Ifipusho Ukufuma ku Babelenga
Bushe Inte sha kwa Yehova shimona shani ukuvota?
Kwaliba ifishinte fyaumfwika mu Baibolo ifilenga ababomfi ba kwa Lesa ukumono yu mulandu mu kulinga. Nangu cibe fyo, cilemoneke fyo takwaba icishinte icikaanya ukuvota. Ku ca kumwenako, abakalamba ba ncito kuti bavota pa kusuminishanya imilandu iikumine akampani kabo. Ilingi line ifilonganino fya Nte sha kwa Yehova filasuminishanya pa lwa nshita sha kulongana ne fya kubomfya indalama sha cilonganino ukupitila mu kuvota kwa kwimya amaboko.
Ni shani pa lwa kuvota mu kusala kwa mapolitiki? Ca cine ukuti mu fyalo fimo umwaba demokrasi, hafu wa bekashi tabayako ku kuvota pa bushiku bwa kusala. Lelo Inte sha kwa Yehova, tashikaanya bambi ukuvota; nangu ukwimya lulu wa kukaanya ukusala kwa mapolitiki. Shilacindika no kumfwila intungulushi shisalilwe mu kusala kwa musango yo. (Abena Roma 13:1-7) Nampo nga kuti bavotela uwiminine mu kusala, cili kuli umo umo uwa Nte sha kwa Yehova ukupingulapo ukulingana na kampingu wakwe uwakanshiwa na Baibolo no kulingana na fintu aumfwikisha umulimo wakwe kuli Lesa na ku Buteko. (Mateo 22:21; 1 Petro 3:16) Mu kuipingwila, Inte shilabebeta imilandu yafulilako.
Intanshi, Yesu Kristu alandile ulwa bakonshi bakwe ati: “Tabali ba pano isonde, ifyo ine nshili wa pano isonde.” (Yohane 17:14) Inte sha kwa Yehova shilakonka sana ici cishinte. Pa kukanaba aba “pano isonde,” tabaibimbamo mu mapolitiki ya pano isonde.—Yohane 18:36.
Ica bubili, umutumwa Paulo alandile ukuti ali ni “nkombe” iyaleimininako Kristu ku bantu aba mu nshita yakwe. (Abena Efese 6:20; 2 Abena Korinti 5:20) Inte sha kwa Yehova shasumino kuti Kristu Yesu nomba ni Mfumu ya Bufumu bwa mu muulu ubwa kwa Lesa, kabili shena, ukupala inkombe, shifwile ukubilisha ici ku nko. (Mateo 24:14; Ukusokolola 11:15) Inkombe tashiibimbamo, kabili tashiitumpa mu milandu ya fyalo uko shatumwa. Pamo nga beminishi ba Bufumu bwa mu muulu ubwa kwa Lesa, Inte sha kwa Yehova shicita cimo cine pa kukanaitumpa mu mapolitiki ya fyalo umo shikala.
Umulandu wa butatu uwa kubebeta wa kuti, abasala umuntu pa cifulo cimo kuti balubulwilapo pali fyonse ifyo acita. (Linganyeniko 1 Timote 5:22, The New English Bible.) Abena Kristu balingile ukutontonkanyapo bwino nampo nga balefwaya bakalubulwilepo.
Ica bune, Inte sha kwa Yehova shalicindamika sana ukwikatana kwa shiko ukwa Bwina Kristu. (Abena Kolose 3:14) Lintu aba mapepo baitumpa mu mapolitiki, ilingi line icifumamo malekano mu bene beka. Mu kupashanya Yesu Kristu, Inte sha kwa Yehova tashiibimba mu mapolitiki, na muli fyo shilasungililo kwikatana kwa Bwina Kristu.—Mateo 12:25; Yohane 6:15; 18:36, 37.
Ica busano kabili ica kulekelesha, ukukanaibimbamo mu mapolitiki kupeela Inte sha kwa Yehova ubuntungwa bwa kulanda ubukombe bwacindama ubwa Bufumu ku bantu ababa mu kabungwe ka bupolitiki akali konse.—AbaHebere 10:35.
