Umulandu Bamo Balealwila Imipepele Yabo

Ku bengi, imipepele yaba fye ca kwishibikilwako. Kuti yaishibisha uko umuntu limo limo aya pa Mulungu, uko akoopila nelyo ukupwa, no ko akashiikwa. Lelo tailondolola umusango umuntu abelamo nelyo ifyo aishiba ne fyo asuminamo. Ku ca kumwenako, ukufwailisha kumo kwasangile ukuti hafu wa baitunga ukuba Abena Kristu tabaishibe uwalandile Ilyashi lya pa Lupili. Iye, apo fye na kateka walumbuka Mohandas Gandhi, umuHindu alimwishibe!

BUSHE catupapusha ukuti abantu abashaishiba ifingi pa lwa mipepele yabo balafuma muli yene? Nakalya. Nangu ni fyo, ico na kabili tacaba icishingasengaukwa. Abaafwiwa ukusambilila pa lwa Baibolo ilingi line balasunguka pa kumone fyo Baibolo ibafwilisha mu fingi. Baibolo iine isoso kuti: “Ine ndi Yehova Lesa obe, uukusambilisho kuti [umwenemo, NW], uukwensha mu nshila iyo ufwile ukuyamo.”—Esaya 48:17.

Cinshi abaaba ne nsala ya ku mupashi iishaikushiwa bengacita? Tabafwile ukuleka ukubombela Lesa! Mu cifulo ca ico, bafwile ukupenenga muli Baibolo no kumonamo ifyo Lesa umwine abasokolwela.

Ifyasuko ku Fipusho Fyakosa

Ilyo Bernd ali ne myaka 7, alimweneko uko banyina balefwa.a Mu nshita ya bwaice bwakwe bonse, aaleipusha ukuti, ‘Bamayo baba kwi? Mulandu nshi ningakulila ukwabula bena?’ Ku bwaice, Bernd aali uwacincila ku calici. Apo alyangilweko ku kucula kwa bantu, aleenekela ukwisatendeka incito ya kwaafwa abantu mu fyalo ifipiina. Nalyo line, aalesakamikwa ne fipusho ifyo icalici lyakwe lyafililwe ukwasuka bwino bwino.

Lyene Bernd alandile no munankwe wa ku sukulu uwali ni umo uwa Nte sha kwa Yehova. Uyu mwaice alangile Bernd ukufuma mu Baibolo ukuti banyina tabaishibapo akantu nangu kamo, balifwa. Bernd aishibe ifikomo ifingi ifya mu Baibolo ifilondolole ci, pamo nga Lukala Milandu 9:5 apatila: “Abafwa bantu abashaishiba kantu nangu kamo.” E co Bernd taali na mulandu wa kusakamikwa nampo nga banyina balecushiwa mu musango umo uwa mutwala—nelyo uwacilapo kubipa. Nangu line icifundisho ca kuti umweo taufwa cilasambilishiwa mu mipepele iingi, Bernd alimwene ukufuma muli Baibolo ukuti umweo wa muntu waba fye e muntu wine. Ilyo umuntu afwa, ninshi umweo wafwa. “[Umweo, NW] uubembuka e ukafwa.”—Esekiele 18:4.

Na kabili Bernd asambilile pa lwe subilo lishaiwamina ilya bafwa. Aliibelengele mwi buuku lya Baibolo ilya Imilimo ukuti: “Kukabo kwima ku bafwa kwa balungama na bashalungama.” (Imilimo 24:15) Fintu aali uwacankwa pa kwishibo kuti uku kubuuka kukacitikila pano pe sonde, ilyo Lesa akasangula paradise!—Ilumbo 37:29; Ukusokolola 21:3, 4.

Tapakokwele na kukokola ifyo Bernd alekabila lwa ku mupashi fyalikushiwe ukupitila mwi sambililo lya Baibolo ilya cine cine. Bernd taasulilile fye imipepele. Mu cifulo ca ico, ashiile icalici ilyafililwe ukwikusha insala yakwe no kupokelela umusango wa kupepa uwashimpilwe mu kushangila pali Baibolo. Atila: “Nomba napapita imyaka 14 apo ico cacitikile, kabili nshabala njumfwa ubulanda ukuti nalishiile icalici lyandi. Nomba nalishiba ukuti Kabumba te ulenga ukucula. Satana e mulungu wa ino micitile, kabili e washingamwa pa lwa mibele tulepitamo. Lelo Lesa nomba line ali no kufumyapo ububi bonse icalo ca kwa Satana caacita. Na bamayo bene bakabweshiwa mu kubuuka. Mwandi ico cikaba ica buseko!”

