Ukukosha Ukutetekela Kwesu mu Cebo ca kwa Lesa

ABANTU abengi balibelenga Baibolo ukucila ibuuku ilili lyonse. Lelo ni banga batetekela fintu ilanda? Baibolo iine isose fyo “tabali na citetekelo bonse.” (2 Abena Tesalonika 3:2) Mu kumonekesha, tatufyalwa ne citetekelo. Cifwile ukulundululwa. Nangu ni abo bakwata icitetekelo tabafwile ukucisenda mu kwanguka. Icitetekelo kuti caonaika no kufwa. E ico, ukubombesha kulakabilwa pa kuba “abatuntulu mu citetekelo.”—Tito 2:2.

Kanshi Ibumba Litungulula ilya Nte sha kwa Yehova lyakwete umulandu usuma uo lyasalile “Ukutetekela Icebo ca kwa Lesa” ngo mutwe wa mabungano aya citungu aya 1997/98. Amamilioni ya Nte na bambi muli fyo bali ne shuko lya kubungana ku kukosha icitetekelo cabo mu Cebo ca kwa Lesa.

Icebo ca kwa Lesa E Cine—Ishinte lya Citetekelo Cesu

Uyu wali e mutwe wa bushiku bwa kubalilapo ubwe bungano. Lyatendeke na mashiwi ya kutasha bonse abasangilweko. Ukusangwako kwi bungano cali bushinino bwa mucinshi kuli Baibolo. Ifipusho fya kulenga umo ukutontonkanya, nalyo line, fyalipushiwe ukukuma ku musango wa citetekelo cesu: ‘Bushe kuti twayasukila pa fintu twasuminamo, ukubomfya Baibolo nge ntulo ya fyasuko? Bushe tulatasha pa lwa ca kulya ca ku mupashi, ukukanamona Baibolo, ukulongana, ne mpapulo shashimpwa pali Baibolo mu kwanguka? Bushe tulekula mu kutemwa, ukwishiba kwalungikwa, no mucetekanya?’ Kalanda akoseleshe bonse ukukutika mu kusakamanishisha ati “ili Bungano lya Citungu ilya ‘Kutetekela Icebo ca kwa Lesa’ lyapekanishiwe ku kutwaafwa ukuiceeceeta no kupima ubukulu bwa citetekelo cesu umo umo.”

“Ukwendela mu Kutetekela, Te mu Kumona,” wali e mutwe we lyashi likalamba. (2 Abena Korinti 5:7) Kalanda asosele fyo “icitetekelo ca bantu basanguka Inte sha kwa Yehova tacaba ni bucisuminesumine.” Fintu ico caba ica cine! Icitetekelo cine cine tacaba cisuminesumine fye. Cashimpwa pa fya cine cine. Pa AbaHebere 11:1 patila: “Awe icitetekelo e shintililo lya fintu tulecetekela, ni nte ya fintu ifishimonwa.” Kalanda asosele ukuti: “Nga ca kuti mu cine cine tuli no kwendela mu kutetekela, tukabila icitetekelo cashika.” Tatukabila ukwishiba fyonse pa lwa nshila ne nshita Yehova akapwishishishamo imifwaile yakwe yonse pantu twendela mu kutetekela, te mu kumona. Fintu twaishiba kale pa lwa wene fitupeela ukucetekela kwakumanina mu maka yakwe aya kufikilisha amalayo yakwe mu kutemwa na mu bulungami.

Ilyashi lyaleti “Abena Kristu Bacaice—Baba Lubali Lwakatama Ulwa Cilonganino,” lyacinkwileko abacaice fintu baba aba mutengo kuli Yehova. Balikoseleshiwe ukukula lwa ku mupashi pa kukonkelela mabuyo pamo nga ukubelenga Baibolo yonse no kukumanisha ififwaikwa fya kuipeela no lubatisho. Nga ca kuti umo asalapo amasomo yatantalilako, imifwaile yaba kuipangasha ukubombela Lesa bwino, lelo uyu uli mulandu akapingulapo umwine na bafyashi. Amasomo ya ku mubili kuti yabomba imifwaile isuma nga ‘twasuminisha ifyacilamo’ ifyayampana ne citetekelo cesu.—Abena Filipi 1:9, 10.

