Cinshi Cingacitwa Pa lwa Kufuupulwa?

NI SHANI fintu umuntu engacimfya ukufuupulwa? Ici e cipusho ico bakangalila benda abengi abo lyonse batandalila ifilonganino fya Nte sha kwa Yehova bepushiwa. Ifyasuko fyabo kuti fyatwafwa ukumwensekesha ifilenga ukufuupulwa na fintu inshila sha kupwishishamo ubu bwafya shingambukila Umwina Kristu uuli onse.

Pa kucimfya ukufuupulwa ifingi filafwaikwa, lelo ifishibilo kuti fyasanshamo ukukanaba no buseko bwa kupepa nelyo ukusambilila Baibolo pa lwenu, ukukanasangwa lyonse ku kulongana, ukukanacincimuka, nangu fye ukulaitalusha ku Bena Kristu banenu. Nangu cibe fyo, cimo ica fishibilo fikalamba caba kuleka ukupimpa mu mulimo wa bukabila bwa mbila nsuma. Natubebete ifishibilo no kumona umuti uwingondapa.

Ukufuupulwa mu Mulimo Wesu Uwa Kubile Mbila Nsuma

Yesu Kristu alishibe amafya yendela pamo no mulimo wa kupanga abasambi. (Mateo 28:19, 20) Atumine abakonshi bakwe nge “mpaanga mu kati ka mimbulu,” ukwishibo kuti ukushimikila kwali no kubalenga ukupakaswa. (Mateo 10:16-23) Lelo, uyu tawali mulandu wa kubafuupula. Na kuba, ababomfi ba kwa Lesa abo pa mulandu wa kupepa lyonse bashintilila pali Yehova ilingi line balikoshiwa ku kupakaswa.—Imilimo 4:29-31; 5:41, 42.

Na mu nshita Abena Kristu bashalepakaswa sana, te lyonse balepokelelwa bwino. (Mateo 10:11-15) Ukupalako, umulimo wa kushimikila uwa Nte sha kwa Yehova te lyonse ubombwa mu kwanguka ilelo.a Abengi abasumina muli Lesa batila mulandu wa pa lwabo uo bashifwaya ukulanshanyapo. Bambi tabafwaya ukumfwa icili conse pa lwa mipepele iyo bapata. Ukwabulo kutwishika, ukukanayangwako, ukukanasandulula, nelyo amafya yambi ayalekanalekana kuti fyaletako ukufuupula. Ni shani fintu aya mafya yengacimfiwa?

Ukusanduluka

Ubuseko tusanga mu butumikishi bwesu bwalyampanako na ku fifumamo. Kanshi, kuti twalenga shani ubutumikishi ukusanduluka? Twalishiba ukuti tuli “balondo ba bantu.” (Marko 1:16-18) Mu Israele wa pa kale, abalondo baleya ku kwipaye sabi ubushiku pa kuti bengepaya ilingi. Na ifwe bene pa kuti twingeshiba ilyo abengi basangwa pa ng’anda ne nshita bakutika sana ku bukombe bwesu tufwile ukuceeceeta icifulo cesu ica kubombelamo pa kuti twingabashimikila. Limbi kuti caba ni mu cungulo, pa fibelushi, nelyo pa nshita imbi. Ukulingana na kangalila enda umo, ici cilabomba bwino mu ncende umo abantu baya ku sha ncito akasuba konse. Alanda ukuti ilingi line ubunte bwa mu cungulo bulafumamo ifisuma. Cimbi na co icitulenga ukufika pa bantu abengi bunte bwa pali lamya nelyo ubwa mu lyashi.

Umukoosha mu butumikishi ulafumamo ifisuma. Ku Kabanga ka Bulaya na mu fyalo fimo ifya mu Afrika, umulimo wa kushimikila pa lwa Bufumu uleenda bwino, kabili ici nacilenga no kuti mube ukwingilishiwako ukukalamba. Ukupalako, mu ncende isho kale shishalesanduluka nelyo fye mu fifulo fibombelwamo libili libili namupangwa ifilonganino ifingi. Nangu cibe fyo, cinshi mulingile ukucita nga ca kuti icifulo cenu ica kubombelamo tacileletako ifisabo?