Na kabushe, isubilo lya kwa Bernd ilya kubombela mu fyalo fimbi ku kwafwa bantu lyalicitika. Abombela mu calo ca cilendo ukwafwilisha bambi ukusambilila pa lwa Bufumu bwa kwa Lesa, inshila ine ine iya kupwishishamo ukucula kwabo. Amamilioni ya bantu ukupala Bernd, balisambilila ukuti nomba line Lesa ali no kupwisha ukucula kwa bantunse. Balacankwa ukusango kuti kwalibako imipepele iikusha ukukabila kwabo ukwa ku mupashi.—Mateo 5:3.

Cinshi Ubumi Bwabelako?

Ilintu ifyalo fya ku Masamba filecililako ukukanapoosa amano ku fya mipepele, abengi bepusha ukuti, ‘Cinshi ubumi bwabelako?’ Icasuko cisangwa muli Baibolo, nga fintu Michael aishileishiba. Pa kati ka ba 1970, Michael afwaile ukuilunda kwi bumba lya tupondo. Akwete fye ubuyo bumo mu bumi—ukusansa abo aalemona ukuti e bashingamwa no lufyengo lwa mitekele ya ciCapitalist. Atile “Nshatalile mfuma pa ng’anda ukwabule mfuti.” Ipange lyandi lyali lya kwipaya iminshipendwa ya bapolitishani abakwate fifulo fya pa muulu na ba mitekele ya ciCapitalist ukufika pantu ningapesha. Naliipekenye ukufwilapo.

Michael aleya ku calici, lelo takwali nelyo umo mu calici lyakwe uwali no kulondolola imifwaile ine ine ubumi bwabelako. E co lintu Inte sha kwa Yehova shamutandalile pa ng’anda yakwe no kumulanga ifyasuko fya mu Baibolo ku fipusho fyakwe, Michael alikutikishe. Atendeke ukusangwa ku kulongana ku kupepa pa Ng’anda ya Bufumu iya Nte sha kwa Yehova.

Abanankwe ba kwa Michael balefwaisha ukwishiba pa lwa ubu buseko bupya akwete muli Baibolo. Michael abakoseleshe ukuti, “Mukese ku kulongana pa Mulungu. Mukekaleko icalinga. Nga tamwakatemwe ifyo mukomfwa, lyene mukabwelelemo ku ng’anda.” E fyo cacitike ukuti, pa numa ya lyashi lya maminiti 45 ilyashimpilwe pali Baibolo, abanankwe abengi balifumine mu ng’anda ya Bufumu. Lelo umo—uwe shina lya Susan—alishele. Uyu mukashana alicebushiwe ku fintu aumfwile. Pa numa Michael na Susan balyupene kabili balibatishiwe nge Nte sha kwa Yehova. Michael atile: “Nomba nalishiba ico twabela pano pe sonde. Yehova e watubumbile. Icikalamba ico twabelako mu bumi ca kuti tumwishibe no kucito kufwaya kwakwe. Ico e cileta ukwikushiwa kwa cine!”

Amamilioni ya bantu balishininkisha ici nga fintu Michael ashininkisha. Balomfwila amashiwi ya Baibolo ayatila: “Ukusupula kwa mulandu onse; fyonse nafyumfwika. Bela Lesa akatiina, baka amafunde yakwe; pantu ici e ca buntunse bonse.”—Lukala Milandu 12:13.

Ifyo Mwingacitapo pa Mafya ya mu Bumi

Ukufikilishiwa kwa busesemo busangwa pali 2 Timote 3:1 ubutila: “Mu nshiku sha kulekelesha mukesaba inshita ishayafya,” kulatukuma bonse. Takuli uushilekumanya amafya ya muli ishi “nshita ishayafya.” Lelo Baibolo ilatwafwilisha ifyo twingacitapo.

