Bushe Mwalilenga Icine Ukulamutungulula?

“Musangulwe mu kulengwa kwa mitima yenu ipya, ukuti mulinge icabo kufwaya kwa kwa Lesa, icisuma kabili ica kutemuna kabili icapwililila.”—ABENA ROMA 12:2.

1, 2. Mulandu nshi cishayangukila ukuba Umwina Kristu wa cine lelo?

UKUBA Umwina Kristu wa cine muli shino nshiku sha kulekelesha—ishi “nshita ishayafya”—tacayanguka. (2 Timote 3:1) Cine cine pa kukonka ica kumwenako ca kwa Kristu umo afwile ukucimfya icalo. (1 Yohane 5:4) Ibukisheni ifyo Yesu asosele pa lwa nshila ya Bwina Kristu: “Ingileni pa mpongolo ya kamfyemfye: pa kuti impongolo yasalala, kabili inshila yapabuka iitwala ku boni, kabili bengi abengilako. Lelo inshila iitwala ku mweo ya kamfyemfye kabili yalifyenenkana, kabili banono abaisanga.” Asosele no kuti: “Umuntu nga atemwo kunkonka, aikanye umwine, asende ne capindama cakwe ubushiku no bushiku, alenkonka.”—Mateo 7:13, 14; Luka 9:23.

² Pa kusanga inshila ya kamfyemfye iitwala ku mweo, icabe cayafya icikonkapo ku Mwina Kristu kwikala muli iyo nshila. Mulandu nshi cabela icayafya? Pantu ukuipeela kwesu no lubatisho fitulenga ukusanswa ku micenjelo, nelyo ku fya kubeleleka fyayafya ukwiluka ifya kwa Satana. (Abena Efese 6:11, NW; utulembo twa pe samba) Aleshiba ubunake bwesu kabili afwaya ukwingilila pali ubo bunake pa kuti onaule bumupashi bwesu. Na kuba, alyeseshe ukuwisha Yesu, e co tatwingamwenekela ukutulekapo fye.—Mateo 4:1-11.

Imicenjelo ya kwa Satana

3. Satana alengele shani Efa ukutendeka ukutwishika?

³ Inshila imo iyo Satana abomfya ya kutulenga ukulatwishika. Afwayafwaya apali ubunake mu fya kuicingilila fyesu ifya ku mupashi. Mu kutendeka fye, abomfeshe iyi ine nshila kuli Efa, ilyo amwipwishe ukuti: “Kabili Lesa asosele, ati, Mwilalyako ku muti onse wa mwi bala, mwa?” (Ukutendeka 3:1) E mu kutila, Satana aleti, ‘Bushe kwena Lesa e wingabika pali imwe icibindo ca musango yu? Bushe kuti amulesha icintu cawame fi? Lesa alishiba ukuti mu bushiku mukalyako kuli uyu muti amenso yenu yakashibulwa kabili mukaba nga Lesa, abaishibo busuma no bubi!’ Satana atandile ulubuto lwa kutwishika no kulolela ukuti lutendeke ukumena.—Ukutendeka 3:5.

4. Finshi bamo bengatendeka ukutwishika lelo?

⁴ Satana abomfya shani iyi nshila lelo? Nga twalekelesha ukubelenga Baibolo, isambililo lyesu, ipepo, no butumikishi bwesu ubwa Bwina Kristu no kulongana, kuti caba icayanguka ukukonkelela ukutwishika kwa bambi. Ku ca kumwenako: “Twaishiba shani ukuti ici e cine ico Yesu asambilishe?” “Bushe ishi ni nshiku sha kulekelesha cine cine? Na kuba, tuli kale kale mu mwanda wa myaka uwalenga 21.” “Bushe tuli mupepi na Armagedone, nelyo bushe icili ukutali?” Nga ca kuti twatendeka ukutwishike fyo, cinshi twingacita pa kuti tuleke ukutwishika?

5, 6. Finshi tufwile ukucita nga twatendeka ukutwishika?