Ukutwalilila Ukuba ne Mimwene Isuma

Ukumfwikisha amabuyo Yesu aimike kukatwafwa ukukanafuupulwa lintu twasanga abashileyangwako mu butumikishi. Ico Kristu afwaile abasambi bakwe ukucita kufwayamo fye abayana, te kwalula abantu bonse iyo. Pa nshita shapusanapusana alondolwele ukuti icinabwingi tacali na kupokelela imbila nsuma, kwati fye fintu abena Israele abengi bakeene ukukutika kuli bakasesema ba ku kale.—Esekiele 9:4; Mateo 10:11-15; Marko 4:14-20.

“Abaibukila ulwa kukabila kwabo ukwa ku mupashi,” (NW) e bapokelele ‘mbila nsuma ya bufumu’ no kutasha. (Mateo 5:3; 24:14) Bafwaya ukubombela Lesa mu nshila atantika. Kanshi ififuma mu mibombele yesu fyayampana sana ne mibele ya mutima iya bantu ukucila pa kulamuka kwesu ukwa kubila ubukombe. Ca cine ukuti tulingile ukubombesha ukufika apapela amaka yesu pa kulenga imbila nsuma ukuba iya kucebusha. Lelo, ifya kufumamo tushila muli Lesa umwine, pantu Yesu atile: “Takuli uwingesa kuli ine, kano Tata uwantumine amukula.”—Yohane 6:44.

Umulimo wesu uwa kushimikila ulenga ishina lya kwa Yehova ukwishibwa. Cibe ukuti abantu bomfwe nelyo tabomfwile, imibombele yesu iya kushimikila ilalengako ukuti ishina lya kwa Yehova ilya mushilo lishishiwe. Ukulundapo, tuishininkisha ukuba abasambi ba kwa Kristu ukupitila mu mulimo wa kushimikila, kabili twalikwata ishuko lya kubombako umulimo wacindamisha uulebombwa muli shino nshiku.—Mateo 6:9; Yohane 15:8.

Ifyo Ukukanaumfwana na Bambi Kufuupula

Ukukanaumfwana na bantu bambi, cibe ni mu lupwa nelyo mu cilonganino, kuti kwaletako ukufuupula. Ku ca kumwenako, bamo batila takwaba nangu umo uubomfwikisha. Ukukanapwililika kwa basumina banensu na ko kuti kwatufuupula. Muli ci na mo, Amalembo kuti yatwafwilisha sana.

Ulupwa lukalamba ulwa ku mupashi lwapangwa na ba “bwananyina” aba mwi sonde lyonse. (1 Petro 2:17) Lelo napamo kuti twaleka ukumona ukuti twaba pa bantu baikatana lintu kwaisa amafya pa mulandu wa kukanaumfwana na bamo. Cimoneke fyo, Abena Kristu ba mu mwanda wa myaka uwa kubalilapo na bo bene baleba na mafya ya musango yo, pantu umutumwa Paulo libili libili alebacinkulako ukuba abaikatana. Ku ca kumwenako, apaapeete Abena Kristu babili abanakashi Yuodia na Suntuki ukupwisha ukupusana kwabo.—1 Abena Korinti 1:10; Abena Efese 4:1-3; Abena Filipi 4:2, 3.

Nga ca kuti tatuleumfwana na bambi, kuti twacita shani pa kutemwa sana bamunyinefwe na bankashi? Ni pa kulaicinkulako fwe bene ukuti na bo Kristu alibafwilile no kuti na bo bene balitetekela ilambo lyakwe ilya cilubula. Tufwile na kabili ukulaibukisha ukuti bamunyinefwe abengi baliba abaipekanya ukupashanya Yesu Kristu pa kubika imyeo yabo mu kapoosa mweo pa mulandu wesu.

