Kampingu Bushe Cipe Cafina Nelyo Cuma?
‘KAMPINGU wandi alencusha!’ Mu nshita mu nshita, mupepi na ifwe bonse tulacushiwapo na kampingu. Ukuyumfwa kwa musango yo kuti kwatendekela ku kucushiwa kwa muntontonkanya pa kashita fye akanono ukufika ku kucushiwa pa nshita ntali. Kampingu wacushiwa kuti aletako fye no kupopomenwa nelyo ukuyumfwa kwashika ukwa kupelebela.
Nga ca kuti twacitontonkanishisha muli iyi nshila, ninshi kanshi kampingu cisendo bushe te ifyo? Bamo e fyo bengatontonkanya. Abantu baikeleko mu nkulo shapita abasambilila ilingi line balemona kampingu ukuti maka ya kufyalwa fye na yo. Abengi baaletontonkanya ukuti kampingu aali ca kutungulula ico Lesa umwine atupeele pa kuti tube ne mibele isuma. E co kampingu aitwa “Lesa uwaba mu muntu,” “icifyalilwa cesu ica cine cine,” e lyo no kuti “ishiwi lya kwa Lesa.”
Nangu cibe fyo, mu myaka ya nomba line, naciseeka ukusoso kuti kampingu ilingi line yaba maka ayo twisa fye mu kukwata—ayafuma ku bafyashi nelyo mu bwikashi. Ku ca kumwenako, abasambilila ifya muntontonkanya bamo basoso kuti umwana alasambilila ukutaluka ku mibele yabipa pa mulandu fye wa kutiina ukukandwa, ukusumino kuti ico tutila kampingu cintu tupyana fye ico abafyashi besu batontonkanya no kusumina. Bambi balosha ku lubali luntu aba mu bwikashi babomba mu cinkumbawile ukukuma ku matontonkanyo ne fipimo fya mibele. Bamo batontonkanyo kuti ukucusha kwa kampingu kwaba fye kulwishanya pa kati ka co twingatemwa ukucita na cintu ubwikashi bwa mutitikisha bulefwaya ukuti tucite!
Te mulandu ne mfundo pa lwa kampingu, libili libili abantu balipusana na bafyashi, indupwa, na ba mu bwikashi bonse pa mulandu wa kuti kampingu wabo abebele ukucite co. Bamo baliitemenwa fye no kufwilapo pa mulandu wa kampingu! Kabili te mulandu no bupusano bushaikulila pa lwa ntambi sha mu calo, ifintu pamo nga ubukomi, ubupuupu, ubucende, ukubepa, no kulaalana kwa pa lupwa konse fye uko mwaya bafimona ukuti fyalilubana. Bushe ici tacilelangisha ukuti kampingu aba cintu ca kufyalwa na co?
Cintu Baibolo Isosa pa lwa Kampingu
Uwingatutungulula bwino bwino muli uyu mulandu ni Yehova Lesa. Na kabushe, “wene [Lesa] e watulenga.” (Ilumbo 100:3) Alomfwikisha bwino bwino imipangilwe yesu. Icebo ca kwa Lesa, Baibolo, cilalondolola ukuti umuntu alengelwe mu “cipasho” ca kwa Lesa. (Ukutendeka 1:26, NW) Umuntu alengelwe mu kuba na maka ya kulekanya icisuma ne cibi; kabili ukutula fye pa kutendeka, kampingu aali lubali fye lwa cifyalilwa ca muntu.—Linganyeniko Ukutendeka 2:16, 17.
Umutumwa Paulo asuminishe ci muli kalata atumine ku bena Roma, umo alembele ukuti: “Ilyo Abena fyalo abashaba na Malango [ya kwa Lesa] bacita Amalango ku cifyalilwa, ninshi baba Amalango abene, nelyo tabakwata Amalango. Balango kuti Amalango yalembwa mu mitima yabo, apo kampingu wabo abe nte, ne nkuntumutima yabo ilabashinina nalimo ilabapoosa ku numa.” (Abena Roma 2:14, 15) Moneni ukuti abengi abashakulile mu kukonka Amalango ya bulesa ayapeelwe ku baYuda balikonkele ifishinte fimo ifya malango ya kwa Lesa, te pa mulandu wa kuti balepatikishiwa ku ba mu bwikashi, lelo “ku cifyalilwa”!
Mu cifulo ca kuba icisendo cafina, kanshi, kampingu aba ca bupe cafuma kuli Lesa, icuma. Ca cine, kuti yatucusha. Lelo lintu twayumfwila bwino bwino, kuti yatulambula mu kuba no mutende wa lwa nkati. Kuti yatutungulula, ukutucingilila, no kutucincisha. The Interpreter’s Bible isoso kuti: “Ubutuntulu bwa ku muntontonkanya na mu nkuntu kuti bwabako fye nga ca kuti umuntu aesha ukukonka cintu acita na cintu aleyumfwa ukuti e co afwile ukulacita.” Ni shani fintu umuntu engacite ci? Bushe kuti cacitikako ukumumunga no kukansha kampingu wesu? Ifi fipusho fyalalangulukwa mu cipande cikonkelepo.