“Fipimo fya kwa Ani Mukonka?” e lyashi lya mbali shitatu mu kukonkana ilyaishilepo. Ukutetekela Icebo ca kwa Lesa kulatukunta ukukakatila ku fipimo fya mu Baibolo. Abena Kristu balomfwila amafunde ne fishinte fya kwa Yehova. Ku ca kumwenako, Amalembo yatusoka ukukanabomfya imilandile ya miponto no musaalula. (Abena Efese 4:31, 32) Kalanda aipwishe ati, “Lintu mwakalifiwa, bushe mulapontela umwina mwenu nelyo abana benu?” Kwena ico te kuti cilange imibele ya Bwina Kristu. Lesa alikwata ifipimo na pa lwa mimonekele ya pa lwesu. Abena Kristu bafwile ukufwale ‘fiyene, pamo no bufuuke.’ (1 Timote 2:9, 10) Ishiwi lya kuti “ubufuuke” lilangilila itontonkanyo lya mucinshi wa pa lwenu, ukuyumfwa kwa mucinshi, ukukanacishamo, kabili lilangililo kulinga. Icitukunta caba kutemwa bambi no kutungululwa ne fishinte fya Baibolo no kwishiba icalinga.

Amalyashi yabili ayakonkelepo yali kulanshanya kwa cikomo cimo na cimo pa AbaHebere 3:7-15 na 4:1-16. Tulasokwa muli ifi fikomo fya mu Baibolo pa lwa busanso bwa ‘kuumikwa ku longolo lwa lubembu.’ (AbaHebere 3:13) Ni shani fintu twingacimfya mu kulwisha ulubembu? Yehova alatwaafwa ukupitila mu Cebo cakwe. Mu cine cine, “Icebo ca kwa Lesa ca mweo, kabili caliluma kabili . . . cilingulula amatontonkanyo na mapange ya mutima.”—AbaHebere 4:12.

“Icitabo ca Bantu Bonse” lyali e lyashi lya kulekelesha pa bushiku bwa kubalilapo ubwe bungano. Lyaebekeshe bucine, ukulungika, no bucindami bubomba ubwa Baibolo. Fintu cali ica kucincimusha lintu kalanda abilishe ukufuma kwa broshuwa mupya uwa mabula 32 uwakwata umutwe wa kuti A Book for All People! Ulu lupapulo lupekanishiwilwe maka maka abantu abashaishiba ifingi pali Baibolo nangu ca kuti ba masomo ya pa muulu. Amashiwi ya kupelako muli ili lyashi yaleti: “Abantu bafwile ukuibebetela abene Icebo ca kwa Lesa. Tuli abashininwe fyo nga ca kuti baibebetela abene, bakasuka bakamone ukuti ici citabo caibela, Baibolo, mu cine cine citabo ca bantu bonse!”

Pashanyeni “Kawaminisha wa Citetekelo Cesu”

Pali Yesu Kristu, “Kawaminisha wa Citetekelo Cesu” e po uyu mutwe wa lyashi uwa bushiku bwa cibili ubwe bungano walelanda maka maka. Tulekabila ‘ukukonka mu makasa yakwe.’ (AbaHebere 12:2; 1 Petro 2:21) Abengi mu Kristendomu babebo kuti: ‘Sumina fye muli Yesu ninshi capwa wapusuka!’ Lelo ici ninshi calala capwa pa lwa citetekelo? Baibolo isosa ukuti “icitetekelo icabule milimo ninshi califwa.” (Yakobo 2:26) Kanshi pa mbali ya kusumina wene, tufwile ukubomba imilimo Yesu abombeleko, maka maka ukupitila mu kubilisha imbila nsuma ya bufumu bwa kwa Lesa.

Programu ya lucelo yatontomeshe pa mulimo wa kushimikila. Tufwile ukuba abaswatuka mu kubilisha imbila nsuma ye pusukilo ukupala Paulo. (Abena Roma 1:14-16) Yesu ashimikile ku bantu apali ponse. Nangu ca kuti ubutumikishi bwa lyonse ubwa ku ng’anda ne ng’anda buletunguluka bwino, abantu abengi ilelo tabasangwa pa ng’anda lintu twayako. (Imilimo 20:20) Abengi ninshi bali ku sukulu, ku ncito, ku matuuka, nelyo pa lwendo. Muli fyo, tukabila ukushimikila pa cintubwingi na konse kuntu twingasanga abantu.

Ilyashi lyaleti “Mube Abalimbwa Kabili Abaikashiwa mu Cine” lyatucinkwileko pa lwa mpendwa ikalamba iya basambi abapya abalebatishiwa—1,000 nga kwakanya pa bushiku bumo bumo! Aba bapya balekabila ukuba abalimbwa no kwikashiwa mu kushika mu cine. (Abena Kolose 2:6, 7) Kalanda alondolwele ukuti imishila ya cimenwa ilatinta amenshi ne fya kulya pamo pene no kwikasha icimenwa. Mu kupalako, abasambi abapya kuti baba abaikashiwa mu cine ukupitila mu nshila ishisuma ishe sambililo lya pa lwabo no kubishanya kwa kukuulilila.