Tapapitile imyaka iingi sana ilyo Nte wacaice umo, mu musumba wa Paris ku France, afyambete sutikesi umwali ibomba ilyabikilwe ku nse ya Ng’anda ya Bufumu. Abutwike nga pali kapashi ukutentemuka amatabo ayengi no kuyapoosa sutikesi pa kamfukumfuku ka menshi apo lyapuulikile. Ilyo aipushiwe icalengele ukuti abike umweo wakwe mu kapoosa mweo muli ulya musango, ayaswike ukuti: “Nalishibe ukuti imyeo yesu yali mu busanso. E co natontonkenye ukuti cawamapo ine ukufwa ukucila ukuti bonse tufwile pamo.”b Mwandi lipaalo ukukwata ifibusa fya musango yo ifyaipekanya ukukonka sana ica kumwenako ca kwa Yesu!

Ukulundapo, kuti twaetetula pa kumfwana ukwali pa Nte sha kwa Yehova mu nkambi sha kucushiwilwamo mu kati ka Nkondo ya Calo iya 2.c Ni nomba line fye bamunyinefwe ne nkashi mu Malawi na bo batwalilile na bumpomfu bwabo nga Bena Kristu ba cine. Bushe itontonkanyo lya kuti bamunyinefwe mu filonganino twabamo na bo kuti bacita cimo cine mu mibele yayafya, talitulenga ukusuulako fye nelyo ukucefyako ukukanaumfwana no kupusana fye ukwa cila bushiku? Nga twaba no muntontonkanya wa kwa Kristu, ukwampana kwesu na Bena Kristu banensu lyonse fye kukaba ukwa kupembesula, te kwa kufuupula iyo.

Ukulaifuupula

“Icacetekelwa icashimba cilwaliko mutima; lelo icafwaiwa icaisa muti wa mweo.” (Amapinda 13:12) Ababomfi ba kwa Yehova bamo balemona ukuti impela ya bwikashi buno ilekokola ukwisa. Abena Kristu capamo na bantu bambi abengi abashasumina baisa mukusumino kuti inshita tuleikalmo ni “nshita ishayafya.”—2 Timote 3:1-5.

Nangu cibe fyo, ukupusanako na bashasumina, Abena Kristu bafwile ukusekelela pa kumona iyi mibele ya kwesha iya “ciishibilo” ca kubapo kwa kwa Yesu, icilangililo kuti nomba line fye Ubufumu bwa kwa Lesa bwalaswa bufumyepo ubwikashi buno ubwabipa. (Mateo 24:3-14) Na lintu imibele yabipilako, nga fintu ikabipilako mu “bucushi bukalamba,” tapali umulandu wa kubela aba bulanda pantu ifi fintu fibilisha ukwisa kwa calo cipya ica kwa Lesa.—Mateo 24:21; 2 Petro 3:13.

Ukulasunkila pa ntanshi inshita Ubufumu bukafumyapo amafya ya pali lelo kuti kwalenga Umwina Kristu ukupoosesha inshita ku kufwaya ifya ku mubili. Nga ca kuti alisuminishe fintu pamo nga incito ne fyangalo ukumusendela inshita yakwe yonse na maka yakwe, kuti camukosela sana ukubomba incito yakwe iya mu Malembo mu nshila isuma. (Mateo 6:24, 33, 34) Imibele ya musango yo ilundulula fye ukufulunganishiwa kabili icifumamo kufuupulwa. Kangalila umo uwenda alandilepo kuti: “Te kuti cibemo amano ukwesha ukulaikala nga mu calo cipya muli buno bwikashi.”