⁵ Yakobo afundile ati: “Nga umo uwa muli imwe abulwa amano, [atwalilile ukulomba, NW] kuli Lesa uupeela fye kuli bonse ukwabulo kwebaula, kabili yakapeelwa kuli wene. Lelo alombele mu citetekelo, no kutwishika nakalya; pantu uutwishika apale bimbi lya muli bemba ilyaimiwa no kusensenunwa ku mwela; umuntu ulya elolelo kuti akapokelele cintu cimo kuli Shikulu, pa kubo muntu wa mitima ibili, uwalauka mu mibele yakwe yonse.”—Yakobo 1:5-8.

⁶ Lyene, kanshi, cinshi tufwile ukucita? Tufwile ‘ukutwalilila ukulomba kuli Lesa’ mwi pepo icitetekelo no mucetekanya no kuibikilishako mwi sambililo lyesu pa lwa fipusho tukwete nelyo ifyo tuletwishika. Kuti twalomba no bwafwilisho ku bakosa mu citetekelo, ukwabula ukutwishika ukuti Yehova akatupa ubwafwilisho tulekabila. Yakobo na kabili atile: “E ico lambeni kuli Lesa; lelo kaaneni Kaseebanya, na o akafulumuka kuli imwe. Palameni kuli Lesa, na o alapalama kuli imwe.” Cine cine, tukaleka ukutwishika nga twapalama kuli Lesa mu kusambilila ne pepo.—Yakobo 4:7, 8.

7, 8. Fipimo nshi fimo ifikalamba ifyo twingeshibilako ukupepa uko Yesu asambilishe kabili ni bani bafika pali ifyo fipimo?

⁷ Ku ca kumwenako, kuti twaipusha atuti: Twaishiba shani ukuti twaba mu mipepele iyo Yesu asambilishe? Pa kwasuka ici cipusho, cipimo nshi tufwile ukutontonkanyapo? Baibolo itila Abena Kristu ba cine bafwile ukutemwana. (Yohane 13:34, 35) Bafwile ukushishe shina lya kwa Lesa, Yehova. (Esaya 12:4, 5; Mateo 6:9) Kabili bafwile ukulenga abantu ukwishiba ilyo ishina.—Ukufuma 3:15; Yohane 17:26.

⁸ Icishibilo na cimbi ica kupepa kwa cine kucindika Icebo ca kwa Lesa, Baibolo. Citabo caibela icisokolola ubuntu bwa kwa Lesa ne mifwaile yakwe. (Yohane 17:17; 2 Timote 3:16, 17) Na kabili, Abena Kristu ba cine babila imbila ya kuti Ubufumu bwa kwa Lesa e subilo fye lyeka ilyo abantu bakwata ilya mweo wa muyayaya mu paradise wa pe sonde. (Marko 13:10; Ukusokolola 21:1-4) Bataluka ku mapolitiki yabipa aya cino calo pamo ne mikalile ya ciko iikowesha. (Yohane 15:19; Yakobo 1:27; 4:4) Ni bani lelo bafika pali ifi fipimo cine cine? Ifishinka filangilila ukuti ni Nte sha kwa Yehova fye.

Ni Shani nga Tuletwishika?

9, 10. Cinshi twingacita pa kuti tuleke ukutwishika?

⁹ Nga ca kuti tuletwishika? Cinshi tufwile ukucita? Imfumu ya mano Solomone yasuka ukuti: “We mwana wandi, nga wapokelele fyebo fyandi, na mafunde yandi wabika, ku kupeepeko kutwi kobe ku mano, no kwalwilo mutima obe ku mucetekanya; nga walilila ku kwiluka, wasanswile shiwi lyobe ku mucetekanya, nga wafisokota nga silfere, no kufifwimfwinta nge fyuma ifyashikama; e lyo uleiluka akatiina ka kuli Yehova, no kwishiba Lesa ukakusanga.”—Amapinda 2:1-5.

¹⁰ Bushe ico te cakusungusha? Nga ca kuti tulefwaya ukwangwa ku mano ya kwa Lesa, ‘ukwishiba Lesa tukakusanga.’ Kuti twaishiba Shikulu Mulopwe uwa mu kubumbwa konse nga tulefwaya ukupokelela ifyo fyebo no kufikatamika. E mu kuti tufwile ukwalukila kuli Yehova mwi pepo na mwi sambililo lyesu. Ifyuma fyashikama ifya Cebo cakwe kuti fyafumyapo ukutwishika konse no kutwafwa ukumona ulubuuto lwa cine.

