Amenga Ayacindika Yehova

Icipande cakonkapo pa lwa menga ya Bwina Kristu mu kutendekelako capekanishiwe ku Ethiopia ku kupayanya ubutungulushi bwa kwaafwa mu lulimi lwa ciAmharic ku bengi muli cilya calo abasangwike Inte sha kwa Yehova nomba line. Cilelanda pa lwa myata ya cikaya ne fibelesho ifyo fingabe fyapusanako ukufuma ku fyaba kuntu mwikala. Kwena mwalasanga ubupusano ukuba ubwa kulengo buseko apakalamba. Pa nshita imo ine, icipande cilepayanya ukufunda kwa muli Baibolo ukwashikatala uko mwalamona ukuti kulebomba nangu ca kuti imyata ya bwinga yalipusanako ku cifulo cenu.

“AMENGA ya Bwina Kristu Ayaletako Buseko” wali e mutwe wa cipande ca kusambililamo icishaiwamina mu Ulupungu lwa kwa Kalinda ulwa October 15, 1984. Icipande cakonkelepo muli ulya magazini cakwete umutwe wa kuti “Sango Kusekelela Kwashikatala pa Mitebeto ya Bwinga.” (Ku uli onse uulelanguluka pa cupo, kwalibako ukufunda kwa mano ukwalundwapo mu citabo Ukulenga Ubumi bwa Lupwa Lobe ubwa Nsansa, icipandwa 2, ne citabo ca kuti Ubwaice Bobe—Ukukwatilamo Ifyawamisha, ifipandwa 19 na 20.)a Abengi balisanguka Inte sha kwa Yehova ukutula pantu ifyo fipande fyafumine, e co tulefwaya ukupituluka mu fishinka fimo ifyo filebomba ukucilisha ku cifulo cesu, pamo pene ne fishinka fimbi ifyalinga ifili no kutwaafwa ukulenga amenga ukuba inshita sha kucindika Yehova, Katendeka wa cupo.

Icipusho cingabalilapo ukulangulukwa ca kuti, Ni lilali lintu ubwinga bulingile ukucitikako? Bushe ubushiku bulingile ukuba pa nshiku shibelapo amenga ukulingana ne ntambi sha cikaya? Ukulingana ne fyo abakaya basuminamo ubwinga ubuli bonse ubwacitikako pa nshita iili yonse imbi mu mwaka tabwakatunguluke. Uku kwaba kutiine mipashi ukwa fye, pantu abaupana abengi abalebombela Yehova mu nsansa kabili mu kwikatana tabaupene mu ciputulwa ca nshita ica cishilano. Tatwasumina mwi shuko nelyo ishamo. (Esaya 65:11; Abena Kolose 2:8) Te kuti twafwe balupwa abashasumina ukumona ubupusano pa kati ka cine no bufi nga ca kuti twaimike ubushiku bwa bwinga ukulingana no kutiina imipashi kuntu batiina. Icishinka cili ca kuti, Abena Kristu kuti baupana mu mweshi uuli onse.

Nga ca kuti kwabako ukutantika ilyashi pa numa ya kupoka imicato ukufuma ku buteko, kuti caba bwino ukukanapishapo inshiku ishingi ukutula apo mwapokele imicato na po kwabela ilyashi. Nga ca kuti abaleupana balefwaya ukuti ilyashi lya bwinga likabele mu Ŋanda ya Bufumu, balingile ukutununuka baeluda ba mu cilonganino mu kubangilila ukulomba ukubomfyako Iŋanda ya Bufumu. Aba baeluda bali no kushininkisha ukuti ubu bwinga buli no kubasha na bakampingu basanguluka. Inshita ilingile ukutantikwa bwino pa kuti taipunkene ne mibombele ya cilonganino iili yonse. Munyina asalilwe ukupeela ilyashi lya bwinga ali no kukumana na baleenekelwa ukuba shibwinga na nabwinga pa ntanshi ya bwinga ku kubapeelako ukupanda amano kwa kwaafwa no kushininkisha ukuti tapali ifilecilikila ubwinga ukukuma ku mibele isuma nelyo ifya mwi funde no kuti nasuminishako imitantikile ya kusefya ukuli konse ukuli no kukonkapo. Ilyashi lya bwinga lilingile ukuba mupepi na baminiti 30 ubutali kabili lifwile ukulandwa mu nshila ya mucinshi, ukukomaila pa mbali sha ku mupashi. Ilyashi lya bwinga mu kushininkisha lyalicilapo kucindama pa mutebeto uuli onse uwingakonkapo.

