Baacitile Ukufwaya kwa kwa Yehova

Paulo Ashimikila mu Kushipa pa Ntanshi ya Bashimucindikwa

UBUPUSANO pa kati ka baume babili bwali ubwamonekesha. Umo afwele icilongwe, e lyo umbi akakilwe iminyololo. Umo ali mfumu; umbi ali mufungwa. Pa numa ya myaka ibili mu cifungo, umutumwa Paulo nomba aiminine pa ntanshi ya kwa kateka wa baYuda, Herode Agripa II. Imfumu no musano wa iko, Berenike, baishile “no kukangasa kukalamba, no kwingilo mwa kuumfwila, pamo na bamushika ba mpuka na bantu abapulamo ba mu mushi.” (Imilimo 25:23) Ulupapulo lwa kuloshako lumo lutila: “Napamo kwali imyanda iingi iya bantu.”

Feste, uwasontelwe nga kateka mupya, e wakuutenye uko kubungana. Kuli Felikisi, uwatangilile Feste, cali fye bwino ukuleka Paulo ukulacululuka mu cifungo. Lelo Feste alitwishike imilandu Paulo apeelwe nga yali iya cine. Na kuba, Paulo alipampamine pali bukaele bwakwe ica kuti aipwishe ukuti umulandu wakwe utwalwe kuli Kaisare! Umulandu wa kwa Paulo walengele ukuti Agripa afwaye ukuwishiba. Atile: “Na ine wine ndefwayo kuumfwa uyu muntu.” Mu kwangufyanya Feste alikuutenye ukubungana, kabili kwati alelanguluka cintu imfumu yali no kusosa pa lwa uyu mufungwa waibela.—Imilimo 24:27–25:22.

Ubushiku bwakonkelepo, Paulo aiminine pa ntanshi ye bumba ilikalamba ilya bashimucindikwa. Aebele Agripa ukuti: “Ndeti ndi washuka . . . pa kuti ni pali imwe ndi no kuisosela lelo . . . ; no kucilapo pantu imwe mwaishibe ntambi shonse na mepusho ifya baYuda. E ico ndepaapaata, mung’umfwe no kutekanya.”—Imilimo 26:2, 3.

Paulo Aisosela mu Kushipa

Ica kubalilapo, Paulo aebele Agripa pa fyo alepakasa Abena Kristu kale. Atile: “Naleesha ukubapatikisho kuponta; kabili pa kubootokele cibi, nabakonkele ndebapakasa ukufika na ku mishi ya mu fyalo.” Lyene, Paulo alondolwele fintu amwene icimonwa ca kusungusha umo Yesu wabuushiwa amwipwishe ukuti: “Nga cinshi ulendamatila? Cayafya kuli iwe ukupanta pa ca kusoswelako.”a—Imilimo 26:4-14.

Yesu lyene apeele Sauli umulimo wa kushimikila ku bantu ba mu fyalo fyonse ulwa ‘ifyo wamona ne fyo nkamonekelamo kuli iwe.’ Paulo ashimike ukuti alibombeshe ukubomba umulimo apeelwe. Lyene aebele Agripa ukuti: “E mulandu abaYuda banjikatile mwi tempele, balapano kunjipaya.” Apantu Agripa alitemenwe ubuYuda, Paulo akomaile pa kuti ukushimikila kwakwe kwabimbilemo ‘ukukanasosa icintu cimbi kano ifyo bakasesema na Mose balandile ukuti fikesapona’ ukukuma ku mfwa ya kwa Mesia no kubuuka.—Imilimo 26:15-23.

Feste alicilingenye no kubilikisha ukuti: “Ukusambilila kobe ukwingi kwakusangulo bushilu.” Paulo ayaswike ati: “Nshipenene, mwe bakata abacilamo baFeste, lelo ndesose fyebo fya cine kabili ifya kutekanya.” Lyene Paulo asosele pa lwa kwa Agripa ukuti: “Pantu imfumu yaishibe fi fintu. Kabili ndelanda no kushipa kuli yene. Awe ninsuubila, nati, tayalubapo cintu cimo ca muli ifi; pantu ici cintu tacacitiilwe ku mbali.”—Imilimo 26:24-26.

Lyene, Paulo alandile kuli Agripa mu kulungatika ukuti: “Mwe mfumu Agripa, bushe muletetekela bakasesema?” Ukwabulo kutwishika, icipusho calengele Agripa ukukanaumfwa bwino. Na kuba, alefwaya ukuti ishina lyakwe lionaika, kabili nga ca kuti asuminishanya na Paulo, lyene aali no kusuminishanya na cintu Feste alandile ati “bushilu.” Napamo pa kumona ukuti Agripa aleshingashinga ukwasuka, Paulo alyaswike icipusho aipwishe. Atile: “Ninjishibo kuti muletetekelako.” Nomba Agripa alilandile, lelo ukwabulo kuikumikako. Aebele Paulo ati: “Mu nshita inono ulenashanasho kubo mwina Kristu!”—Imilimo 26:27, 28.

Mano mano Paulo abomfeshe amashiwi aya manshoko aya kwa Agripa ku kulondolola icishinka cakatama. Atile: “Ndelilila kuli Lesa, nati, nangu ni mu nshita inono nangu ni mu ikalamba, te imwe mweka iyo, lelo na bonse abaleng’umfwa lelo, iye! nga bengaba ifyo ine ndi, kano fye ukwabule fikakilo ifi.”—Imilimo 26:29.

Agripa na Feste tabasangile Paulo no mulandu uuli onse uwawamine mfwa nelyo ukukakwa. Nalyo line, ukulomba kwakwe ukuti umulandu utwalwe kuli Kaisare takwali no kwalulwa. E mulandu wine Agripa asosele kuli Feste ukuti: “Uyu muntu abulashina kuli Kaisare nga kuti akakulwa.”—Imilimo 26:30-32.

Ifyo Twingasambililako

Imishimikile ya kwa Paulo kuli bashimucindikwa itupayanishisha ica kumwenako cishaiwamina. Paulo abomfeshe ukushilimuka ilyo alelanda ne Mfumu Agripa. Ukwabulo kutwishika, alishibe ico Agripa na Berenike bacitile. Icupo cabo cali ice shiku pantu Berenike ali nkashi kwa Agripa. Lelo pali kano kashita Paulo tasalilepo kulanda pa lwa mibele isuma. Lelo alandile pa fintu ifyo ena na Agripa basuminishenyepo. Ukulundapo, nangu ca kuti Paulo akanshiwe ku muFarise wasambilila sana, Gamaliele, alisumine ukuti Agripa ali ni ncenshi ya myata ya buYuda. (Imilimo 22:3) Te mulandu ne shiku Agripa acitile, Paulo alandile mu mucinshi pantu Agripa ali ni kateka.—Abena Roma 13:7.

Nangu cingati tulashimikila ifisumino fyesu mu kushipa, tatwaiminina pa kusansalika nelyo ukusenuka ifibelesho fya balekutika kuli ifwe. Lelo pa kuti tulenge bambi ukwangukilwa ukusumina icine, tufwile ukukomaila pa fintu fisuma ifya mbila nsuma, no kukomaila pa fyo tusuminishanyapo na bena. Lintu tulelanda nabatucilile myaka nelyo aba mu bulashi, tufwile ukucindika icifulo cabo. (Ubwina Lebi 19:32) Muli iyi inshila, kuti twapashanya Paulo, uwatile: “Nimba fyonse kuli bonse, ukuti mu misango yonse mpusushishemo bamo.”—1 Abena Korinti 9:22.

[Futunoti]