Ukupwisha Ukukalipwa Kuletwako ne Nkondo

ABRAHAM ali mu mulalo wa bacisanguka pa myaka 20.a Lelo, alileka ukulwa kabili takabale aya ku nkondo na kabili. Na kuba, bamo abali balwani bakwe kale nomba e fibusa fyakwe ifine fine. Cinshi camulengele ukuti aaluke? Ni Baibolo. Yalengele Abraham ukuba ne subilo no kushilimuka, kabili yamwafwile ukumona imilandu ya buntunse mu nshila Lesa aimwenamo. Baibolo yamulengele ukuti aleke ukufwaya ukulwa, kabili ubulanda, ukulunguluka, ulupato, no bukali fyaile filepwa. Asangile ukuti Baibolo yaliba no muti wa maka uwa kundapa umutima.

Bushe Baibolo yafwa shani umuntu ukuleka ukulunguluka? Tayaalwile ifyacitikile Abraham. Nalyo line, ukubelenga no kwetetula pa Cebo ca kwa Lesa kwamulengele ukuti aletontonkanya ifyo Kabumba atontonkanya. Nomba alikwata isubilo lya nshita ya ku ntanshi, kabili alikwata ifipya ifyo atangisha. Ifintu ifyacindama kuli Lesa e fyo acindamika na o. Ilyo ici catendeke ukucitika, ukulunguluka kwali mu mutima wakwe kwaile kulepwa. Ifi e fyaafwile Abraham ukwaluka.

Ukuponena mu Nkondo ya Bana Calo

Abraham afyalilwe mu Afrika muli ba 1930. Pa numa ya nkondo ya calo iya cibili, icalo ca kwa Abraham caletekwa ne calo ca maka ica mupepi, lelo abekashi banankwe abengi balefwaya ubuntungwa. Mu 1961, Abraham aingile mu kabungwe ka balelwisha ubuntungwa akaimishe inkondo ya bacisanguka ukulwisha cilya calo ca maka ica mupepi.

Abraham alondolola ukuti: “Bali balwani besu. Balefwaya ukutwipaya, e co twaiminine pa kubepaya.”

Ilingi ubumi bwa kwa Abraham bwaleba mu kapoosa mweo, e co mu 1982, pa numa ya myaka 20 iya kulwa, abutukile ku Bulaya. Pali ilya nshita ali mu myaka ya kulekelesha iya ba 40, kabili alikwete inshita ya kutontonkanya pa mikalile yakwe. Cinshi cacitike ku fyo alesubila? Cali no kuba shani ku ntanshi? Abraham akumenye Inte sha kwa Yehova no kutendeka ukusangwa ku kulongana. Aibukishe ukuti ilyo ali mu Afrika, alibelengele trakiti uo Inte yamupeele. Uyo trakiti alondolwele paradise aleisa pe sonde no buteko bwa ku muulu ubukateka abantu bonse. Bushe ico cine cine kuti caba cishinka?

Abraham asosa ukuti: “Muli Baibolo, nasambilile ukuti imyaka yonse ilya napoosele ukulwa yali ya fye. Ubuteko bweka fye ubukacita ubulungi kuli bonse Bufumu bwa kwa Lesa.”

Ilyo fye Abraham abatishiwe no kuba Inte ya kwa Yehova, umwaume we shina lya Robert afulumwike ku Afrika no kuya ku musumba wa ku Bulaya ukwaleikala Abraham. Robert na Abraham balwile mu nkondo imo ine lelo mu milalo yalelwishanya. Robert ilingi aletontonkanya pa lwa mifwaile ine ine iya bumi. Alitemenwe ifya mapepo, kabili apo alibelengele amalembo yamo yamo mu Baibolo, alishibe ukuti ishina lya kwa Lesa ni Yehova. Ilyo Inte ishali na Abraham mu cilonganino cimo shatile kuti shayafwa Robert ukumfwikisha Baibolo, alisumine.

Robert alondolola ukuti: “Ukutula fye pa kwamba, nalitemenwe ifyo Inte shibomfya amashina Yehova na Yesu, ukusumina ukuti baba bantu babili. Ico caleumfwana ne fyo nabelengele kale mu Baibolo. Na kabili Inte shilafwala ubusaka kabili shalikwata icikuuku kuli bambi, te mulandu na ku calo bafuma. Ifintu fya musango yu fyalenkuma sana.”

Abali Balwani Baba Fibusa

Robert na Abraham, abali balwani kale, nomba fibusa fyapalamisha. Ni bakabila ba mbila nsuma aba nshita yonse mu cilonganino cimo cine ica Nte sha kwa Yehova. Abraham alondolola ukuti: “Ilyo kwali inkondo, ilingi naletontonkanya pa lwa mulandu abantu ba mu fyalo fyapalamana—abengi abaleya ku mipepele imo ine—bapatanine. Ine na Robert twaleya kwi calici limo line, lelo twaile ku nkondo mu kulwishanya. Nomba bonse tuli Nte sha kwa Yehova, kabili icitetekelo cesu nacitwikatanya.”

