Ifya kufunda Kampingu wenu

“KAMPINGU wasanguluka alenga mulelaala bwino.” Iyi nsoselo ya pa kale ileebekesha ici cishinka cakatama: Nga ca kuti twaumfwila kampingu wesu, tulaipakisha umutende wa lwa nkati no mutelelwe.

Nangu cibe fyo, te bonse basalapo ukumfwila kampingu. Adolf Hitler asosele ukuti aali no mulimo wa kulubula abantu kuli kakopeka, nelyo katumpika wa kubotelesha, uwaishibikwa ukuti kampingu. Imitekele yakwe iya kutiinya ilapeelako icitontonshi ca fintu abantu bengaba abankalwe lintu bakaana bakampingu wabo. Nangu ni fyo, abankalwe bapalako, ni bantalamisoka ba lukaakala abengi pali lelo—abekata kama mu kwampana kwa bwamba no kwipaya ukwabula ukumfwa no bulanda. Ubwingi bwa baleilunda kuli aba bakacululusha bali bacaice. Icitabo icafwailishe pa lwa ubu bwafya calikwetemo na kamutwe kanono akaleti Children Without a Conscience (Abana Babula Kampingu).

Ilintu abantu abengi te kuti cise na ku mano yabo ukutale misoka, abengi tabasakamikwa nangu panono pa lwa kucita bucisenene, ukubepa, nelyo ukufinsha. Imibele ilebipilako fye mwi sonde lyonse. Ilyo aalelanda pa lwa busangu bushaikulila ubwa kusangukila ukupepa kwa cine, umutumwa Paulo alembele ukuti Abena Kristu bamo baali no kunakila ku kusonga kwa ku calo no kusanguka “abashutikwa bakampingu wabo.” (1 Timote 4:2) Ubusanso bwa kubotelela nabukulilanako pali lelo muli shino “nshiku sha kulekelesha.” (2 Timote 3:1) E co Abena Kristu bafwile ukubombesha ukucingilila kampingu wabo. Kuti twacite ci ukupitila mu kuifunda no kuibomfya.

Umuntontonkanya, Umutima, na Kampingu Wenu

Umutumwa Paulo atile: “Ndesose cine muli Kristu, nshilebepa, kampingu wandi ambele nte mu Mupashi wa mushilo.” (Abena Roma 9:1) E co kampingu kuti abelo bunte. Kuti apituluka mu myendele imo e lyo nga alefwaya aisuminisha nelyo aisenuka. Ubwingi bwa maka yesu aya mu mubili aya kwishiba icalungama ne calubana yabikwamo na Kabumba wesu. Nalyo line, kampingu wesu kuti amumungwa no kufundwa. Mu nshila nshi? Ukupitila mu kupokelela ukwishiba kwalungikwa ukwa mu Cebo ca kwa Lesa. Umutumwa Paulo atila: “Musangulwe mu kulengwa kwa mitima yenu ipya, ukuti mulinge icabo kufwaya kwa kwa Lesa, icisuma kabili ica kutemuna kabili icapwililila.” (Abena Roma 12:2) Ilyo mulelimba amatontonkanyo ya kwa Lesa no kufwaya kwakwe mu muntontonkanya wenu, kampingu wenu alacishapo ukubomba mu nshila ya bukapepa.

Inte sha kwa Yehova balyafwa amamilioni ya bantu ukushinguluke sonde ‘ukwishiba Yehova Lesa na Yesu Kristu.’ (Yohane 17:3) Ukupitila mu mitantikile yabo iya kusambilisha Baibolo pa ng’anda ukwabulo kulipilisha, balasambilisha abafwaisha ukwishiba ifipimo fya kwa Yehova Lesa pa lwa kwampana kwa bwamba, ubwalwa, icupo, ifya makwebo, ne milandu imbi iingi.a (Amapinda 11:1; Marko 10:6-12; 1 Abena Korinti 6:9, 10; Abena Efese 5:28-33) Ukupokelela uku “kwishiba” cintu cacindama nga mulefwaya ukulundulula kampingu wa bukapepa. (Abena Filipi 1:9) Kwena, nangu fye cibe Umwina Kristu naumfwikisha Baibolo bwino bwino, afwile lyonse ukutwalilila ukuliisha umuntontonkanya wakwe Icebo ca kwa Lesa nga alefwaya kampingu wakwe ukutwalilila ukuba umutuntulu.—Ilumbo 1:1-3.