11. Ukutwishika kwakumine shani kalume wa kwa Elisha?

¹¹ Ica kumwenako caumfwika ica fyo ipepo lyaafwile umubomfi wa kwa Lesa uwali no mwenso kabili uwaletwishika cisangwa pa 2 Ishamfumu 6:11-18. Kalume wa kwa Elisha takwete umucetekanya wa ku mupashi. Tailwike ukuti imilalo ya ku muulu e ko yali ku kutungilila kasesema wa kwa Lesa, uwacandilwe ku mulalo wa bena Aramu. Pa mulandu wa mwenso, uyu kalume alilile ukuti: “Iye, mwe shikulu! tulecita shani?” Bushe Elisha amwaswike shani? “Witiina; pantu abali kuli ifwe bengi ukucisha abali kuli bene.” Lelo uyu kalume ali no kushininwa shani? Talemona imilalo ya ku muulu.

12. (a) Uyu kalume alekele shani ukutwishika? (b) Kuti twaleka shani ukutwishika?

¹² “Elisha apepele, ati, Mwe Yehova, shi shibuleni amenso yakwe, no kuleka amone. Awe Yehova ashibwile amenso ya mulumendo; na o alimwene, kabili, moneni, ulupili nalwisulamo bakafwalo na maceleta ifya mulilo ukushinguluka Elisha.” Na muli fyo Yehova alengele ulya kalume ukumona imilalo ya ku muulu iyalecingilila Elisha. Lelo tatufwile ukwenekela ukuti na ifwe Lesa kuti atwafwa muli ulya wine musango pali nomba. Ibukisheni, ulya kalume wa kwa kasesema takwete Baibolo onse uwa kusambilila pa kuti akoshe icitetekelo cakwe. Ifwe twalikwata Baibolo. Nga twaibomfya bwino, na ifwe bene icitetekelo kuti cakoshiwa. Ku ca kumwenako, kuti tuleetetula pa malyashi yalekanalekana ayalanda pali Yehova mu cilye cakwe ica ku muulu. Ifi tafitulenga tuletwishika ukuti Yehova alikwata ukuteyanya kwa ku muulu ukuletungilila ababomfi bakwe lelo mu mulimo wa mwi sonde lyonse uwa kusambilisha.—Esaya 6:1-4; Esekiele 1:4-28; Daniele 7:9, 10; Ukusokolola 4:1-11; 14:6, 7.

Cenjeleni ku Micenjelo ya kwa Satana!

13. Ni nshila nshi Satana abomfya ku kwesha ukutulenga ukuti twiikatisha icine?

¹³ Ni nshila nshi shimbi isho Satana anashishamo bumupashi bwesu no kutulenga ukuti twiikatisha icine? Inshila imo ni bucisenene, mu misango yonse iyo bumonekelamo. Muli cino calo cabamo ifye shiku, icintu ico beta ukuti ukukwata uwa pa mbali (inumbwilo yangushako ubucende) nelyo bucilende fisangwike fya lyonse kuli ino nkulo yalemenena ku kusamwa te mulandu ne fisanshiwemo. Amafilimu, baTelevishoni, na mavidio fininikisha imikalile ya musango yu. Ifye shiku fyaisula pa fya kusabankanishishamo amalyashi, maka maka pali Intaneti. Amatunko yalolela abafwaisha ukutamba ifye shiku pa kuti beshibe ifyo ciba.—1 Abena Tesalonika 4:3-5; Yakobo 1:13-15.

