Bushe Muleibukisha?
Bushe mwalisanga bamagazini ba Ulupungu lwa kwa Kalinda aba nomba line ukuba aba kwaafwa? Kanshi esheni ukumona ifyo mwingebukisha ukubomfya ifipusho fyakonkapo.
◻ Bushe Armagedone ikaba shani? (Ukusokolola 16:14, 16)
Tayakabe ni nkondo ya manyukiliya nelyo akayofi kakolomonwa na bantunse. Iyo, ni nkondo ya kwa Lesa iya kupwisha inkondo sha bantunse shonse, ukulofya bonse abatuninkisha inkondo sha musango yo, no kuleta umutende wa cine ku batemwa umutende. Tayakashingashinge. (Habakuki 2:3)—4/15, ibula 17.
◻ Bwinga bwa musango nshi ubucindika Yehova?
Ubwinga umufula ifya ku mupashi ukucila imibele ya ku calo e bucindika Yehova. Nga ca kuti basengauka imyata ya ku calo iyabotelela, ukutiine mipashi, no kucishamo; nga tabalekele yacilima imilimo ya bulesa; kabili nga balangisha ukulinga mu cifulo ca mataki, ninshi Abena Kristu bakaipakisha iyi nshita.—4/15, ibula 26.
◻ Cinshi cishibisha umuntu wa bumpomfu?
Umuntu wa bumpomfu kuti acetekelwa, ku muntu munankwe, e lyo ne cacilapo ukucindama, kuli Lesa. Ukufumaluka kwa mutima wa uyo muntu kumwenwa ku fyo acita. Te wa bumbimunda. Te ncenjeshi kabili tabotelela. (2 Abena Korinti 4:2)—5/1, ibula 6.
◻ Mulandu nshi Yeremia asosele ukuti: “Cisuma ku muntu ukuti asende ikoli mu nshita ya bulumendo bwakwe”? (Inyimbo sha Bulanda 3:27)
Ukusambilila ifya kubomba ne fya kwesha ku bwaice kulaafwa ukupekanishisha ukwisabomba na mafya ku bukalamba. (2 Timote 3:12) Ubunonshi bufuma mu kuba uwa busumino bwacilapo apakalamba pa kwilulukwa ukuli konse ukwa kashita kanono ukwingesa lintu umo anakila ku fya kwesha.—5/1, ibula 32.
◻ Cinshi ukumoneka kwa kwa Mose na Eliya mu cimonwa ca kwaluka kwaleimininako?
Mu kwaluka, Mose na Eliya bali fishibilo fyalinga ifya bamunyina kwa Yesu abasubwa. Ukumoneka pamo na Yesu “mu bukata” kwalangilile ukuti Abena Kristu ba busumino abasubwa ‘bakacindamikilwa pamo’ na Yesu mu kutantika kwa Bufumu bwa mu muulu. (Luka 9:30, 31; Abena Roma 8:17; 2 Abena Tesalonika 1:10)—5/15, amabula 12, 14.
◻ Bushe “inkama yashila” ya kwa Lesa cinshi? (1 Abena Korinti 2:7, NW)
“Inkama yashila” ya kwa Lesa yakobama muli Yesu Kristu. (Abena Efese 1:9, 10) Nangu ni fyo, te kwishiba fye ukuti Yesu aali e Mesia walaiwa. Cisanshamo ubuteko bwa ku muulu, Ubufumu bwa kwa Lesa ubwa buMesia, kabili cisanshamo umulimo Yesu apeelwa ukubomba mu mifwaile ya kwa Lesa.—6/1, ibula 13.
◻ Bushe Umwina Kristu alingile ukumona shani ukukota nelyo ukulwalilila?
Mu cifulo ca kumona ifyo fya kwesha nge filelenga ukupelebela mu mulimo wa kwa Yehova, afwile ukufimona nge shuko lya kukushako ukushintilila pali Yehova. Alingile no kwibukisha ukuti ubucindami bwa Mwina Kristu tabupiminwa ku milimo fye abomba lelo na ku citetekelo cakwe na fintu ukutemwa kwakwe kwashika. (Marko 12:41-44)—6/1, ibula 26.
◻ Ni shani fintu ukubomfya abantunse ukulemba Baibolo mu cifulo ca bamalaika kulangisha amano yafulisha aya kwa Yehova?
Nga tamwaliko ubuntunse, pambi nga caletukosela ukumfwikisha ubukombe bwa mu Baibolo. Baibolo na kabili yalibamo icikabilila, ukulekanalekana, no kucebusha ukwalengelwe no buntunse bwabamo.—6/15, ibula 8.
◻ Cinshi caba inkama ku nsansa sha mu lupwa?
Inkama yaba mu Cebo ca kwa Lesa, Baibolo, na mu kubomfya ifishinte fya iko, pamo ngo kuilama, ukwishiba bumutwe, ukulanshanya kusuma, no kutemwa.—6/15, amabula 23, 24.
◻ Ni shani fintu ukuposha kwa kwa Yesu kwapusanininako no ko kucitwa na baitunga ukukwata amaka ya kuposha ilelo?
Takwali ukukuntukilwa kwalaluka ukufuma ku mabumba na kuli Yesu kwine. E lyo, Yesu tatalile afilwapo ukuposha abalwala ukubepesha ukuti ubupe bwabo bwalicepele nelyo ukuti tabakwete citetekelo.—7/1, ibula 5.
◻ Ni shani fintu Yehova ayafwa abantu bakwe ukusanshiwamo mu mifwaile yakwe iya bulesa ukukuma kwi shina lyakwe no Bufumu?
Ica kubalilapo, Yehova aliseekesha abantu bakwe icine. Ica cibili, abapeele umupashi wa mushilo. Ica butatu, twalikwata aba bwananyina mwi sonde lyonse no kutantika kwa kupepa ukwa kuteyanya kwa kwa Yehova.—7/1, amabula 19, 20.
◻ Ubusuma cinshi?
Ubusuma bwaba kuwama kwa mibele, ukuba umusuma, incitilo shalungama ne mitontonkanishishe. Te mibele yatalalila lelo mibele yacincila, iya cikabilila. Ubusuma busanshamo na fimbi ukucila pa kusengauka fye ulubembu; cipilibula ukukonkelela ubusuma. (1 Timote 6:11)—7/15, ibula 14.
◻ Fya cishale nshi fyacindamisha abafyashi bengashiila abana babo?
Ica cishale cacindamisha caba ca kumwenapo cabo abene ica kutemwa bambi. Abana bakabila ukumona apabuuta, no kumfwa abafyashi babo balelumbulula no kulangisha ukutemwa kwine kwine kuli Lesa muli fyonse bacita.—7/15, ibula 21.
◻ Fintu nshi fyakatama pa kuti isambililo lya lupwa lilefumamo cimo?
Isambililo lya lupwa lilingile ukucitwa lyonse. Mufwile ‘ukulubula inshita’ (NW) ku kusambilila. (Abena Efese 5:15-17) Inshita sha kusambilila Baibolo muleshilenga ukuba ishacincimuka ku bana. Pa kuti abana baipakishe, bafwile ukuyumfwe fyo nababimbwamo.—8/1, amabula 26, 28.