Ifipusho Ukufuma ku Babelenga

Twalicincimushiwe ukusambilila pa mulumbe wa kwa Yesu uwa mpaanga ne mbushi. Pa mulandu wa kumfwikisha kupya ukwali mu “Ulupungu lwa kwa Kalinda” ulwa October 15, 1995, bushe kuti twatila Inte sha kwa Yehova shicili shilebomba umulimo wa kupaatukanya?

Ee. Nga fintu cingenekelwa, abengi balitontonkanya pa lwa ici pa mulandu wa kuti Mateo 25:31, 32 asosa ukuti: “Ilyo Umwana wa muntu akesa mu bukata bwakwe, na bamalaika bonse pamo nankwe, e lyo akekala pa cipuna ca bukata bwakwe, ne nko shonse shikalonganikwa ku cinso cakwe; kabili akabapaatukanya, ifyo umucemi apaatukanye mpanga ku mbushi.” Ulupungu lwa kwa Kalinda ulwa October 15, 1995, lwalangishe umulandu ifi fikomo filosesha ku nshita ya pa numa ya kutendeka kwa bucushi bukalamba. Ilya nshita Yesu akafika mu bukata bwakwe na bamalaika bakwe kabili akekala pa cipuna cakwe ica bupingushi. Lyene akapaatukanya abantu. Mu mano nshi? Akapingula abantu ukushintilila pa fintu baacitile nelyo fintu bafililwe ukucita ku numa.

Kuti twalinganye ci ku fiputulwa fya mwi funde ifitungulula ku kulubulula mu cilye ca milandu. Ubushinino bulaya bulefulilako pa ciputulwa ca nshita icalepako ilyo icilye tacilapingula. Ubushinino ukukuma ku bantu abali aba mweo pali ino nshita abakesasangwa ukuba impaanga nelyo imbushi bwalifulilako pa nshita yalepa. Kabili bucili bulefulilako. Lelo lintu Yesu akekala pa cipuna ca bufumu, umulandu ukaba naupwa. Akaba naiteyanya ukupingula. Abantu bakapaatululwa atemwa ukuya ku kulimunwa kwa muyayaya nelyo ku bumi bwa muyayaya.

Nangu cibe fyo, icishinka ca kuti ukupaatulwa kwa bantu ukuya ku bumi nelyo ku mfwa ukwalumbulwa pali Mateo 25:32 kucili ku ntanshi, tacilepilibula ukuti takuli ukupaatukanya kulecitwa pa ntanshi ya ico. Muli Mateo icipandwa 13, Baibolo ilanda pa lwa mulimo wa kupaatukanya uukacitika pa ntanshi ya ici. Ku ca kupapusha, icitabo ca Abaikatana mu Kupepa Lesa Umo Eka Uwa Cine pa mabula 179-80, cilalanda pali ci pa mutwe wa kuti “Ukupaatukanya Abantu.”a Citila: “Kuliko na kabili ifya kucitika fimbi ifyamonekesha ifyo Yesu mu kupulamo ayampenye no kusondwelela kwa micitile ya fintu. Cimo ica ifi cili kupaatulanya ‘abana ba bufumu’ ukufuma ku ‘bana ba mubifi.’ Yesu asosele ulwa ici mu mulumbe wakwe pa lwa cilime ca ngano ico umulwani aishiletandamo amankumba.”

Ici citabo calelanda pa cilangililo ca kwa Yesu ica pali Mateo 13:24-30 kabili icalondololwa mu fikomo 36-43. Moneni mu cikomo 38 ukuti ingano shisuma shimininako abana ba Bufumu, lelo amankumba yemininako abana ba mubifi. Ifikomo 39 na 40 filanga ukuti ku “mpela ya nshita”—uko nomba tuleikala—amankumba yalelonganikwa. Yapaatulwa no kocewa, ukonaulwa.

Ici cilangililo cilanda pa Bena Kristu basubwa (abo Yesu eta bamunyina mu mulumbe wa mpaanga ne mbushi). Nalyo line, icishinka nacumfwika ukuti kuli ukupaatukanya kwakakala ukulecitwa ino nshita, abasubwa ukulekanishiwa na bo abaitunga ukuba Abena Kristu lelo ababa “bana ba mubifi.”

Yesu apeele ifya kumwenapo na fimbi ifya bantu balepaatukanishiwa. Ibukisheni ifyo pa lwa mpongolo yasalala iitwala ku boni, atile: “Bengi abengilako.” (Mateo 7:13) Talelanda fye pa fya kufumamo mu kupelako. Aalelanda pa cintu cingacitika pa nshita yalepako, nga fintu fye cili ilelo ku banono abalesanga impongolo ya kamfyemfye iitwala ku bumi. Ibukisheni na kabili, ukuti lintu aletuma abatumwa bakwe, Yesu atile baali no kusangamo abayana. Bambi tabali no kuba abayana, kabili abatumwa bali no kukunto lukungu ku makasa “ku kube nte kuli bene.” (Luka 9:5) Bushe te cishinka ukuti e ficitika na lintu Abena Kristu ilelo balebomba ubutumikishi ku cintubwingi? Bambi balasumina, ilintu bambi balakaana ubukombe bwa bulesa ubo tubatwalila.

Ifipande mu Ulupungu lwa kwa Kalinda ifyalelanda pa mpaanga ne mbushi fyasosele ukuti: “Ilintu ubupingushi ubwalondololwa mu mulumbe buli pa ntanshi fye apa, nelyo fye ni nomba icintu cimo icakatama cilecitika. Ifwe fwe Bena Kristu tulebomba umulimo wa kupususha imyeo uwa kubilisha ubukombe ubulekanya abantu. (Mateo 10:32-39).” Muli lilye lembo lya kwa Mateo icipandwa 10, tubelenga ukuti Yesu atile ukumukonka kuti kwaleta amalekano—wishi ukulwisha umwana mwaume, umwana mwanakashi ukulwisha nyina.

Mu kupelako, bamunyina kwa Kristu abasubwa baliba basolwesolwe mu mulimo wa kushimikila ubukombe bwa Bufumu. Ilyo abantu bashimikilwa ubu bukombe no kwankulako, ukwankulako bwino nelyo bubi bubi, baleishibisha abene. Ifwe fwe bantunse te kuti tusose, kabili tatulingile ukusosa ukuti, ‘Uyu muntu ni mpaanga nelyo ni mbushi’ ukulingana no bupilibulo bwa kwa Mateo icipandwa 25. Nalyo line, ukwebako abantu imbila nsuma kubalenga ukulangisha apo beminine—umusango wa bantu baba na fintu basunga bamunyina kwa Yesu. E co uku kupaatukanya aba ku lubali lwa bamunyina kwa Yesu na bakaana ukuba ku lubali lwabo kuleya kulemonekesha, ukupala ubushinino ubulefulilako ubwingesabomfiwa mu cilye. (Malaki 3:18) Nga fintu Ulupungu lwa kwa Kalinda lwalangile, nomba line fye Yesu ali no kwikala pa cipuna cakwe ica Bufumu no kupingula, ukupaatukanya abantu ukulingana na fintu bapingulwa mu kupelako atemwa ukuya ku bumi nelyo ku kulimunwa.

[Futunoti]