Bushe Muleibukisha?

Bushe bamagazini ba Ulupungu lwa kwa Kalinda aba nomba line balimwaafwile mu nshila ibomba? Bushe kuti mwaesha nga muleibukisha pa kwasuka ifipusho fyakonkapo?

◻ Bupusano nshi bwaba pa kati ka “bushiku bwa kwa Shikulu” na “ubushiku bwa kwa Yehova”? (Ukusokolola 1:10; Yoele 2:11)

“Ubushiku bwa kwa Shikulu” busanshamo ukufikilishiwa kwa fimonwa 16 ifyalondololwa mu Ukusokolola ifipandwa 1 ukufika ku 22 ne fya kuponako fya kutendekelako fintu Yesu asobele pa kwasuka icipusho abasambi bakwe baipwishe pa lwa cishibilo ca kubapo kwakwe. Ilyo ubushiku bwa kwa Shikulu bukafika pa kalume, elyo ubushiku bwa kutiinya ubwa kwa Yehova bukabalamuka lintu akapingula icalo ca kwa Satana icabotelela. (Mateo 24:3-14; Luka 21:11)—12/15, ibula 11.

◻ Fintu nshi fimo ifyapulamo muli Baibolo wa kwa Makarios?

Ishina Yehova limoneka ukucila pa miku 3,500 muli Baibolo ya kwa Makarios. Uwasoma impapulo sha mipepele isha cina Russia atile: “Ubupilibulo bwalikakatila ku fyalembelwe mu ciHebere, kabili ululimi lwabomfiwa lwaba ulwine lwine kabili ulwalinga icilelandwapo.”—12/15, ibula 27.

◻ “Cine” nshi Yesu asosele ukuti cikatulubula? (Yohane 8:32)

Pa kulumbula ukuti “icine,” Yesu aloseshe ku fyebo fyapuutwamo na bulesa—maka maka ifyebo fyakumine ukufwaya kwa kwa Lesa—ifyabakwa muli Baibolo.—1/1, ibula 3.

◻ Ni bani bemininako Yehu wa muno nshiku na Yehonadabu?

Yehu emininako Yesu Kristu, uyo emininwako pe sonde na “Israele wa kwa Lesa,” Abena Kristu basubwa. (Abena Galatia 6:16; Ukusokolola 12:17) Nga fintu fye Yehonadabu aishile mu kukumanya Yehu, “ibumba likalamba” balifuma mu fyalo no kwisa mu kwaafwilisha abeminishi ba pe sonde aba kwa Yesu. (Ukusokolola 7:9, 10; 2 Ishamfumu 10:15)—1/1, ibula 13.

◻ Cipilibula nshi ‘ukweenda na Lesa’? (Ukutendeka 5:24; 6:9)

Cipilibule fyo, abalecite co, pamo nga Enoke na Noa, baisungile mu nshila iyalangishe ubushininkisho bwa citetekelo cakosa muli Lesa. Bacitile cintu Yehova abakambishe no kutungulula ubumi bwabo mu kumfwana na cintu baishibe pa lwa wene ku fyo alebombelamo na bantunse.—1/15, ibula 13.

◻ Mulandu nshi umuntu alingile ukupekanishisha libela ilyo talafwa?

Mu nshila imo, ukupekanishisha kwa musango yo ca bupe ku lupwa lwa umo. Cilangilila ukutemwa. Cishininkisha ukufwaisha kwa ‘kusunga aba mu ng’anda yakwe’ nangu ca kuti afwa. (1 Timote 5:8)—1/15, ibula 22.

◻ Cinshi “icipingo ca kale” cabombele? (2 Abena Korinti 3:14)

Cakwete ifitontonshi fya cipingo cipya, kabili amalambo ya ciko aya kubwekeshabwekeshapo, yalangilile ukuti umuntu alekabila sana ukulubulwa ku lubembu ne mfwa. Cali ni “kafundisha . . . ukufika na kuli Kristu.” (Abena Galatia 3:24)—2/1, ibula 14.

◻ Ni mu nshila nshi icipingo cipya cabela ica muyayaya? (AbaHebere 13:20)

Ica kubalilapo, ukupusanako ne cipingo ce Funde, tacakapyanikwepo. Ica bubili, ifya kufumamo mu mulimo wa ciko fya ciyayaya. Kabili ica butatu, abatekwa ba pe sonde aba Bufumu bwa kwa Lesa bakatwalilila ukunonkelamo mu kutantika kwa cipingo cipya mu Myaka Ikana.—2/1, ibula 22.

◻ Bunonshi nshi bufuma mu kuba uwa kutootela?

Ubusuma umuntu omfwa pa mulandu wa kutootela kwa kufuma ku mutima cimulenga ukuba ne nsansa no mutende. (Linganyeniko Amapinda 15:13, 15.) Apo ukutasha mibele isuma, kulamutalusha ku nkuntu shabipa pamo nga ubukali, akalumwa, no kufiitwa.—2/15, ibula 4.

◻ Ni mu fipingo nshi abafyalwa ku mupashi baingila?

Icipingo cipya, ico Yehova apanga na Israele wa ku mupashi, ne cipingo ca Bufumu, ico Yesu apanga na bakonshi bakwe abasubwa abakonka mu nkasa shakwe. (Luka 22:20, 28-30)—2/15, ibula 16.

◻ Mitebeto nshi iikalamba itatu intu Abena Israele bakambishiwe ukusefya?

Umutebeto wa Mukate Ushatutumuka, uwalekonka fye pa Ca Kucilila ca pa Nisani 14; Umutebeto wa Milungu, uwalebako pa bushiku bwalenga 50 ukupenda ukufuma pa Nisani 16; Umutebeto wa Kulonganika, nelyo Umutebeto wa Nsakwe, mu mweshi wa 7. (Amalango 16:1-15)—3/1, ibula 8, 9.

◻ Mulandu nshi cabela lishuko ukusangwa ku kulongana kwa Bwina Kristu?

Yesu atile: “Pantu ukuli babili napamo batatu abalonganina mwi shina lyandi e ko ndi mu kati kabo.” (Mateo 18:20; 28:20) Na kabili inshila yacindama umo ico ca kulya ca ku mupashi cishila yaba kupitila mu kulongana kwa cilonganino no kulongana kukalamba. (Mateo 24:45)—3/1, ibula 14.

◻ Ni kwi kwafumine ishina Nimrode?

Abasoma abafulilako batontonkanyo kuti ishina Nimrode te lyo bamwinike lintu afyelwe. Mu cifulo ca ico, balimona nge shina ilyainikwe mu kupita kwa nshita, ukulingana ne mibele yakwe iya bucipondoka iyaishilesokoloka pa numa.—3/15, ibula 25.

◻ Lwacindama shani ulupwa mu bwikashi bwa bantunse?

Ubuntunse bulakabila ulupwa. Ifyacitika ku numa filango kuti ilyo ulupwa lwanakuka, ubukose bwa mekashi no bwa fyalo bulanaka. E co ulupwa lulambukila nga nshi ifyo ubwikashi buli no kuba ne fyo abana bali no kuba ne nkulo sha ku ntanshi.—4/1, ibula 6.

◻ Bushininkisho nshi butatu ubwa kuti Baibolo Cebo ca kwa Lesa?

(1) Yalilungika mu fya sayansi; (2) yabamo ifishinte fishilola ukwalola umwela ifibomba mu mikalile ya pali nomba; (3) yabamo amasesemo ya kulungatika ayafikilishiwa, nga fintu ilyashi lya kale lilanga.—4/1, ibula 15.