Mwicimfiwa ku Masakamika
“MWILASAKAMIKILWO bwa mailo; pantu ubwa mailo bukaisakamanina ubwine. Ububi bwa bushiku bumo bwalingana kuli ubo bushiku.” (Mateo 6:34) Ukwabulo kutwishika uko kufunda kwa kwa Yesu Kristu kulabomba icine cine kuli ifwe bonse fwe bekala mu calo ca ndakai icaswangana kabili ica masakamika.
Nangu cibe fyo, bushe cine cine kuti twaikala ukwabula amafya, amapange, ne milimo tufwile ukubomba ukutusakamika? Imintapendwa ya bantu baba abapopomenwa, abakungumana, kabili abatitikishiwa. E mulandu wine ubukwebo bwa miti ya kucefyanyako amasakamika bulefumisha indalama ishingi sana.
Ubupusano Bwaba pa Kupekanya Kusuma no Kusakamikwa Kwacishamo
Tulingile ukupekanisha libela imilimo yesu, amapange yesu, na mafya yesu—nampo nga nafipamfya nelyo iyo. Baibolo ilatukoselesha ‘ukwikala no kulinga ishingapooswapo’ ilyo tushilatendeka umulimo uuli onse uukalamba. (Luka 14:28-30) Ici cibimbamo ukupimununa fyonse ifyo mulefwayo kucita, ukuceeceete fingaponako, no kumone nshita, amaka, ne ndalama ifingapooswapo.
Nangu cingati mulingile ukubebeta bwino bwino ifingaponako, tacibomba atemwa te ca mano ukutontonkanya pali fyonse ifingaponako. Ku ca kumwenako, pa kucingilila ulupwa lwenu ku mulilo, kuti mwamona ifyo mwingacita nge ng’anda yenu yalipile. Kuti mwashita indibu iilila nga kwabo mulilo ne fibombelo fya kushimishako umulilo. Kuti mwapekanya no kupituluka mu fyo mwingafulumuka mu miputule yapusanapusana iya mu ng’anda yenu. Lelo bushe kuti twapusanya shani ukupekanya kusuma no kusakamikwa kwacishamo? Ukusakamikwa kwacishamo kubako lintu mwatendeka ukulanguluka pa fingi ifya kwelenganya ifishakacitike no kucitika. Amalangulushi kuti yamucimfya, no kulengo kuti mumone kwati tamwapekenye fyonse ifyalekabilwa atemwa ukumona kwati tamwabombeshe ku kucingilila ulupwa lwenu. Aya malangulushi aya kuyobwela kuti yaba cisendo ica kuti no tulo te kuti mutumone.
Mose Atununuka Farao
Yehova Lesa apeele kasesema Mose umulimo wakosa. Intanshi, Mose aali no kuyamona abena Israele no kubebo kuti Yehova alimusontele ukubatungulula ukufuma mu Egupti. Mu kukonkapo, Mose ali no kutununuka Farao ukumweba alekeleko abena Israele baye. Mu kulekelesha, Mose ali no kutungulula imintapendwa ya bantu ku matololo no kubatwala mu calo umwali abantu abakaluka. (Ukufuma 3:1-10) Mose afwile alitiinine, lelo bushe alisuminishe uyu mulimo ukumusakamika mu kucishamo?
Kufwile kwali fimo ifyasakamike Mose. Aipwishe Yehova ati: “Ine nga nafika ku bana ba kwa Israele, no kutila kuli bene, Lesa wa bashinwe antuma njise kuli imwe; na bo batila kuli ine, Ni ani ishina lyakwe? bushe nkatila shani kuli bene?” Yehova alimwaswike. (Ukufuma 3:13, 14) Mose alisakamikwe na pa fyo cali no kucitika nga Farao alikeene. Na kabili, Yehova alyaswike uyu kasesema. Mu kulekelesha, Mose alandile ukuti taishibe “ukulondolole fyebo.” Bushe ubu bwafya bwali no kukalululwa shani? Yehova apayenye Aarone ukulandilako Mose.—Ukufuma 4:1-5, 10-16.
Pa kuba uwapangashiwa ne fyasuko ku fipusho aipwishe e lyo no kucetekela Lesa, Mose alicitile ifyo Yehova amwebele. Mose taicushishe na matontonkanyo ya kutiina ifyali no kucitika lintu atununuka Farao, lelo ‘acitile ifyo aebelwe.’ (Ukufuma 7:6) Asuminisha amasakamika ukumucimfya, nga alinenwine icitetekelo cakwe no bukose ifyalekabilwa ku kubombo mulimo apeelwe.
Inshila yalinga Mose abomfeshe ku kubombo mulimo apeelwe yaba ca kumwenako ca “kutekanya” kuntu umutumwa Paulo alandilepo. (2 Timote 1:7; Tito 2:2-6) Mose akanatekanya, umulimo ukalamba untu apeelwe nga walimucimfishe ica kuti nga alikeene ukuubomba.
Ukulama Amatontonkanyo Yenu
Bushe mucita shani nga mwakumanya amesho ya citetekelo nelyo amatunko? Bushe mulabilima no kulatontonkanya fye pa fipindami na mafya ifingaponako? Nelyo bushe mulatekanya? Nga fintu bamo bengasosa ukuti, ‘Mwiyabuko bulalo ubo mushilanyantapo.’ Pantu tacingakabilwa ukwabuka ubo bulalo bwa kwelenganya! Mulandu nshi mwingalaicushisha pa cintu icishingacitika? Baibolo itila: “Ukusakamana kwa mu mutima wa muntu kulaukontamika.” (Amapinda 12:25) Ilingi line kushingilisha fye umuntu ukupingulapo bwangu no kucitapo cimo.