Uku kufunda kwali ukwalinga sana ku baleya ku lubatisho. Ukukonka ica kumwenako ca kwa Yesu, amabumba ya basambi abapya balibatishiwe pa bushiku bwa cibili ubwe bungano. Ilyashi lyaleti “Ukutetekela Icebo ca kwa Lesa Kutungulula ku Lubatisho” lyacinkwileko abaleya ku lubatisho ukuti ukutumpikwa mu menshi cipilibula ukufwa ku bumi bwabo ubwa bukaitemwe ubwa kale. Lintu batumpulwa cipilibulo kuti batampa ubumi ubupya ubwa kucita ukufwaya kwa kwa Lesa.

Ilyashi lyaleti “Lwileni Icitetekelo” lyashimpilwe pe buuku lya mu Baibolo ilya kwa Yuda. Twalikoseleshiwe ukucingilila icitetekelo cesu ukupitila mu kucincintila ukusonga kwabipa pamo nga bucisenene, bucipondoka, no busangu. Mu kukonkapo, abafyashi—maka maka bawishi—balipeelwe ukwafwa kwaibela mu lyashi lyaleti “Sungeni aba mu Ng’anda Yenu.” Ca mu Malembo ukupayanishisha ulupwa ifyo lulekabila lwa ku mupashi, ku mubili, na mu nkuntu. (1 Timote 5:8) Inshita, ukumfwana, no kupalamisha filafwaikwa pa kuti ici cicitwe. Mu kushininkisha, ukubombesha kwa bafyashi ba Bwina Kristu ku kukushisha abana mu cine kulenga Yehova Lesa ukuba ne nsansa.

Ilyashi lya kukonkana lyaleti, “Tuleya ku Ng’anda ya kwa Yehova,” lyakuulile ukutasha pa lwa kulongana kwa Bwina Kristu. Kulatulenga ukupemwinako ku masakamika ya ici calo. Ni pa kulongana epo tukoseleshanya no kulanga abasumina banensu ukuti twalibatemwa. (AbaHebere 10:24, 25) Ukulongana kulatwaafwa ukunona ukulamuka kwesu ukwa kusambilisha, kabili kulatwaafwa ukulenga ukumfwikisha kwesu ukwa mifwaile ya kwa Lesa ukushikilako. (Amapinda 27:17) Shi twikatala atuitalusha ukufuma ku cilonganino, tuleibukisha amashiwi ya kwa Yesu aya kuti: “Pantu ukuli babili napamo batatu abalonganina mwi shina lyandi e ko ndi mu kati kabo.”—Mateo 18:20.

“Umusango wa Citetekelo Cenu Uleeshiwa Nomba,” lyali e lyashi lya kulekelesha. Icitetekelo icishaeshiwa tacaba na mutengo uwashininkishiwa, e lyo no musango wa ciko tawishibwa. Capala kuli cheke uo indalama sha uko shishilapokwa. Bushe mu cituntulu nga watwele uyo cheke bakakupeela indalama shilembelwepo? Mu kupalako, icitetekelo cesu cifwile ukweshiwa ku kushininkisho kuti calikwatamo cimo no musango wa ciko nga wa cine. (1 Petro 1:6, 7) Kalanda atile: “Inshita shimo ifya kusabankanishishamo amalyashi pamo pene na balashi balabepwa kuli bashimapepo na basangu ukuti batubepeshe, ukulande fya bufi pa lwa fintu twasuminamo nga Bena Kristu ne nshila twikalilamo. . . . Bushe tukasuminisha abo baapofushiwa na Satana ukututiinya no kunenuka no kulenga ukuyumfwa insoni pa lwa mbila nsuma? Bushe tukasuminisha ubufi babepesha icine ukuti bukambukile ukulongana kwesu lyonse ne mibombele yesu iya kushimikila? Nelyo bushe tukashangila no kuba abakosa kabili abacilapo ukupampamina pa kubila icine pa lwa kwa Yehova no Bufumu bwakwe?”

Ikaleni no Mweo ku Kutetekela

Umutwe wa pa bushiku bwa citatu ubwe bungano washimpilwe pa mashiwi ya kwa Paulo ayatila: “Awe, calangwo kuti takuli uwalungamikilwa ku Malango ku menso ya kwa Lesa; ico, Uwalungama ni ku kutetekela e ko akekalila no mweo.” (Abena Galatia 3:11) Cimo ica fyapulilemo ulucelo cali lyashi lya kukonkana ilyaleti “Ifyebo Yoele Aseseme pa lwa Nshiku Shesu.” Ibuuku lya kwa Yoele lilanda pa lwa nshita yesu mu kuba na mashiwi ya kucincimusha aya kuti: “Iye ubushiku ubo! pantu nabupalamo bushiku bwa kwa Yehova, kabili buleisa nga pumpunta uwafuma ku Wa maka yonse.” (Yoele 1:15) Ukupala bamakanta bashilekulukamo, Abena Kristu basubwa tabasuminisha icili conse ukupumfyanya ukubilisha Ubufumu muli shino nshiku sha kulekelesha.