14. Mulandu nshi Abena Kristu bamo bawila ku micenjelo ya kwa Satana?

¹⁴ Abena Kristu bamo balinakila ukufwaya kwa kuti beshibe ifyo ciba kabili balikowesha imintontonkanyo yabo ne mitima mu kutamba ifye shiku ifya patali patali ukusanshako fye ne fya kapela makufi. Balileka ukuti bawile mu citeyo ca kubeleleka ica kwa Satana. Ilingi ukucite co kwalenga bumupashi bwabo ukubunda. Aba musango yu balifilwa ukuba ‘utunya ku bubi.’ Tababa ‘abakalamba mu mitima.’ (1 Abena Korinti 14:20) Cila mwaka, amakana ya bantu balalobolola ico babyala pa mulandu wa kufilwa ukwikalilila ku fishinte ne fipimo fya Cebo ca kwa Lesa. Tabapoosa amano ku kufwala no kubakilila “ifya bulwi fya kwa Lesa.”—Abena Efese 6:10-13; Abena Kolose 3:5-10; 1 Timote 1:18, 19.

Tulekatamika Ico Twakwata

15. Cinshi bamo cingabakosela ukucindamika ubupyani bwabo ubwa ku mupashi?

¹⁵ Yesu atile: “Mukeshibe cine, ne cine cikamulenga abantungwa.” (Yohane 8:32) Inte abengi balifuma ku mikalile yabo iya kale ne mipepele. E co, kuti cabangukila ukumona ubucindami bwaba mu buntungwa icine cileta. Lubali lumbi, abacaice bamo abakushiwa ku bafyashi ababa mu cine pambi kuti cabakosela ukumona ubucindami bwa bupyani bwabo ubwa ku mupashi. Tababala ababa ulubali lwa kupepa kwa bufi nelyo ulubali lwa cino calo icacindamika umusamwe, ica bantu abakunkuma ku miti ikola, na bacisenene. E co, kuti bafilwa ukumona ubupusano bukalamba ubwaba pali paradise wesu uwa ku mupashi ne calo ca bubifi ica kwa Satana. Bamo kuti banakila na matunko ya kusonda sumu wa cino calo pa kuti bamone ifyo bapuswa!—1 Yohane 2:15-17; Ukusokolola 18:1-5.

16. (a) Fipusho nshi twingaipusha? (b) Finshi tusambilishiwa no kukoseleshiwa ukucita?

¹⁶ Bushe kwena tulekabila ukoca iminwe yesu pa kuti twishibe ukukalipwa no kucululuka? Bushe te kuti tusambilile ku fyabipa ifyacitikila bambi? Bushe tufwile ukwalukila ku “matipa” ya cino calo pa kuti tumone nga kuli fyo twapuswa? (2 Petro 2:20-22) Petro acinkwileko Abena Kristu ba mu mwanda wa myaka uwa kubalilapo abali kale ulubali lwa calo ca kwa Satana ati: “Inshita iyapitapo yakumana ku kucitilamo ukufwaya kwa Bena fyalo. Mwali abenda mu bulalelale, ulunkumbwa, ukunwensho mwangashi, ukuwowota, ukukolwakolwa, ukupepo tulubi kuntu kwabindwa.” Cine cine, tatufwile ukuba mu ‘kucishamo kwa kuipoosaika’ pa kuti tumone ifyo imikalile yabipa. (1 Petro 4:3, 4) Lelo, tusambilishiwa ifipimo fyasumbuka ifya kwa Yehova ifya mibele isuma pa Mayanda yesu aya Bufumu, ayaba fifulo fikalamba ifya kusambililapo Baibolo. Kabili tukoseleshiwa ukubomfya ukupelulula kwesu ku kushininkisha ukuti twalikwata icine kabili ukuleka icine ukulatutungulula.—Yoshua 1:8; Abena Roma 12:1, 2; 2 Timote 3:14-17.

Ishina Lyesu Te Cishibilo Fye

17. Kuti twaba shani Inte shisuma isha kwa Yehova?

¹⁷ Nga twalenga icine ukulatutungulula, tukafwaya ukwebako bambi cene pa nshita yonse iyalinga. Uku te kuti tukalapatikisha abashilefwaya ukumfwa icine. (Mateo 7:6) Lelo, tatwakatiine ukuilondolola ukuti tuli Nte sha kwa Yehova. Nga ca kuti umuntu alanga ukuti alefwaya icine ukupitila mu kwipusha icipusho mu kufumaluka nelyo nga asenda ulupapulo lwa Baibolo, tukaba abaipekanya ukumwebako isubilo lyesu. Kwena, ninshi kuti cawama lyonse ukulakwata impapulo konse uko twingaba—pa ng’anda, pa ncito, mu sukulu, mu mashitolo, nelyo pa ncende shimbi isha kukokolokelako.—1 Petro 3:15.

