Bushe Kuti Mwalekanya Icalungama Ku Calubana?
“Naipeye abantu mupepi na 25. . . . Cilansakamika umo shacela. Naikala uwatiinishiwa. Ilyo ntontonkanyapo, ndebukisha ifinso fya bantu naipeye. Ndebukisha fye bwino bwino, kwati nacilabepaya lelo line, nomba line fye. . . . Teti njipeele nsambu pa fyo nacitile.” Ifi e fyasosele V.S.
“Baalinkambishe ukuya mu kwipaya abalwani. . . . Nshashiimunwike ukulatontonkanya ukuti bushe nshayesangako bashikulubantu, banakulubantu na baice. . . . Ifyo naleyumfwa lilya e fyo ndeyumfwa na nomba ukuti nakonkele fye ifyo banjebele, amakambisho yabo e yo nakonkele kabili teti ntile nalilufyenye ukucite fyo.” Ifi e fyasosele W.C.
PA March 16, 1968, abaume babili abasosele amashiwi twabelenga pa, baipeyeko abantu mu nkondo iyo pa numa yaishilemonwa ukuti yali iya bumpulamafunde bwabipisha. Bena pamo na bashilika bambi basanshile akamushi ku Vietnam no kwipayamo imyanda ya banakashi, abana na baume abakoloci, abantu yawe yawe fye. Nomba moneni ifyo ukutontonkanya kwa aba bashilika babili kwapusana. Uwa pa kubala alalangulushiwa nga nshi pa fyo acitile. Uwa cibili ena amona fye ukuti tapali ifyo alufyenye. Bushe cinshi cingalenga ukuti abantu abacitile fimo fiine baletontonkanya ifyapusana nge fyo?
Icasuko calaala muli kampingu, amaka ya kulingulula ayo Lesa atupeela ayatwaafwa ukuipingula mu bufumacumi pa fyo tutontonkanya no kucita. Kampingu caba muntu wa mu kati uutweba icalungama ne calubana.
Lintu kwaba ukupingula pa fintu, abantu bamo batila fye “Pinguleni fye ifyo kampingu wenu alamweba.” Ku ca bulanda, nangu cibe fyo, te lyonse tufwile ukushintilila pali kampingu. Na kabushe, abantu abengi balisuminishako nelyo ukucita bumpulamafunde bwa bukalushi nga nshi, ukwabula no kuti bakampingu wabo babalungulushenapo. (Yohane 16:2; Imilimo 8:1) Kampingu “bwangu bwangu alaleka ukulanda ku bashifwaya ukucita ifyo abeba,” e fyasosele kalemba wa manovelo umuNgeleshi Samuel Butler inshita imo.
Bushe kuti mwashintilila pali kampingu wenu? Cashintilila pa fyo mwafunda kampingu, nge fyo icipande cikonkelepo calatweba.
[Abatusuminishe Ukubomfya Icikope pe bula 3]
Inkondo ilemoneka pa muulu: Icikope ca ba U.S. Signal Corps