Ifipusho Ukufuma Ku Babelenga

Bushe kuti casoswa ukuti ukumfwikisha kwa nomba line pa lwe shiwi “inkulo” pali Mateo 24:34 ninshi kulesunkila impela ya ino micitile ya fintu ukuya ku ntanshi ukwalepa?

Iyo te fyo cili nangu panono. Mu kupusanako, ukumfwikisha kwa nomba line ukwa uyu mulandu kulingile ukutwaafwa ukucilanapo ukwenekela impela. Mulandu nshi?

Cisuma, nga fintu Ulupungu lwa kwa Kalinda ulwa November 1, 1995, lwalondolwele, Yesu abomfeshe inumbwilo “inkulo iyi” ku babifi ba pali ilya nshita, abaliko pa nshita imo ine na wene. (Mateo 11:7, 16-19; 12:39, 45; 17:14-17; Imilimo 2:5, 6, 14, 40) Talelanda pa lwa ciputulwa ca nshita ica kulungatika.

Na kuba, umukululo wa “Ifipusho Ukufuma ku Babelenga” muli lulya Ulupungu lwa kwa Kalinda lumo lwine wakomaile pa fintu fibili ifya mpikwe: “Inkulo ya bantu te kuti imonwe nge ciputulwa ca bantu icakwata impendwa yapampamikwa iya myaka” kabili, “Abantu ba mu nkulo bekalako pa ciputulwa cinono mu kulinganyako.”

Ilingi line iyi e nshila tubomfeshamo “inkulo.” Ku ca kumwenako, kuti pambi twatila: ‘Abashilika ba mu nkulo ya kwa Napoléon tabaishibepo nangu kamo pa lwa ndeke na mabomba ya atomiki.’ Bushe ninshi tulelanda pa lwa bashilika abafyelwe umwaka umo wine Napoléon afyalilwemo? Bushe ninshi tulepilibula abashilika abena France abafwile ilyo Napoléon talafwa? Awe iyo; kabili ukubomfya “inkulo” muli iyo nshila tatuleesha ukwimika impendwa yapimwa iya myaka. Nangu cibe fyo, ninshi tulelosha ku ciputulwa ca nshita icipi mu kulinganyako te myanda ya myaka iingi ku ntanshi ukufuma pa nshita ya kwa Napoléon.

Cili icapalako ku kumfwikisha kwesu pa lwa cintu Yesu asosele mu busesemo bwakwe ubwapeelwe pa lupili lwa Miolife. Ukufikilishiwa kwa mbali shapusanapusana isha bulya busesemo kushininkisha ukuti impela ya ino micitile naipalama. (Mateo 24:32, 33) Ibukisheni ukuti ukulingana na Ukusokolola 12:9, 10, pa numa ya kwimikwa kwa Bufumu bwa kwa Lesa mu muulu mu 1914, Satana alipooselwe ukufuma ku muulu ukwisa ku bwina mupalamano bwe sonde. Ukusokolola kulundako kuti Satana nomba ali ne cipyu cikalamba. Mulandu nshi? Pantu naishibo kuti “ali ne nshita inono fye.”—Ukusokolola 12:12.

Muli fyo cali icalinga ukuti Ulupungu lwa kwa Kalinda ulwa November 1 lwakwete akamutwe kanono akaleti “Loleni!” Paragrafu wakonkelepo alandile bwino ati: “Tatulekabila ukwishiba mu kulungatika inshita ya ifi fya kuponako. Mu cifulo ca ico, tufwile ukutontomesha pa kuba abalola, ukulundulula icitetekelo cakosa, no kutwalilila abapamfiwa mu mulimo wa kwa Yehova—te kulapende nshiku.” Lyene yayambwile amashiwi ya kwa Yesu ati: “Cenjeleni, loleni kabili pepeni; pantu tamwaishiba ilyo inshita ikesabako. Awe ico ndeeba imwe, ndeeba bonse, nati, Loleni.”—Marko 13:33, 37.