Ubwinga bwa Bwina Kristu buba kashita kasuma ku kulanga ukuti tatuli “ba pano isonde.” (Yohane 17:14; Yakobo 1:27) Umuyano untu twakwata ulingile ukupulamo. Ici kuti cafwayo kuti tusengauke ukucelwa pa kuti abantu belapembelela, napamo ukupumfyanya fye ne mibombele ya cilonganino. Ukucilisha nabwinga alekabila ukuba uwaibukila ulwa ici, apantu balupwa ba ku calo kuti bamucincisha ukucelwa—pa kuti amoneke uwacindama. Ukupitila mu kusengauka ukucelwa nkashi wakosoka uwa Bwina Kristu kuti alangisha ukuti imibele ya ku mupashi, ukupala ukuicefya no kulangulukilako, fyalicindama kuli wene! Na kabili, lintu kuliko uulekopa ifikope, cili icacindama ukuti kubeko umuyano. Kuti caba icalinga ukufwaya ukuti uulekopa afwale ijaketi, tai, ne toloshi lya mucinshi kabili elapumfyanya ilyashi pa kukopa ifikope. Tacifwile ukukopa ifikope mu nshita ye pepo. Nga twasungilila umuyano tuli no kucindika Yehova no kupeelo bunte bushaiwamina. Tacilekabilwa ukwesha ukukonka imyata ya mu bwikashi iyo iingatulafya ku bupilibulo bwine bwine ubwa ici ca kucitika.

Tacilepilibula ukuti kano kwaba ukusefya pa kuti icupo cikatunguluke, lelo Amalembo tayakaanya ukukwata akashita ka musango yo aka nsansa. Nangu cibe fyo, ku Bena Kristu ba cine ukubungana kwa musango yo kulingile ukuba ukwapusanako ukufuma ku mitebeto ya ku calo iibamo ukucishamo, ukunwesha, ubulili, inyimbo shalaluka, ukucinda kwa kubimbula, ukusanshako fye ne mbuli. Baibolo itila imo iya milimo ya bumubili yaba “ciwowo.” (Abena Galatia 5:21) Cilangukapo ukutungulula bwino ifilecitika nga ca kuti ibumba talikulishe. Tacilekabilwa ukwimikako itenti pa mulandu fye wa mwata waseeka. Nga ca kuti bamo bapingulapo ukubomfya itenti pa kuti kubeko incende umwa kwikala nelyo pa mulandu wa miceele, uyu mulandu wa pa lwabo.

Abengi basango kuti inshila isuma iya kucefeshamo impendwa ya ba kusangwako kupitila mu kubomfya amakardi ya kulungatika. Cili bwino ukwita abantu umo umo mu cifulo ca filonganino fyonse fye, kabili pamo nga Abena Kristu ba muyano, tulingile ukucindika imitantikile ya musango yo. Ubwite bwalembwa bulatwaafwa na kabili ukusengauka ukulengwa insoni kwingabako lintu uwatamfiwa aisasangwa ku mutebeto, pantu nga ca kuti ico cacitika, bamunyina abengi na bankashi kuti basalapo ukuya. (1 Abena Korinti 5:9-11) Nga ca kuti abaleupana baitako balupwa nelyo abeshibishi abashasumina, ukwabula ukutwishika aba bali no kuba abalinga fye, ukufusha sana aba “bwananyina bwa mu citetekelo.” (Abena Galatia 6:10) Bamo balisalapo ukwitako abo baishibana na bo aba ku calo nelyo balupwa bashasumina ukuyasangwa fye ku lyashi lya bwinga lelo ku mutebeto kwena iyo. Mulandu nshi? Kwalibako inshita lintu balupwa ba ku calo baletako insoni apakalamba nga nshi pa mutebeto wa bwinga ica kuti bamunyina na bankashi abengi bayumfwile ukuti balingile ukuya. Abaleupana bamo batantika ukukwata fye ica kulya calinga na ba mu lupwa abapalamisha ne fibusa fya Bwina Kristu.