Baibolo na kabili isuntinkanya kampingu ku mutima wa mampalanya, uusanshamo fintu tuyumfwa na fintu tukuntukilwa. (Abena Roma 2:15) Umuntontonkanya no mutima fifwile ukubombela capamo nga ca kuti kampingu ali no kubomba bwino. Ico cilepilibula ukubombesha nga nshi ukucila pa kubika fye ifyebo mu muntontonkanya wenu. Mufwile na kabili ukumumunga umutima wenu—ifyo muyumfwa pa nshi ya mutima, ifyo mufwaisha, na fintu mufuluka. Ibuuku lya Amapinda muli fyo libomfya amashiwi pamo nga “ukwalwilo mutima obe,” “biko mutima obe,” na “ukushikimiko mutima obe.” (Amapinda 2:2; 23:19; 27:23) Inshila imo ico cingacitilwamo kupitila mu kwetetula no kutontonkanya pa Malembo. Ilumbo 77:12 lisoso kuti: “Ndetontonkanyo kubomba kwenu konse, no kwetetule milimo yenu.” Ukwetetula kutwaafwa ukufika pa nshi ya mutima na pa nkuntu.

Ku ca kumwenako, tutile mwaliba ne cibelesho cishasanguluka pamo nga ukukunkuma kuli fwaka. Ukupala abantu abengi, ukwabulo kutwishika mwalishiba bwino ubusanso fwaka ingaleta ku mubili. Nalyo line, te mulandu no kukoselesha kwa fibusa na balupwa ukuti muleke ukupeepa, calimwafya nga nshi ukuleka. Ni shani fintu ukwetetula pa mashiwi yaba mu Baibolo kwingakosha kampingu wenu muli ici?

Ku ca kumwenako, esheni ukwetetula pa mashiwi ya mutumwa Paulo ayasangwa pali 2 Abena Korinti 7:1 apatila: “E ico pa kuba ne filayo ifi, mwe batemwikwa, tuisangulule ku kukantana konse kwa mubili no mutima, tube abafishisho mushilo mu kutiina Lesa.” Ilukeni umo aya mashiwi yalolele. Ipusheni amuti, ‘Cinshi cili “ifilayo ifi” ifyo Paulo alandapo?’ Ukupitila mu kubelenga amashiwi yashingulukako, mwalasango kuti ifikomo fyatangililako fitila: “Fumeni mwi bumba lyabo, mupaatukeko, e fyo asosa Shikulu, kabili mwiikatako ku cishasanguluka; na ine nkamusekelela, kabili nkaba Shinwe, na imwe mukaba abana bandi abaume na bana bandi abanakashi, e fyo asosa Shikulu wa maka yonse.”—2 Abena Korinti 6:17, 18.

Amashiwi ya kwa Paulo aya ‘kuisangulula ku kukantana’ nomba yakwata amaka yalundwapo! Pa kutukoselesha sana ukucite co, Lesa alaya ‘ukutusekelela,’ e kuti, ukulatucingilila. Kuti pambi mwaipusha amuti ‘Bushe kuti naipakisha bucibusa bwapalamisha na wene—ukupala filya ciba ku mwana na wishi?’ Bushe ili itontonkanyo lya ‘kusekelelwa’ nelyo ukutemwikwa kuli Lesa wa mano, uwa kutemwa talitulenga ukufwaisha ukusekelelwa muli iyo nshila? Nga ca kuti ico camukosela ukumfwa, mukalolekeshe inshila bashibo balangishishamo ukutemwa ku bana babo. Nomba elenganyeni ukwikatana kwa musango yo ukubapo pa kati ka imwe na Yehova! Ilyo mwatontonkanyapo sana, e lyo cilecilapo kufwaisha ukuba no kwampana kwa musango yo.

Lelo moneni ukuti: Kuti mwapalama fye kuli Lesa nga ca kuti ‘tamuleikata ku cishasanguluka.’ Ipusheni ukuti: ‘Bushe ukukunkuma kuli fwaka tacili ni cimo ica ‘fishasanguluka’ ifyo Lesa asenuka? Bushe ukupeepa fwaka kuti ‘kwakantaika umubili,’ ukunenga ukuba mu busanso bwa kwambula amalwele yapusanapusana? Apantu Yehova aba Lesa wa busaka, nelyo “uwa mushilo,” bushe kuti asuminisha ukuti ndeikantaika fye ku mufulo muli iyi nshila?’ (1 Petro 1:15, 16) Moneni ukuti Paulo na kabili asoka pa lwa ‘kukantana kwa mutima,’ nelyo amatontonkanyo. Ipusheni amuti: ‘Bushe ici cibelesho e co ntontonkanyapo fye? Bushe kuti nafika ku cipimo ca kwikusha icilaka candi, napamo ukukanasakamana ubumi bwandi, ulupwa, nelyo ukwiminina kwandi na Lesa? Fwaka yaonaula shani ubumi bwandi?’ Ukwasuka ifi fipusho fyacindama kuti kwamupeela ubukose mulekabila ku kuleka!