Pa mulandu wa fishinte fya mu Malembo ifyalandwapo pa muulu, mu fyalo ifingi Inte sha kwa Yehova shilaipingwila ukukanavota mu kusala kwa mapolitiki, kabili ubuntungwa bwa shiko ubwa kupingulapo ifyo bwalisuminishiwa ne funde lya buteko. Ni shani nga ca kuti ifunde lifwaya abekashi ukuvota? Nga cabe fyo, cili kuli Nte umo umo ukupingulapo ukulingana ne fyo asambilila mu Baibolo pa fyo engacita pali uyu mulandu. Nga ca kuti umo apingulapo ukuya ukwa kuvotela, cili ku mwine. Ifyo alecita mu kayanda ka kuvotelamo fya kwishiba umwine na Kalenga wakwe.
Ulupungu lwa kwa Kalinda ulwa November 15, 1950, (mu ciNgeleshi), pa mabula 445 na 446, lwatile: “Uko Kaisare afwaya abekashi bonse ukuvota . . . [Inte] kuti shaya ku kuvota no kwingila umwa kuvotela. Umu e mo benekelwa ukuvota pe pepala lya kuvotelapo nelyo ukulembapo ifyo basuminamo. Bakasala balacita ico balefwaya ku mapepala yabo aya kuvotelapo. E co muno pa ntanshi ya kwa Lesa e mo inte shakwe shifwile ukucita icingomfwana na mafunde yakwe ne citetekelo cabo. Te mulimo wesu ukubakambisha ico balingile ukucita ku mapepala ya kuvotelapo.”
Ni shani nga ca kuti umulume uushasumina apampamina pa kuti umukashi wakwe uwa Bwina Kristu aye ku kuvota? Kwena, umukashi afwile ukunakila umulume, nga fintu Abena Kristu banakila bakateka bacilamo. (Abena Efese 5:22; 1 Petro 2:13-17) Nga aumfwilo mulume no kwingila umwa kuvotela, cili ku mwine. Umuntu nangu umo talingile ukumulengulula.—Linganyeniko Abena Roma 14:4.
Ni shani nga ca kuti mu calo tamwaba ifunde ilipatikisha ukuvota lelo abekala calo balipata abashiya ku kuvota—nalimo no kubasansa fye? Atemwa ni shani nga bamo, ilintu takwaba ifunde ilibapatikisha ukuvota, balalimunwa icabipisha mu nshila imo nga ca kuti tabeele ku kuvota? Muli iyi mibele ne yapalako, Umwina Kristu alingile ukuipingwila ifyo engacita. “Umuntu onse ali no kusende cipe cakwe umwine.”—Abena Galatia 6:5.
Kuti kwabako abantu abapunwishiwa lintu kuli ukusala mu calo cabo, bamona ukuti Inte sha kwa Yehova shimo shilaya ku fifulo ukwa kuvotela e lyo shimbi tashiyako. Kuti nalimo batila, ‘Inte sha kwa Yehova tashaikatana mu micitile.’ Nangu cibe fyo, abantu balingile ukwishibo kuti mu milandu ya musango yu iya kubomfya kampingu, Umwina Kristu umo umo alingile ukuipingwila ico ali no kucita pa ntanshi ya kwa Yehova Lesa.—Abena Roma 14:12.
Icili conse ico Inte sha kwa Yehova shingapingulapo lintu shakumanya imibele yapusanapusana, shilasakamana ukusungilila ukukanaibimbamo mu milandu ya calo ukwa Bwina Kristu na maisosele. Muli fyonse, shishintilila pali Yehova Lesa ku kushikosha, ukushipeela amano no kushaafwa ukusengauka ukusuusuka ku citetekelo mu nshila iili yonse. Muli fyo bacetekela amashiwi ya kwa kemba wa malumbo ayatila: “Icilibwe candi icasumbuka kabili icele lyandi ni mwe; e ico pa mulandu we shina lyenu ntungululeni no kunondola.”—Amalumbo 31:3.