Mu kumfwana na Yohane 2:8, 9, cili bwino ukusala “umukalamba wa mutebeto.” Shibwinga akafwaya ukusala Umwina Kristu washintililwapo uukashininkisha ukuti umuyano ne mibele yasumbuka fyasungililwa. Nga ca kuti ifibusa baletako ifya bupe, ifi filingile ukupeelwa ukwabula “amataki.” (1 Yohane 2:16) Inyimbo kuti shawama nga ca kuti tamuli amashiwi yatwishikwa, iciunda cacishamo, nelyo imimbile yalaluka. Abengi balisanga ukuti cilabomba bwino sana ukuleka eluda akutikako libela ku nyimbo shili no kulishiwa. Ukucinda kuti kwaba citeyo, apantu ukucinda ukwingi ukwa cishilano kwafuma ku kucindila ubufyashi kabili kulabimbula ulunkumbwa lwalubana. “Akashita ka kuputula keke no kwisula ibotolo lya mwangashi” limo limo ku bantu ba ku calo kaba cishibilo ca kupeela insambu ya kucita ico balefwaya. Na kuba, Abena Kristu baleupana abengi balipingulapo ukukanaleta ubwalwa ubuli bonse ku mutebeto wa bwinga, muli fyo ukusengauka amafya.

Apantu tufwaya ukucindika Yehova tukasengauka amataki ya kufwaya ukuilangisha. Nangu fye ni mpapulo sha ku calo shalisenuka ukukongama kwaseeka ukwa kufwaisha ukucishamo. Fintu cingaba icalubana ku baleingila mu cupo ukuipoosa mu misha pa mulandu wa bwinga bwacishamo kabili lyene ukulacululuka mu kubulwa pa myaka iingi pa kuti bengalipila imisha bakongwelele ifipooswa fya bushiku fye bumo! Kwena, imifwalile iili yonse pa kashita ka bwinga ilingile ukubamo ubufuuke no kuyana, ukulinga umuntu uuitunga ukubombela Lesa. (1 Timote 2:9, 10) Icipande caleti “Amenga ya Bwina Kristu Yabelebeshe Ukupelulula” (Ulupungu lwa kwa Kalinda ulwa August 15, 1969) calandile ifyakonkapo pa lwa mifwalile:

“Ubwinga bwa muntu buba kashita kaibela, e co ilingi line kulabako ukusakamana ku kuba aba buseko kabili abayemba. Lelo ici tacilepilibula ukuti umuntu afwile ukufwala umusango umo uwe laya lya bwinga nelyo suti. Umuntu kuti acita bwino ukulanguluka imifwalile ya cikaya, ifipooswa na fintu umwine atemwa. . . . Bushe kuti cabamo kupelulula, nangu ni fyo, ukushita ica kufwala ca mutengo nga nshi ica kuti abene baitwika icisendo cafina ica fya ndalama nelyo ukutwika bambi? . . . Bana bwinga bamo babomfya ilaya lya bwinga ilya kwa cibusa watemwikwa nelyo lupwa. Bambi balikushiwa nga nshi pa kuibilila abene ica kufwala ca pa bwinga, napamo ukupitila muli iyi nshila ukuikwatila ica kufwala cabo cine ico bengalabomfya na pa nshita shimbi ku ntanshi. Kabili cili icalinga nga nshi ku baupana ukupisha ubwinga mu fya kufwala fyabo ifya lyonse ifyo batemwisha . . . Bambi abengaba na maka ya kupisha ubwinga bwa lulumbi kuti pambi abene bafwaisha ukupisha ‘ubwinga bwalinga fye’ pa mulandu wa kwafya kwa njikalo.”