Kwena, kuti pambi mwakabila ukwaafwa no kutungilila ukufuma kuli bambi pa kuti mulekelele ukupeepa fwaka. Nalyo line, ukwetetula pali Baibolo kuti kwamwaafwa nga nshi ku kufunda no kukosha kampingu wenu pa kuti mwingailubulako ku kukunkuma.

Lintu Twacite Cilubo

Te mulandu no kubombesha kwesu ukwa kucite calungama, limo limo ukukanapwililika kwesu kulatucimfya kabili tulatena. Lyene kampingu wesu ali no kutucusha, lelo kuti twatunkwa ukumusuulako fye. Nelyo pambi kuti twafuupulwa nga nshi ica kuti twalafwaya ukuleka ukuibikilishako ukuli konse ukwa kubombela Lesa. Nangu cibe fyo, ibukisheni ifyo cali ku Mfumu Davidi. Pa numa ya kucito bucende na Bati-sheba, kampingu wakwe alimucushishe. Alondolola fintu alecululushiwa ukuti: “Akasuba no bushiku ukuboko kwenu kwafinine pali ine: ububishi bwandi bwalyalwike mu kuuma kwati kwa lusuba.” (Ilumbo 32:4) Bushe aalecululuka? Mu cine cine! Lelo ubu bulanda bwa bukapepa bwalengele Davidi ukulapila no kuwikishiwa kuli Lesa. (Linganyeniko 2 Abena Korinti 7:10.) Ukupaapaata kwa kwa Davidi ukwa kufwayo kulekelelwa bwaba bushininkisho bwa kulapila kwakwe ukwa cine cine. Davidi alyafwiwe ukwaluka no kunonka ubuseko bwakwe cipya cipya pa mulandu wa kuti alyumfwilile kampingu wakwe.—Ilumbo 51.

E fyo cingaba na pali lelo. Bamo balisambilile Baibolo ne Nte sha kwa Yehova mu nshiku sha ku numa lelo balilekele lintu baishibe ukuti imikalile yabo tayaleumfwana ne fipimo fyasumbuka ifya kwa Lesa. Napamo baleikala no mwanakashi nelyo umwaume ukwabula ukuupana mwi funde nelyo baali abasha ba fibelesho fyakowela. Kampingu wabo aalebacululusha!

Nga ca kuti e fyo mwaba, tontonkanyeni pa mashiwi ya mutumwa Petro ayo alandile pa bushiku bwa Pentekoste. Lintu asansalike imembu sha bantu bakwe abaYuda, ‘calibapitile ku mitima.’ Mu cifulo ca kunenuka, balyumfwilile ukukonkomesha kwa kwa Petro ukwa kulapila, kabili balinonkele ububile bwa kwa Lesa. (Imilimo 2:37-41) Kuti mwacita cimo cine! Mu cifulo ca kushe cine pa mulandu wa kuti kampingu wenu alemucusha, lekeni kampingu wenu amulenge ‘ukulapila no kupilibuka.’ (Imilimo 3:19) Lintu mwaba no mupampamina no kubombesha, kuti mwayaluka ukwaluka ukukabilwa pa kunonka ububile bwa kwa Lesa.

“Mube Abakwata Kampingu Musuma”

Nampo nga e lyo mutendeke fye ukusambilila inshila sha kwa Yehova nelyo napapita imyaka iingi ukutula apo mwabela Umwina Kristu wakosoka, uku kukonkomesha kwa kwa Petro kuli ukwalinga: “Mube abakwata kampingu musuma.” (1 Petro 3:16) Cuma, te cisendo cafina iyo. Ikansheni ukupitila mu kuliisha umuntontonkanya wenu no mutima ukubomfya amano yasangwa mu Cebo ca kwa Lesa, Baibolo. Umfwileni kampingu wenu lintu yamusoka. Ipakisheni umutende wa muntontonkanya uo ukumfwila kampingu wenu kwingaletako.

Ca cine, ukufunda no kumumunga kampingu wenu tauli mulimo wayanguka. Nangu cibe fyo, kuti mwapepa kuli Yehova Lesa ukumwafwilisha. Mu kuba no ku kwaafwa, muli no kubombela Lesa “kuli kampingu musuma na mu citetekelo icabula bumyalumyalu.”—1 Timote 1:5.

[Futunoti]

[Icikope pe bula 6]

Ukubelenga no kwetetula pa Cebo ca kwa Lesa kulatwaafwa ukufunda kampingu wesu