Robert alundapo ukuti: “Ubo e bupusano. Nomba twaba mu mipepele iitulenga ukuba ulubali lwa bumunyina bwine bwine. Te kuti tulwe nkondo na kabili.” Baibolo yalyalula nga nshi imitima ya aba abali abalwani kale. Ulupato no kufiitwa panono panono fyalipyanikwapo ne cicetekelo na bucibusa.

Pa nshita imo ine Abraham na Robert balelwe nkondo, abalumendo bambi babili bali mu milalo yalelwishanya mu kukansana kumbi ukwa fyalo fyapalamana. Mu kwangufyanya Baibolo yaishileba ngo muti wa maka uwa kundapa imitima yabo na bo bene. Mu nshila nshi?

Ipaya no Kufwila Icisumino

Gabriel, uwakulile mu lupwa lwa bapepa, asambilishiwe ukuti icalo cakwe calelwa inkondo ya mushilo. E co, ilyo ali ne myaka 19, aliitemenwe ukwingila ubushilika kabili alombele ukuti bamutume ku nkondo. Pa myeshi 13 alelwa inkondo shakakala nga nshi, inshita shimo paleba fye kilomita umo na hafu pali wene na balwani. Asosa ukuti: “Njibukisha maka maka inshita imo. Mushika wesu atwebele ukuti abalwani bali no kutusansa ubushiku. Twali no mwenso ica kuti twalishishe imfuti ya munshinga ubushiku bonse.” Alemona abantu ba mu calo capalamine ukuti balwani, abalingile ukufwa. “Naletontonkanya fye pa kwipaya abengi ukulingana na po ningapesha. Lyene, ukupala ifibusa fyandi ifingi, na ine nalefwaya ukufwile cisumino.”

Lelo, mu kuya kwa nshita Gabriel alipelelwe. Afulumukile ku mpili, mu bumfisolo ayabwike umupaka wa calo cishalelwako inkondo, no kuya ku Bulaya. Atwalilile ukwipusha Lesa umulandu ubumi bwakosele filya, nampo nga amafya yali kukanda kwa kwa Lesa. Akumene ne Nte sha kwa Yehova, ishamulangile mu Baibolo umulandu ubumi bwafulilamo amafya ilelo.—Mateo 24:3-14; 2 Timote 3:1-5.

Ilyo Gabriel aleya alesambilila ifingi muli Baibolo, aleya aleiluka ukuti yakwata icine. “Nasambilile ifyo kuti twaikala kuli pe na pe mu paradise pe sonde. Ku ca kupapusha, ico e cintu nalefwaisha ilyo nali umwaice.” Baibolo yasansamwishe Gabriel no kutalalika umutima wakwe uwalecushiwa ukufika ilya nshita. Atendeke ukulabako ku fyalemulungulusha icabipisha. E co ilyo akumene na Daniel, uwali kale mulwani wakwe, Gabriel tamupatile iyo. Lelo cinshi calengele Daniel ukuti aye ku Bulaya?

“Nga Cine Cine Eko Mwaba, Napaapaata Ngafweni!”

Daniel akuliile mu Katolika kabili ilyo ali ne myaka 18 balimwitile ukwingila ubushilika. Ifita alimo bafitumine ukuyalwisha ifita fyalimo Gabriel. Mupepi na kuntu balelwila, Daniel aleensha icimbayambaya babomfya ku bulwi lintu icanso cipuulika caponenepo. Ifibusa fyakwe fyalipaiwe, kabili alicenenwe icabipisha no kusendwa ngo mufungwa. Apoosele imyeshi mu cipatala na mu nkambi ilyo bashilamutwala ku calo cishalelwako inkondo. Apo ali fye eka kabili uwapelelwa, atendeke ukutontonkanya pa kuipaya. Daniel apepele kuli Lesa ukuti: “Nga cine cine eko mwaba, napaapaata ngafweni!” Ubushiku bwakonkelepo, Inte sha kwa Yehova shalimutandalile kabili shalyaswike ifipusho fyakwe ifingi. Asukile aya ku Bulaya pamo nge mbutushi. Na kabili, Daniel alebishanya ne Nte no kusambilila Baibolo. Ifyo asambilile fyamulengele ukuti aleke ukusakamikwa no kufiitwa.

Gabriel na Daniel nomba fibusa fyapalamisha, abaikatana muli bumunyina bwa ku mupashi pa kuba Inte sha kwa Yehova ishabatishiwa. Gabriel asosa ukuti: “Ukutemwa Yehova no kwishiba kwa Baibolo fyalinenga ukumona ifintu nga fintu afimona. Daniel te mulwani wandi nomba. Aciba ni kale nga nalisekelele ukumwipaya. Lelo Baibolo yansambilisha ifyapusanako—ukuitemenwa ukufwila ena.”

