Imfumu Ya Fyuma Na Mano
Bushe muletontonkanya ifyo ifyuma kuti fyamuletela insansa? Nga umo amupeele indalama ishingi, bushe te kuti mutemwe? Napamo kuti mwatemwa. Cilemoneke fyo kuti mwafwayako inshila mwingashibomfeshamo.
CA CINE, kwaliba ifya kushita ifingi ku kuwamyako imikalile no kuipakisha. Indalama na kabili kuti shabomba nge “cintelelwe” ca kuubamo lintu kwaima amafya yabulo kwenekela, pamo nga amalwele nelyo ubuloofwa.—Lukala Milandu 7:12.
Lelo kwampana nshi kwaba pa ndalama ne nsansa? Bushe mutontonkanya nge fitontonkanya abengi, ukuti ifyuma e fileta insansa? Ukwasuka ifi fipusho kuti kwakosa pantu calyanguka ukupima indalama, nelyo ukushipenda, lelo insansa te kuti shipendwe. Te kuti mupime insansa mu ca kulingililako kufina.
E lyo, kabili, abakankaala bamo bamoneka aba nsansa, ilintu abakankaala bambi tabaasansamuka. E fyaba na bapiina. Nalyo line, abengi—nangu fye abaaba ne fyuma kale—basumina ukuti indalama ishingi shikabaletela insansa ishingi.
Umuntu umo uwalembele pa milandu ya musango yo ni Solomone Imfumu ya Israele wa pa kale. Aali umo pa baume bakwatishe ifyuma ababalile ababako. Kuti mwabelenga ubulondoloshi bwa fyuma fyakwe ifishaifulila mu cipandwa calenga 10 ice buuku lya mu Baibolo ilya 1 Ishamfumu. Ku ca kumwenako, moneni ukuti icikomo 14 citila: “Ukufina kwa golde uwaleisa kuli Solomone mu mwaka umo kwali bakikari ba golde imyanda mutanda na makumi mutanda na mutanda.” Ico cipendo cilingene na matani 25 aya golde. Ilelo, uyo golde kuti acila nga nshi pa madola ya ku United States amamilioni 200!
Lelo, te fyuma fyeka Solomone akwete; Lesa alimupaalile ukumupeela mano. Baibolo ishimika ukuti: “Imfumu Solomone yakulile ukucile shamfumu shonse isha pano isonde ku bucindami na ku mano. Na ba pano isonde ponse balefwaye cinso ca kwa Solomone, ku kuumfwa amano yakwe ayo Lesa apeele mu mutima wakwe.” (1 Ishamfumu 10:23, 24) Na ifwe kuti twanonkelamo mu mano ya kwa Solomone, apantu ifyo alembele filasangwa mu Baibolo. Natumone ico alandile pa lwa kwampana kwaba pa ndalama ne nsansa.
[Abatusuminishe Ukubomfya Icikope pe bula 3]
Ukufumishiwa muli Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart