile ukuba eluda wa mu calici, icifulo ico canengele ukumona ificitika mu kati na nkati ake calici. Fintu namwene fyalinsakamike. Pasita na “bakasesema” balitemenwe ndalama; ubufunushi bwabo bwalintulumwishe.

Ku ca kumwenako, mu March 1967 abakashi bandi batatu balimfyalile abana batatu. Umwata mu calici wali wa kukwata ukusefya kwa kwinika umwana ishina. E co natwele ifya bupe kuli pasita—isabi, ifya kunwa fya ndimu, ne fya kunwa fyatalala—ku kupekanishisha ukusefya.

Pa bushiku bwa kuya ku kupepa, pasita pa cintamba asosele ku lukuta lonse ati: “Abantu ba fyuma muli lino icalici nabampapusha. Balefwaya ukukwata ukusefya kwa kwinike shina, e lyo baleta fye ifya kunwa fyatalala ne sabi. Apabule nama! Apabule mbushi batini! Kaini apeele Lesa ilambo lya mumbu, lelo Lesa tapokelele lilye lambo apantu tapali ica mulopa. Lesa afwaya utwa mulopa. Abele aletele nama, ne lambo lyakwe lyalipokelelwe.”

Pa kumfwe fyo, nalimine no kufumpukamo. Nangu cali fyo, nshalekele ukuya ku calici. Nalepoosa inshita yakulilako ukwangala no kusangwa ku kukumana kwa kalabu ka kwangalila pamo. Inshita shimo nalesangwako ku kulongana ku Ŋanda ya Bufumu, kabili nalilembeshe Ulupungu lwa kwa Kalinda cipya cipya. Nangu ni fyo, nali ncili nshilaipekanya ukusanguka umo uwa Nte sha kwa Yehova.

Ukupingulapo Ukubombela Yehova

Mu 1968 e lyo nafikile apa kwalukila. Ubushiku bumo natendeke ukubelenga icipande mu Ulupungu lwa kwa Kalinda icalelondolola ukupakaswa kwa bukatu ukwa Nte sha kwa Yehova mu Malawi. Icipande calandile pa lwa mukashana wa myaka ya bukulu 15 uwakakililwe ku cimuti no kucendwa imiku 6 pa mulandu wa kukaana ukunasha icitetekelo cakwe. Pa kuba uwatulumushiwa nga nshi, nalilekele ukubelenga uyu magazini, lelo natwalilile ukutontonkanyapo. Naishiletontonkanya nati takuli umukashana nangu umo mu calici lyandi uwingalangisha icitetekelo ca musango yu. Pa numa cilya cine cungulo, nalibuulile magazini na kabili no kubelenga.

Nalitendeke ukusambilila Baibolo kabili nalikoselepo. Ilyo naleya ndeishibilako fimbi, natendeke ukumona ifyo icalici lyaletulufya. Nga fintu cali ku numa, bashimapepo besu ‘balecita bucisenene.’ (Hosea 6:9) Abantu ba musango yo baba pa kati ka bakasesema ba bufi abo Yesu asokelepo! (Mateo 24:24) Nalilekele ukucetekela mu fimonwa fyabo ne fya maka. Napingwilepo ukuputukako ku kupepa kwa bufi no kwaafwa bambi ukucite fyo fine.

Ukweshaesha kwa Kunkoselesha Ukukanafuma mu Calici

Lintu baeluda ba mu calici bailwike fyo napampaminepo fye ukufuma mu calici, batumine abantu ukwisampaapaata. Tabalefwaya uwalesangula indalama ishingi ukuya. Banjebele fyo bali no kuncita Baba Egbe, umukalamba wa limo ilya macalici ya Christ Apostolic mu Akure.

Nalikeene no kubeba umulandu nakaanine. “Icalici lyalitubepa,” e fyo nasosele. “Batila abantu basuma bonse bakaya ku muulu. Lelo nalibelenga Baibolo, kabili nalishininwa nati bantu fye 144,000 e bakaya ku muulu. Abalungama bambi bakekala muli paradise pe sonde.”—Mateo 5:5; Ukusokolola 14:1, 3.