Daniel asosa ukuti: “Namwene abantu ba mipepele yalekanalekana ne mikowa baleipayana. Kabili kwali na bantu aba mipepele imo ine abali mu milalo yalelwishanya no kwipayana mu nkondo. Ilyo namwene ci, natontonkenye ukuti Lesa e walengele. Nomba nalishiba ukuti Satana e usongelekanya inkondo shonse. Gabriel nomba aba uwasumina munandi. Tatwakabale atulwa na kabili!”

“Icebo ca kwa Lesa ca Mweo kabili Caliluma”

Mulandu nshi Abraham, Robert, Gabriel, na Daniel baalukile fi? Cinshi cabalengele ukuti baleke ukuba no lupato lwali sana mu mitima yabo no bulanda?

Umo umo uwa aba baume abelengele, ukwetetula, no kusambilila icine ca mu Baibolo, iyaba iya ‘mweo kabili iyaluma.’ (AbaHebere 4:12) Kalemba wa Baibolo e Kabumba wa bantunse, uwaishiba ukuwamya umutima wa muntu uulefwaya ukumfwa no kusambilila. “Amalembo yonse yantu yapuutwamo kuli Lesa, kabili ya mulimo ku kusambilisha, ku kwebaula, ku kulungika, ku kufunda kwa mu bulungami.” Ilyo fye kabelenga aleka Baibolo ilemutungulula, akwata ifyo akatamika ifipya ne fipimo. Atendeka ukusambilila ifyo Yehova amona ifintu. Ici cileta ubusuma ubwingi, ukusanshako ukupwa kwa kukalipwa kuletwako ne nkondo.—2 Timote 3:16.

Icebo ca kwa Lesa cilondolola ukuti takwaba uluko, umushobo, nelyo umukowa uwawama nelyo uwabipa ukucila uunankwe. “Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” Kabelenga uumfwile ci afwiwa panono panono ukuleka ukupata aba mushobo umbi nelyo uluko.—Imilimo 10:34, 35.

Ukusesema kwa mu Baibolo kulangilila ukuti nomba line Lesa ali no kufumyapo ino mitekele ya bantunse no kupyanikapo Ubufumu bwakwe ubwa buMesia. Ukupitila muli ubu buteko, Lesa “aputulo bulwi ukufika ku mpela ya calo.” Utubungwe tutungilila inkondo no kucincisha abantu ukuya ku nkondo tukafumishiwapo. Abaipaiwa mu nkondo bakabuushiwa no kuba ne shuko lya kwikala muli paradise pe sonde. Takwakabe uukafwaya ukufulumuka pa mulandu wa bakatu nelyo aba lucu.—Amalumbo 46:9; Daniele 2:44; Imilimo 24:15.

Ulwa bantunse abakalaikala pe sonde pali ilya nshita, Baibolo itila: “Bakakuula amayanda no kwikalamo, bakalima na mabala ya myanganshi no kulye fisabo fya yako; tabakakuule na bambi abekalamo . . . tabakacucutikile ibusha, nangu kufyalila abana itentula.” Takwaba ukukalipwa ukuli konse ukushakapwe. Ukutetekela isubilo lya musango yu panono panono kulapwisha ubulanda mu mutima wa muntu.—Esaya 65:21-23.

Baibolo cine cine muti wa mutima uwa maka. Ifisambilisho fya iko kale kale filepwisha ukukalipwa kuletwako ne nkondo. Abali kale ifilwani baleikatana muli bumunyina bwa pa kati ka nko. Ukupwisha ukukalipwa kukatwalilila mu bwikashi bupya ubwa kwa Lesa ukufikila ulupato no kufiitwa, no bulanda fyapwa mu mitima ya bantunse. Kabumba alaya ukuti “ifya ntanshi tafyakebukishiwe, tafyakabukuluke mu mutima.”—Esaya 65:17.

[Futunoti]

[Amashiwi pe bula 4]

“Muli Baibolo, nasambilile ukuti imyaka yonse ilya napoosele ukulwa yali ya fye”

[Amashiwi pe bula 5]

Baibolo kuti yaalula imitima ya bali kale abalwani

[Amashiwi pe bula 6]

Ulupato no kufiitwa panono panono fyalipyanikwepo ne cicetekelo na bucibusa

[Amashiwi pe bula 6]

Ilyo fye kabelenga aleka Baibolo ilemutungulula, akwata ifyo akatamika ifipya ne fipimo

[Icikope pe bula 7]

Abali kale ifilwani nomba baleikatana muli bumunyina bwa pa kati ka nko

[Abatusuminishe Ukubomfya Icikope pe bula 4]

Inkambi ya mbutushi: UN PHOTO 186811/J. Isaac