Icacilanapo ukubipa busanso bwa ku mupashi ubulengwa no kusakamikwa kwacishamo. Yesu alangilile ukuti ulongolo lwa fyuma no “kusakamana kwa pano isonde,” kuti fyalengo muntu ukusuule “cebo ca bufumu.” (Mateo 13:19, 22) Nga fintu imyunga ilenga ifimenwa ukukanakula no kutwale fisabo, e fyo na masakamika yacishamo yengalengo kuti twilalunduluka lwa ku mupashi no kutwale fisabo ku kulumbanya Lesa. Amasakamika yabipa aya kuyobwela yalilenga na bamo ukukanaipeela kuli Yehova. Balasakamano kuti, ‘Cikaba shani nga nafilwa ukwikala umwabela ukuipeela kwandi?’
Umutumwa Paulo atwebele ukuti mu bulwi bwesu ubwa ku mupashi, tulingile ukutwala “amapange yonse mu bunkole ku cumfwila ca kuli Kristu.” (2 Abena Korinti 10:5) Umulwani wesu mukalamba, Satana Kaseebanya, afwaisha ukushukila amasakamika yesu pa kuti engatufuupula no kutunenuna lwa ku mubili, lwa mu nkuntu, na lwa ku mupashi. Aba ni kalapashi uubomfya ukutwishika ku kulufya abashaibukila. E mulandu wine na Paulo asokele Abena Kristu ‘ukukanapeela Kaseebanya apa kwikala.’ (Abena Efese 4:27) Pamo ngo “mulungu wa nshita ino,” Satana ‘alipofwisha imitima ya bashitetekela.’ (2 Abena Korinti 4:4) Te ca kwesha ukumusuminisho kulama amatontonkanyo yesu!
Ubwafwilisho E ko Bwaba
Umwana nga aba mu bwafya aya kuli wishi wakwato kutemwa pa kuti atungululwe no kusansamushiwa. Ne fwe bene kuti twatwala amafya yesu kuli Shifwe wa mu muulu, Yehova. Na kuba, Yehova afwayo kuti tulepoosa ifisendo fyesu na masakamika pali wene. (Ilumbo 55:22) Nga filya umwana ashisakamana pa bwafya bwakwe lintu wishi asumina ukumwaafwa, e fyo na ifwe tulingile ukupoose fisendo fyesu pali Yehova no kumushiila.—Yakobo 1:6.
Bushe kuti twapoosa shani amasakamika yesu pali Yehova? Abena Filipi 4:6, 7 bayasuko kuti: “Mwisakamikwa nangu kamo, lelo mu fintu fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwapulamo mu kwiluka konse, wakulalinde mitima yenu na mapange yenu muli Kristu Yesu.” Ee, pa kwasuka amapepo yesu no kupaapaata kwesu ukwa mukoosha, Yehova kuti atupo mutende wa lwa nkati uwingacingilila amatontonkanyo yesu ku kufulunganishiwa na masakamika yacishamo.—Yeremia 17:7, 8; Mateo 6:25-34.
Nangu cibe fyo, pa kubomba mu kumfwana na mapepo yesu, tatulingile ukuipaatula lwa ku mubili nelyo lwa ku muntontonkanya. (Amapinda 18:1) Lelo, icingabomba bwino kubomfya ifishinte no butungulushi bwa Baibolo ifikumine ku bwafya bwesu, na muli fyo tatwakashintilile pa mano yesu. (Amapinda 3:5, 6) Abacaice na bakalamba bene kuti babomfya Baibolo ne mpapulo sha Watch Tower umusangwa ifyebo fishaifulila ifilanda pa fintu twingapingulapo ukucita na fintu twingacincintila amafya. Na kabili, mu cilonganino ca Bwina Kristu, twalipaalwa pa kukwata baeluda aba mano kabili ababelesha ukubikako na Bena Kristu bambi abo lyonse bengatemwa ukulanda na ifwe. (Amapinda 11:14; 15:22) Abashikuminwe no bwafya bwesu kabili abaishiba ifyo Lesa amono ubo bwafya, lyonse kuti baletwaafwa ukulamona amafya yesu mu nshila yapusanako. Nangu cingati tabakaletupingula ifya kucita, kuti baletukoseleshako no kutwaafwako apakalamba.
“Cetekela Lesa”
Bonse twalishibo kuti cila bushiku tulacula pa kukalulula amafya ya cine cine ukwabulo ukusanshako aya kwelenganya. Ukusakamikwa pa fingaponako nga kwatuletelo mwenso no kukanashikatala, lyene kuti twapepa no kupaapaata kuli Yehova. Natushintilile pa butungulushi, amano, no kutekanya ifyaba mu Cebo cakwe na mu kuteyanya kwakwe. Tukasango kuti kwaliba icingatwaafwa lintu kwaimako ubwafya ubuli bonse.
Lintu kemba wa malumbo apopomenwe no kukalifiwa, aimbile ukuti: “Cinshi ico wakungumanina, we mutima wandi? Cinshi ico watetela muli ine? Cetekela Lesa; pantu na nomba ndemutootela, e pusukilo lya cinso candi, kabili Lesa wandi.” (Ilumbo 42:11) Lekeni na ifwe tupashanye ifyebo fyakwe.
Ee, pekanisheni libela pa fyo mwingenekela ukuponako, lelo pa fyo mushishibe shileni Yehova. “Amasakamika yenu yonse bikeni pali wene, pa kuti asakamana imwe.”—1 Petro 5:7.
[Icikope pe bula 23]
Ukupala Davidi, bushe na imwe mulapoose fisendo fyenu na masakamika pali Yehova?