Ubupuupu Bwacilimwa ku Masamba ya Afrika

Nga fintu cashimikwa na Eunice Ebuh

“Abapuupu baipangasha ne fyanso bapingile ukusansa pa bushiku buntu tukwata Isambililo lya Citabo pa Cilonganino mu myesu. Tuleswisha impongolo pa kuti bamunyina na bankashi na bakusekelela bengile. Abapuupu bafwile balishibe icibelesho cesu ne nshita ya kulongana. Twalishininwe ukuti baliibile motoka kumbi no kwisa mu kulalolela pa mpongolo ubushiku bwe sambililo lya citabo ne nshita ilya ine.

“Cali fye nkuma, umulungu baishilemo wali mulungu wa kutandala kwa kwa kangalila wa muputule. Mu cifulo ca kulonganina mu myesu, twalongene ku Ng’anda ya Bufumu. Pa numa ya kulongana, kwali ukukumana kwa baeluda. Ine pamo na bana twali no kutangilako nga fintu tucita nga kuli ukukumana, lelo umulume wandi, uuli eluda, atwebele ukumulolela. Atile takokole. E ico, twalilolele.

“Icakonkelepo, motoka alikana ukulila. Kangalila wa muputule no mulume wandi balifililwe ukulungisha. Kalungisha twafwaile nao wine alifililwe.

“Abana baendele pa makasa ukuya ku ng’anda. Tapakokwele, na ine naile ku ng’anda. Nafikile mupepi na 10 koloko. Ifwe bonse tatwaishile muli motoka ingakabila ukwisula impongolo ikalamba pa kwingila.

“Lintu naingile mu muputule wandi uwa kusendamamo, naumfwile ukulila kwa mfuti ukukalamba sana. Nshaishibe icalecitika. Nalyeseshe ukutuma foni kuli bakapokola, lelo tayalebomba. Nabutukile pa nshi no kuyakoma icibi ca nshimbi, lyena naendeshe ukuyakoma icibi ca pa kati. Nalishimishe amalaiti. Naebele abana bandi ukutekanya apo balifulunganishiwe. Twalipepele capamo ukuti Lesa atucingilile. Pali iyi nshita, umulume wandi ali acili alelwisha ukulungisha motoka ku Ng’anda ya Bufumu.

“Naloleshe pa windo no kumona umuntu nalambalala mu musebo ku nse ya lubansa. Camoneke kwati abapuupu nabaya, e ico nabuulile umuntu wacenenwe, namubikile muli motoka wandi no kumubutushisha ku cipatala. Nelyo cali kuibika mu bwafya, nalingile ukucitapo cimo. Ica bulanda, alifwa ubushiku bwakonkelepo.

“Ifintu ifingi ifyabipisha nga fyalicitike ukusansha pali cilya cintu cabipa. Ukutandala kwa kwa kangalila wa muputule kwalengele ukukanakwata isambililo lya citabo pa myesu. Motoka yafwile yalengele ukukanaendela pamo ngo lupwa. Umulume wandi, untu abapuupu bali no kwikata ukwabulo kutwishika, tafikile pa ng’anda bwangu. Iyi pamo ne mibele imbi yalitwafwile ubo bushiku.

“Yehova e cele lyesu ne cubo cesu. Kwati fye fintu amalembo yasosa ukuti: ‘Nga Yehova talindile musumba, umulinshi alola apa fye.’”—Ilumbo 127:1.