Ibuuku lya kwa Yoele lilatupa ne subilo, pa kusoso kuti: “Onse uukalilila kwi shina lya kwa Yehova akapokololwa.” (Yoele 2:32) Ici calicila pa kubomfya fye ishina lya kwa Yehova. Ukulapila kwa cine cine kulakabilwa, kabili cisanshamo ukuleka ukucita ububifi. (Yoele 2:12, 13) Takuli kushingashinga pantu Yehova mu kwangufyanya akapingula ifyalo, kwati fintu acitile kuli Moabu, Amone, ne citungu ca mpili ica Seiri mu nshiku sha kwa Yehoshafati Imfumu ya kwa Yuda.—2 Imilandu 20:1-30; Yoele 3:2, 12.

Bonse balikoseleshiwe ku lyashi ilyaleti “Langeni Icitetekelo pa Kulalolela Yehova.” Apo nomba tuli mu kati na nkati ka nshita ya mpela, kuti twalolesha pa malayo ya kwa Yehova ayafikilishiwa kale, kabili mu kuswatuka tulolesha ku fintu fyalaswa ficitike ku ntanshi. Abantu ba kwa Yehova bafwile ukutwalilila ukutekanya, ukwishiba ukuti Lesa akafikilisha fyonse ifyo alaya.—Tito 2:13; 2 Petro 3:9, 10.

Programu ya lucelo yasondwelele ne cilangililo icaleti “Sungilileni Ilinso Lyenu Ilituntulu.” Ici cilangililo ca fintu filecitika icine cine, catukoseleshe ukuibebeta ukulosha ku fintu tumona ifikonkelelo fya ku mubili. Tufwile ukumfwila ukufunda kwa kwa Yesu ukwa kusunga ilinso lyesu ilituntulu, no kutontomesha fye pa Bufumu bwa kwa Lesa, nga tufwaya ubumi ukukanabamo amasakamika, te mulandu na kuntu twikala.—Mateo 6:22.

Ilyashi lya pa cintubwingi lyakwete umutwe wa kucincimusha uwaleti “Icitetekelo ne Nshita Yenu iya ku Ntanshi.” Lyapeele ubushinino bwa kuti intungulushi sha buntunse te kuti shipwishe amafya ya mu calo. (Yeremia 10:23) Ifyacitika ku bantunse ukufuma ku kale e filecitika na lelo—pa cipimo cakulilako kabili icacilamo bonaushi nga nshi. Ni shani fintu Inte sha kwa Yehova bamona inshita ya ku ntanshi? Twasumine fyo abantunse ba busumino balikwata inshita ya ku ntanshi iya nsansa mu kutekwa no Bufumu bwa kwa Lesa. (Mateo 5:5) Lesa akafikilisha amalayo yakwe pa kuti bakamwenemo bonse abatetekela Icebo cakwe, icitukoselesha ukuti: “Fwayeni Yehova ilyo engasangwa, mulilileni ilyo ali mupepi.”—Esaya 55:6.

Yesu aipwishe icipusho cakakala ilyo aletontonkanya pa bushiku bwesu. Aipwisho kuti: “Umwana wa muntu ilyo akesa, bushe akasange citetekelo pano nse?” (Luka 18:8) Ilyashi lya kulekelesha lyapitulwike muli programu ya citungu kabili lyalangilile ubushininkisho bwabulo kutwishika ukuti kwaliba abantu abatetekela Icebo ca kwa Lesa, nangu ca kuti twikala mu calo cabule citetekelo kabili icalemenena ku fya pano nse.

Nalyo line, kuti twaipusha umo umo atuti, ‘Bushe naliba pa kati ka bakwata icitetekelo icishipungaila muli Lesa ne Cebo cakwe?’ Ibungano lya Citungu ilya “Ukutetekela Icebo ca kwa Lesa” lifwile ukutwaafwa ukwasuka atuti “ee” kuli co cipusho. Kabili fintu tuli aba kutasha kuli Yehova pa kukosha icitetekelo cesu muli wene ne Cebo cakwe icapuutwamo, Baibolo!

[Ifikope pe bula 24]

Abengi aba kuitemenwa babombele mu nsansa ukupayanishisha amakana ya balesangwako umwa kusendama

[Ifikope pe bula 25]

Ifibansa fya mangalo ifikalamba fyalibomfiwe ukushinguluke sonde

[Icikope pe bula 25]

L. A. Swingle uwa mwi Bumba Litungulula alelangisha broshuwa umupya uwafumine

[Icikope pe bula 26]

Abengi balibatishiwe ukulangilila ukuipeela kwabo kuli Yehova

[Ifikope pe bula 27]

Ababungene balimbile inyimbo sha Bufumu mu buseko. Akakope kali mu kati: Icilangililo caleti “Sungilileni Ilinso Lyenu Ilituntulu”