Imisango Ibili iya Muti Uwakwatisha Amaka

Lintu ubulwele bwaishibikwa, ni shani fintu umuntu engasanga umuti usuma uwa kundapila ubo bulwele? Inshila isuma imo iyabako lisambililo lya pa lwenu. Mulandu nshi? Kangalila uwenda atile: “Lilatwibukishako umulandu tulingile ukucitila fintu tucita.” Umbi na o alondolwele ukuti: “Ukulashimikila pa mulandu fye wa kuti tufwile ukushimikila mu kupita kwa nshita kulasanguka icisendo.” Lelo isambililo lisuma ilya pa lwesu litwafwa ukumwensekesha umulimo wesu ilyo tuleya tulepalamina ku mpela. Mu nshila imo ine, Amalembo yatucinkulako mu kubwekeshabwekeshapo pa lwa kukabila kwa kuliishiwa bwino ica kulya ca ku mupashi pa kuti twingaba ne nsansa sha cine cine ilyo tulecita ukufwaya kwa kwa Lesa.—Amalumbo 1:1-3; 19:7-10; 119:1, 2.

Baeluda kuti baafwa bambi ukucimfya ukufuupulwa ilyo balebakoselesha pa fipempu fya bucemi. Lintu batandala, kuti balangisha ukuti umo umo uwa ifwe alatashiwa apakalamba no kuti aliba uwacindama pa kati ka bantu ba kwa Yehova. (1 Abena Korinti 12:20-26) Eluda umo alandile aya mashiwi ukulosha ku Bena Kristu banankwe: “Ukukomaila pa fyo bacindama, mbebukishako ifyo bapwishishisha ku numa. Mbalenga ukwishiba ukuti Yehova abamona aba mutengo no kuti umulopa wa Mwana wakwe wapeelwe pa mulandu wabo. Ukupelulula kwa musango yo lyonse kulapokelelwa bwino. Lintu kwabako ne fya kumwenako fya mu Baibolo, abafuupulwa kuti baimikila amabuyo ayapya, pamo nga ukupepela pamo no lupwa, isambililo lya lupwa, no kubelengela capamo Baibolo.”—AbaHebere 6:10.

Pa fipempu fya bucemi, baeluda balekabila ukwibukilo kukanacilenga ukumoneko kuti tacingacitika ukutemuna Lesa. Mu cifulo ca ico, baeluda kuti baafwa bakapepa banabo abafuupulwa ukumona ukuti icisendo ca bakonshi ba kwa Yesu calipepuka. Na muli fyo, umulimo wesu uwa Bwina Kristu ulaleta ubuseko.—Mateo 11:28-30.

Ukucimfya Ukufuupulwa Umupwilapo

Ukufuupulwa bwafya ubo tufwile ukulwisha, te mulandu ne nshila kwaishilamo. Nangu cibe fyo, ibukisheni ukuti tatwaba fweka muli ubu bulwi. Nga twafuupulwa, lekeni tupokelele ukwafwa kwa Bena Kristu banensu, sana sana ukwa baeluda. Nga twacite fyo, kuti twacefyanyako ukuyumfwa abafuupulwa.

Pali fyonse, tulingile ukuya kuli Lesa ukuti atwafwilishe ukucimfya ukufuupulwa. Nga twashintilila pali Yehova ilyo tulepepa, kuti atwafwilisha ukucimfya ukufuupulwa umupwilapo. (Amalumbo 55:22; Abena Filipi 4:6, 7) Lyonse fye, ifwe pamo nga abantu bakwe kuti twayumfwa nga kemba wa malumbo uwaimbile ukuti: “Balishuka abantu abaishiba akapundu ka mushilo; mwe Yehova, mu lubuuto lwa cinso cenu e mo bendela. Mwi shina lyenu e mo baleangila akasuba konse; kabili mu bulungami bwenu e mo balesansabalila. Pantu ukuyemba kwa bukose bwabo ni mwe; kabili mu kutemwa kwenu e mutumpwilwo lusengo lwesu.”—Amalumbo 89:15-17.

[Amafutunoti]

[Icikope pe bula 31]

Ifipempu fya bucemi ifikuulilila ifya baeluda ba kutemwa kuti fyaafwa Abena Kristu ukucimfya ukufuupulwa