Pasita aeseshe ukuti abakashi bandi banjalukile. Abebele ukulesha Inte sha kwa Yehova ukwisa pa ŋanda. Umo pa bakashi bandi alimbikile sumu mu fya kulya. Babili aba bene balinsokele pa lwa cimonwa bamwene mu calici. Icimonwa calangishe fyo nga nafuma muli li calici nali no kufwa. Te mulandu ne fyo, natwalilile ukushimikila ku bakashi bandi, ukubalaalikako ukusangwa ku kulongana na ine. “Kuti mwasangako na bambi abaupa kulya,” e fyo nasosele. Nangu ni fyo, tapali na umo uwasekelele, kabili bakonkenyepo fye ukwesha ukumfuupula.

Mu kupelako, pa February 2, 1970, lintu nabwelele ukufuma ku lwendo lwa kwi tauni lya mu bwina mupalamano, nasangile iŋanda cipompa. Abakashi bandi bonse balifulumwike basenda na bana.

Ukulambatila ku Mukashi Umo

Natontonkenye nati, ‘Nomba kuti natambalika imibele yandi iya cupo.’ Naebele umukashi wandi Janet, uwali mukolo, ukubwela. Alisumine. Nangu cibe fyo, abafyashi bakwe balikaaninine ndai. Lintu abakashi bandi bambi baishibe ukuti nalyebele Janet ukubwela, baile ku ŋanda kuli wishi no kwesha ukumupuma. Abafyashi bakwe lyene balinjitile ku kukumana.

Pali uku kukumana pasangilwe abantu napamo 80. Wishi mwaice kwa Janet, uwali umutwe wa lupwa, atile: “Nga ulefwaya ukubwesha umwana wesu, ninshi uli no kubwesha na balya banakashi bambi. Lelo nga ulefwaya ulepepa uku kwine wile no kwikala no mukashi umo, lyene ufwile ukufwaya umbi uwa kuupa. Nga wabwesha Janet, abakashi bobe bambi bakamwipaya, kabili tatulefwaya umwana wesu akafwe.”

Pa numa ya kulanshanya kwalepa, ulupwa lwailwike ukuti napampamine pa kukwata fye umukashi umo. Kwi pelepele balinakileko. Wishi mwaice atile: “Tatwakupoke umukashi obe. Kuti wamusenda.”

Pa May 21, 1970, ine na Janet twalilembeshe icupo ku buteko. Pati papite fye inshiku 9 nalibatishiwe ukuba umo uwa Nte sha kwa Yehova. Umwaka umo wine mu December, Janet na o wine alibatishiwe.

Ukuipakisha Ipaalo lya kwa Yehova

Abo twali na bo mu calici kale baseseme ukuti nga twasanguka Inte, twali no kufwa. Nomba papita imyaka mupepi na 30. Nelyo nga nafwa nomba, bushe kuti caba pa mulandu wa kuti nasangwike umo uwa Nte sha kwa Yehova? Bushe umukashi wandi nga afwa nomba, bushe uuli onse kuti atila ni pa mulandu wa kuti asangwike umo uwa Nte sha kwa Yehova?

Nalishomboka ukulanga abana bandi 17 inshila ya ku cine. Nangu ca kuti abengi bali bakalamba kale kale ilyo nasangwike Inte, nalibakoseleshe ukusambilila Baibolo no kubasendako mu kulongana na ku mabungano. Nalisekelela nga nshi ukumona basano aba bene balebombela Yehova pamo na ine. Umo tubomba nankwe nga baeluda mu cilonganino cimo cine. Umbi na o mubomfi utumikila mu cilonganino ca mu bwina mupalamano. Babili ni bapainiya ba nshita yonse.

Nga nalolesha uko nafuma, ndasunguka pa cikuuku ca pa fye ica kwa Yehova pa kungafwa ukusanguka umubomfi wakwe. Fintu yaba aya cine amashiwi ya kwa Yesu aya kuti: “Takuli uwingesa kuli ine, kano Tata uwantumine amukula”!—Yohane 6:44.

[Futunoti]