Langulukeni pa baupana babili, Steven na Olive. Lintu batendeke ukusambilila Baibolo ne Nte sha kwa Yehova, balikwete amafya ya mu cupo, nga yantu abengi abashala bakwatako. Steven alondololo kuti, “Twaleya tulepaatukana. Amabuyo twakwete ne fyo twatemenwe fyalipusene.” Cinshi cabafwile ukukanapaatukana? Steven atwalilila ukusoso kuti, “Inte sha kwa Yehova batulangile ifyo twingabomfya ifishinte fya Baibolo mu mikalile yesu. E wali e muku wa kubalilapo, ukwishiba ifyo cipilibula ukukanaitemwa no kusakamana bambi. Ukubomfya ifishinte fya Baibolo kwalitwikatenye pamo. Nomba tulaipakisha icupo ca nsansa, icashikatala.”

Ukwampana Kwapalamisha na Lesa

Ukulingana no kufwailisha kwa nomba line ukwa Gallup, abena America amaperesenti 96 balisumina muli Lesa, kabili pali aba abengi balapepa kuli wene. Nalyo line, ukufwailisha kwa pa mbali kwalangile ukuti mu myaka 50 impendwa ya basangwa ku calici na kwi sunagoge nomba e lyo icepeleele fye. Abena America nalimo amaperesenti 58 basosa abati balaya ku calici umuku umo mu mweshi umo nelyo ukukanayako. Caliilanga apabuuta, ukuti imipepele tayabapalamika kuli Lesa. Kabili ubu bwafya tabuli fye mu United States mweka.

Linda akuliile mu Bavaria. Aali ni Katolika wapikintika kabili alepepa lyonse. Pa nshita imo ine, aaletiina ifya ku ntanshi. Taishiibepo nangu kamo pa lwa mifwaile Lesa akwatile umuntu. Lintu akumenye fye imyaka 14, Linda akumene ne Nte sha kwa Yehova, kabili ashimiko kuti: “Ifyo basosele fyaleumfwika bwino, e co nalisumine ukupokelele fitabo fibili ifya kwafwa ukusambilila Baibolo no kufibelenga apo pene fye.” Ilyo papitile imyaka ibili, Linda atendeke ukusambilila Baibolo ne Nte sha kwa Yehova. Atila, “Fyonse ifyo nasambilile ukufuma muli Baibolo pa lwa kwa Lesa fyalimo amano.” Linda alilekele ukuya kwi calici lyakwe kabili alibatishiwe nge Nte ya kwa Yehova ilyo ali ne myaka 18.

Cinshi calengele Linda ukwalula imipepele yakwe? Alondololo kuti: “Icalici naaliko lyangafwile ukwishiba ukuti kwalibako Lesa, kabili nalisambilile ukusumina muli wene. Lelo taali uwa cine cine kabili aali ukutali nga nshi. Ukusambilila kwandi ukwa Baibolo takwapeleele fye pa kushininkisha ukuti nalisumina muli Lesa lelo na kabili kwalingafwile ukumwishiba no kumutemwa. Nomba nalikwata ukwampana kusuma ukwa pa lwandi na Lesa ukwaumo mutengo, icintu cimo icacilapo kucindama ukucila icili conse cimbi.”

Imipepele ya Cine Yaliwaminwa Ukuculila!

Bushe imipepele yenu ilamutungulula mu fya ku mupashi no kumulanga ifyo Baibolo ingamwafwilisha ukubombela pa mafya ya mu bumi? Bushe ilasambilisha pa lwe subilo lya ku ntanshi ilyo Baibolo ipeela? Bushe ilamupeela ukwampana kwapalamisha, ukwa pa lwenu na Kabumba, ukwashimpwa pa kwishiba kwalungika ukwa Baibolo? Nga taicite fi, mwicimba. Mu cifulo ca kusuulilila imipepele, sapikeni umusango wa kupepa uwashimpwa mu kukosa pali Baibolo. Lyene mukaba nga balya ibuuku lya mu Baibolo ilya kwa Esaya lyasesemene aliti: “E fyo asosa Shikulu Yehova: Moneni ababomfi bandi bakalya . . . ababomfi bandi bakanwa . . . ababomfi bandi bakasamwa . . . ababomfi bandi bakaanga ku kubuuta ku mutima.”—Esaya 65:13, 14.

[Futunoti]

[Ifikope pe bula 4, 5]

Baibolo ilatwaafwa ukwishiba Lesa no kumutemwa