“Ndi pa Kati ka Bantu Abengi abo Mwayafwile”

KU Numa mu January 1996, Carol alilwele mumena wa kuli bongobongo. Aali muli ba60 kabili ukufika fye pali iyo nshita lyonse aali umwanakashi wa nsansa, uwa mapiki uwalekoselesha uuli onse. Lelo nomba badokota baleshomboka ukundapa mumena wa kulenge mfwa. Ilyo aleshikila, Carol apokelele kalata wakonkapo:

“We mutemwikwa Carol:

“Ndi uwa bulanda nga nshi pa lwa kulwalilila kwenu. Ku ca buseko, twalikwata isubilo line line ilyo Baibolo itwaafwa ukwishiba no kutemwa. Ili subilo lya kuti Ubufumu bwa kwa Yehova buli no kuteka isonde pa kuti twingekala mu mibele ya paradise, inshita iyo bonse tupembelela.

“Ndefwaya ukumwishibisha ukuti umulimo wenu uo mwaleshimikila walipuswishe abantu abengi ku mfwa ya ciyayaya. Ndi umo uwa aba bantu. Nshishibe nga muleibukisha umuku wa kubalilapo twakumene. Pali ilya nshita nali fye ne myaka 20. Nali ne cunsu, naleshitisha imiti ikola, kabili naleenda ne ntalamisoka. Bonse twaleenda ne mfuti kabili tatwatemenwe uuli onse ukutemwa kwine kwine kano fye ukuitemwa fwe bene.

“Mwalikonkweshe pa ciibi candi na Nte umbi no kuntambika Ulupungu lwa kwa Kalinda na Loleni! Naeseshe ukumupeela dola umo no kusoso kuti nshilefwaya bamagazini. Mwanjebele ifyo tamwalelombelesha indalama. Mwatile mwalebomba umulimo wa kwaafwa abantu ukubelenga Baibolo. Nshileibukisha nga ca kuti nalipokele bamagazini nelyo ukubabelenga. Nangu cibe fyo, mwalilimbile ulubuto lwa cine mu bumi bwandi.

“Ilyo papitile imyaka iyafulilako Nte umbi, Gary, alishile ku ŋanda ya bamayo ninshi na ine e po ndi. Nalimwebele pa lwa kutandala uko mwantandalile imyaka imo ku numa. Gary alisambilile Baibolo na ine pa nshita ntali ukufikila mu kupelako nabatishiwe mu 1984. Nomba ndesambilisha abana bandi icine ca Bufumu bwa kwa Lesa.

“Ninjishiba ukuti ndi pa kati ka bantu abengi abo mwayafwile mu myaka yenu iya mulimo wa busumino. Nangu cibe fyo, ukupitila muli ici cikuuku ca kutemwa, mwalinenga no kulenga ulupwa lwandi ukwisa mu kwishiba Lesa Mukulu, Yehova, no Mwana wakwe, Kristu Yesu. Ndepembelela ubushiku lintu nkamumona mu micitile ipya iya fintu lintu Yehova akafuute filamba fyonse ku menso yesu, ne mfwa tayakabeko kabili iyo.—Ukusokolola 21:4.

“Lelo ine no lupwa lwandi, tuli aba nsansa ukuti twalikwete ishuko lya kumwishiba no kushimikilwa kuli imwe. Twatasha.

“Twamutumina ukutemwa kwa bwananyina,

Peter”

Pa numa ya kulwala pa myeshi 6, Carol alifwile mu March 1996, pa numa ya kutande mbuto ishingi isha cine mu nshita yakwe iyo abombele pa myaka 35 pamo nga kabila wa mbila nsuma uwapimpa. Aishibe ukuti umuntu te kuti eshibe lintu ulubuto luli no kutwala ifisabo, kuti caba myaka iingi pa numa.—Mateo 13:23.