Mu kupalako, inshindishi (ifibusa fya kwa shibwinga ne fibusa fya kwa nabwinga abanakashi) tashilekabila ukuba ishingi sana. Na bo bene tacilingile ukuti balefwaya fye ukuilangisha ukupitila mu mifwalile yabo ne ncitilo. Ilintu uwatamfiwa kuti asuminishiwa ukusangwa ku lyashi ku Ŋanda ya Bufumu, Ulupungu lwa kwa Kalinda ulwa October 15, 1984, lwatile: “Te kuti cibe icalinga ukukwata mu nshindishi abantu abatamfiwa nelyo abo umusango wabo uwa bumi uwe shiku upusana ne fishinte fya Baibolo.”

Nangu cingati Yesu alisangilwe ku bwinga, te kuti twelenganye ukuti aali no kusuminisha umwata waseeka uwa kutungilikana muli bamotoka ukupita mu tauni no kupange congo cikalamba; bakapokola balilipilisha fye na banamutekenya bamo pa mulandu wa kulisha bauta ilyo baleensha aba bwinga. (Moneni Mateo 22:21.) Muli ici conse, mu cifulo ca kupashanya amataki nelyo incitilo shapalako isha bena fyalo, Abena Kristu balangisha amano ya bafundinkana.—Amapinda 11:2.

Lelo ni shani pa lwa kusangwa ku menga ya banensu fye, abo tubomba na bo aba ku calo, nelyo balupwa abekala ukutali na bo twaishibana fye na bo? Umwina Kristu umo umo afwile ukupingulapo umwine pa lwa ici. Cili bwino ukwibukisha ukuti inshita yesu yalyumo mutengo, apantu tulakabila inshita ya kubombako ubutumikishi bwesu, iye sambililo lya pa lwesu, ne mibombele imbi iya lupwa pamo pene ne cilonganino. (Abena Efese 5:15, 16) Pa mpela sha milungu, tulaya ku kulongana na mu mulimo wa mwi bala ifyo tushifwaya ukupuswako. (AbaHebere 10:24, 25) Inshita amenga ayengi yabelapo ilapunkana no kulongana kukalamba nelyo umulimo waibela uwalundana no Mulalilo wa kwa Shikulu. Tatufwaya ukupumbulwa ku kubombesha mu nshila imo ine iyo bamunyinefwe ukushinguluke calo balebombelamo ku kusangwa ku Mulalilo wa kwa Shikulu. Ilyo tushilaishiba icine, twalepoosa inshita ikalamba na bantu ba ku calo, napamo mu mibele iishalecindika Lesa. (1 Petro 4:3, 4) Nomba ifyo tutangishako fyalipusanako. Lyonse kuti caba bwino ukweba aba ku calo abaleupana ukuti ifintu fikende bwino ukupitila mu kubatumina kardi nelyo ukuyatandalako pa kashita akepi pa bushiku bumbi. Bamo balibomfya inshita ya musango yo ukushimikila, ukubelengako amalembo ayalinga ku boopene fye nomba line.

Ubwinga umo imbali sha ku mupashi shayandatila sana ukucila inshila sha ku calo mu cine cine buli no kucindika Yehova. Pa kushininkisha ukuti bali abapaatukako ku calo no kutiine mipashi uko icalo citiina no kucishamo ukuyobekamo, pa kukanaleka cene ukupumfyanya imibombele ya teokrasi, na pa kulangisha ubufuuke mu cifulo ca kulangisha amataki, Abena Kristu bakaipakisha aka kashita. Ukulundapo, bakalaibukisha ici ca kucitika mu kuba na kampingu musuma ne fibukisho fisuma. Pa kubomfya amano no kupelulula, shi amenga yesu yonse aya Bwina Kristu yabe bunte busuma ku ba mitima ya bufumacumi abalemonako.

[Futunoti]

[Icikope pe bula 24, 25]

Abena Kristu tabakonka imyata ya mu bwikashi yonse ukukuma ku menga