18. Ukuilondolola ukuti tuli Bena Kristu kuti kwatwafwa shani mu mikalile?

¹⁸ Lintu twailondolola ukuti tuli Bena Kristu, tulakosha ubucingo bwesu ku micenjelo ya kwa Satana. Nga ca kuti kuli ukusefya ubushiku bwa kufyalwa nelyo Krisimasi, nelyo kuli ubwangalo bwa cela mushuke pa ncito, ilingi abo tubomba na bo bakulatila, “Mulabeniko fye. Ni Nte ya kwa Yehova.” E mulandu wine, abantu pambi te kuti basosele ifya kusekesha fyabipa nge po tuli. E co, ukuilondolola ukuti tuli Bena Kristu kulatwafwa mu mikalile, nga fintu fye no mutumwa Petro asosele ati: “Kabili ni ani wingamucito bubi, nga mwaba abacincililo busuma? Lelo nga mwaculilo bulungami, ninshi mwalishuka.”—1 Petro 3:13, 14.

19. Twaishiba shani ukuti tuli mu kati na nkati ka nshiku sha kulekelesha?

¹⁹ Ubusuma na bumbi ubwa kulenga icine ukulatutungulula bwa kuti tukashininwa ukuti shino cine cine ni nshiku sha kulekelesha isha buno bwikashi. Tukeshiba ukuti ukusesema ukwingi ukwa mu Baibolo kulefika pa kalume mu nshita yesu.a Ukusoka kwa kwa Paulo ukwa kuti “mu nshiku sha kulekelesha mukesaba inshita ishayafya” kushininkishiwa bwino ku fintu fishaibipila ifyacitike mu mwanda wa myaka uwapwile. (2 Timote 3:1-5; Marko 13:3-37) Icipande cafumine nomba line mu nyunshipepala pa lwa mwanda wa myaka uwalenga 20 cakwete umutwe waleti “Tukalawibukisha Ukuti Wali ni Nkulo ya Butuutu.” Icipande casosele ukuti: “Umwaka wa 1999 wali mwaka umo abantu baipaiwe icabipisha mu myaka ya pa numa ya mwaka wa 1950 iya mwanda wa myaka umo abantu baipaiwa icabipisha.”

20. Ino ni nshita ya kucita cinshi?

²⁰ Ino te nshita ya kushingashinga. Amapaalo ya kwa Yehova yalemoneka pa mulimo wakulisha uwa kusambilisha Baibolo uwabala aucitwapo mwi sonde lyonse ku kubo bunte ku nko. (Mateo 24:14) Ikalileni ku cine, no kwebako bambi cene. Inshita yenu iya muyayaya yashintilila pa fyo mulecita nomba. Umulekelesha tawakalenge Yehova ukumupaala. (Luka 9:62) Lelo, ino ni nshita ya kuba “abashangila, abashitelententa; ukupikintika pe mu mulimo wa kwa Shikulu, pa kwishibo kuti ukucucutika kwenu te kwa fye muli Shikulu.”—1 Abena Korinti 15:58.

[Futunoti]

Bushe Muleibukisha?

• Kuti twaleka shani ukutwishika?

• Cinshi twingasambilila ku ca kumwenako ca kwa kalume wa kwa Elisha?

• Ni ku matunko nshi aya mibele tulingile ukucenjelako lyonse?

• Mulandu nshi tulingile ukuilondolola ukuti tuli Nte sha kwa Yehova?

[Ifikope pe bula 10]

Ukusambilila Baibolo lyonse ne pepo kuti fyatwafwa ukuleka ukulatwishika

[Icikope pe bula 11]

Kalume wa kwa Elisha alekele ukutwishika ilyo amwene icimonwa

[Icikope pe bula 12]

Tusambilishiwa ifipimo fyasumbuka ifya kwa Yehova ifya mibele pa Mayanda ya Bufumu nge yi iya ku Benin