Mulandu Nshi Uwa Kubela Aba Kutasha?
PA MULANDU wa kulepulwa mu mongololo, Harley apatikishiwe ukwalula incito yakwe iya kubombela pali bamashini no kutendeka bukalaliki bwa mu ofesi. Lintu Harley aipushiwe ifyo ayumfwile pali uku kwaluka atile: “Ndafuluka ukubomba na bamashini. Lelo, mu bufumacumi, nintemwa incito ndebomba ukucila iya kale.”
Pa kulondolola icamulengele ukwikushiwa, Harley atile: “Ni pa mulandu wa mibele ya bantu momba na bo. Uunyangalila pa ncito na bo momba na bo balatasha pa fyo momba, ukucila balya nalebomba na bo kale, kabili tabashimunuka ukuntasha. Ici calingafwa nga nshi.” Pali nomba Harley abomba ne nsansa, pa mulandu wa kuti alayumfwa ukuti alapendelwako kabili alakabilwa.
Amashiwi ya kutootela nelyo aya kutasha, yalasangalasha umutima mu cine cine, lintu yasoswa apalekabilwa. Lubali lumbi, icifuma mu kukanatasha, kuti caba ca kufuupula kwati fintu Shakespeare alembele ukuti: “Abantu abashitasha bapala umwela wa mpepo.” Ku ca bulanda, abengi tababatasha.
Sengaukeni Ukukanatasha
Inumbwilo sha kutasha kwafumaluka shileya shilecepelako muli cino calo. Ku ca kumwenako, kalemba umo aipwishe ukuti: “Nga ca kuti nabwinga alasanga inshita ya kulaalika abantu 200 ku bwinga, mulandu nshi ashingasangila nshita ya kubatasha pa fya bupe fya pa bwinga 163 ifyo bamupeele?” Ilingi line abengi bafilwa fye no kusoso kuti “natasha.” Icilepyana pa kutasha mibele ya bukaitemwe. Iyi mibele ni imo iya fya kwishibilako inshiku sha kulekelesha. Umutumwa Paulo asokele ukuti: “Mufwile ukwishiba ukuti mu nshiku sha kulekelesha mukaba amasanso ayengi. Abantu bakaitemwa icabipisha . . . Tabakaletasha nangu panono.”—2 Timote 3:1, 2, Phillips.
Lubali lumbi, icipyana pa kutasha caba kutatakula kwa bumbimunda. Inumbwilo sha kutasha shifuma ku mutima ukwabula itontonkanyo lya kufwaya ukumwenamo. Nangu ni fyo, ukutasha kwa bumbimunda, uko ilingi line ukushafumaluka kabili ukwa kukukumya, kuti kwaba pa mulandu wa kufwaya ukupeelwe cifulo nelyo ukumwenamo ubunonshi bwa nsoni. (Yuda 16) Pa mbali ya kutumpika abaletashiwa, ifyebo fya musango yo ifya kutembatemba fimoneka kwati fifuma mu cilumba na matutumuko. Nani, kanshi, uwingafwaya ukutashiwa mu bumbimunda? Lelo ukutasha kwine kwine kulapembesula apakalamba.
Uuletasha alamwenamo mu kucite fyo. Icikabilila omfwa pa mulandu wa kutootela kwa kufuma ku mutima cimulenga ukuba ne nsansa no mutende. (Linganyeniko Amapinda 15:13, 15.) Kabili apo ukutasha mibele iisuma, kulamutalusha ku nkuntu shabipa pamo nga ubukali, akalumwa, no kufiitwa.
“Mube Abatootela”
Baibolo itucincisha ukulundulula umupashi wa kutasha, nelyo ukutootela. Paulo alembele ukuti: “Muli fyonse tooteleni; pantu uku e kufwaya kwa kwa Lesa ukwa kuli imwe muli Kristu Yesu.” (1 Abena Tesalonika 5:18) Kabili Paulo afundile abena Kolose ukuti: “Umutende wa kwa Kristu muleke uteke mu mitima yenu . . . Kabili mube abatootela.” (Abena Kolose 3:15) Amalumbo ayengi yakwatamo inumbwilo sha kutootela, ukulangilila ukuti ukutasha kwa ku mutima mibele isuma iya bukapepa. (Ilumbo 27:4; 75:1) Cine cine, Yehova Lesa alatemunwa nga twaba abatootela mu mikalile ya cila bushiku.
Lelo fintu nshi muli ci calo cishitootela ifilenga ukuti cibe icayafya nga nshi ukulundulula umupashi wa kutasha? Ni shani fintu twingaba abatootela mu mikalile ya cila bushiku? Ifi fipusho fyalaasukwa mu cipande cikonkelepo.