‘Cine Cine Shikulu Alibuukile!’

Elenganyeni ifyo abasambi ba kwa Yesu babipilwe lintu Shikulu wabo aipaiwe. Isubilo lyabo lyalifwile nge citumbi ico Yosefe wa ku Arimatea abikile mu nshishi. Ukwenekela kwabo ukwa kuti Yesu akalubula abaYuda kwi koli lya bena Roma e po kwapwilile.

NGA ca kuti imfwa ya kwa Yesu yali e mpela ya fyonse, abasambi ba kwa Yesu ninshi napamo bali no kuloba nga bakonshi ba bengi abali no kuitunga ukuba baMesia. Lelo Yesu ali uwa mweo! Ukulingana na Malembo, amonekele ku bakonshi bakwe imiku iingi pa numa fye ya mfwa yakwe. E co, bamo balengelwe ukusosa ukuti: “Cine cine Shikulu nabuuka.”—Luka 24:34.

Abasambi balekabila ukusosela icitetekelo cabo muli Yesu uwali ni Mesia. Pa kucite fyo, balelanda maka maka pa kubuuka kwakwe ku bafwa ukuti bushininkisho bwakosa ubwa buMesia bwakwe. Cine cine, “ku maka yakalamba abatumwa baleshimiko kwima kwa kwa Shikulu Yesu ubunte.”—Imilimo 4:33.

Nga ca kuti kwali uwashinine abantu ukuti uku kubuuka kwali kwa bufi—napamo pa kulenga umusambi umo ukusumina ukuti Yesu tabuukile nelyo pa kulangilila ukuti umubili wa kwa Yesu washele mu nshishi—ubuKristu nga bwalipwile lilya line fye. Lelo tabwapwile. Ukwishiba ukuti Kristu ali no mweo, abakonshi ba kwa Yesu baile konse konse ukushimikila pa kubuuka kwakwe, ne mintapendwa basumine muli Yesu wabuushiwe.

Mulandu nshi na imwe mwingasuminina mu kubuuka kwa kwa Yesu? Bushininkisho nshi bwabako ubwa kuti Yesu alibuushiwe?

Mulandu Nshi wa Kubebetela Ubushininkisho?

Amalandwe yonse yane yashimika pa kubuuka kwa kwa Yesu. (Mateo 28:1-10; Marko 16:1-8; Luka 24:1-12; Yohane 20:1-29)a Amalembo ya Bwina Kristu na yambi aya ciGriki yalanda mu kushininkisha pa lwa kubuuka kwa kwa Kristu ku bafwa.

E mulandu wine abakonshi ba kwa Yesu bashimikila pa kubuuka kwakwe! Nga ca kuti cine cine alibuushiwe kuli Lesa, ninshi ilyo e lyashi lya kusungusha nga nshi ilyo icalo caumfwapo. Ukubuuka kulangilila ukuti Lesa e ko aba. Na kabili kulangilila ukuti Yesu ali no mweo.

Bushe ici citukuma shani? Yesu apepele ukuti: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Ukwishiba Yesu na Wishi kuti kwatupeela umweo. Nga twaba no ko kwishiba, nangu twafwa, kuti twaisabuushiwa, pantu na Yesu alibuushiwe. (Yohane 5:28, 29) Kuti twakwata isubilo lya mweo wa muyayaya muli paradise wa pe sonde mu kuteka kwa Bufumu bwa kwa Lesa ubwa ku muulu ubuli mu maboko ya Mwana wakwe uwasumbulwa, Yesu Kristu, Imfumu ya shamfumu.—Esaya 9:6, 7; Luka 23:43; Ukusokolola 17:14.

E co, icipusho ca kuti bushe Yesu cine cine alibuushiwe ku bafwa cintu cacindama nga nshi. Cikuma ubumi bwesu pali nomba e lyo ne subilo lyesu ilya ku ntanshi. E mulandu wine twamulaalikila ukubebeta ubushininkisho bune ubwa kuti Yesu alifwile no kubuushiwa.

Cine cine Yesu Alifwile pa Cimuti

Abalengulula bamo batila, nangu apopelwe, Yesu tafwile pa cimuti. Batila ali fye mupepi no kufwa kabili ukutalala kwa mu nshishi kwalimupuputwile. Lelo, ifyebo fyonse ifyabako fishininkisha ukuti icitumbi ca kwa Yesu calibikilwe mu nshishi.

Apo Yesu bamwipaile pa cintubwingi, kanshi kwali inte ishamweneko uko Yesu afwile pa cimuti. Imfwa yakwe yashininkishiwe kuli mushika uwaleangalila umulimo wa kwipaya Yesu. Uyo mushika ali ni kalapashi uyo umulimo wakwe wasanshishemo ukushininkisha ukuti Yesu nafwa. Na kabili, ni pa numa fye ya kushininkisha ukuti Yesu nafwa e lyo Kateka wa ciRoma Ponti Pilato asuminishe Yosefe wa ku Arimatea ukusenda umubili wa kwa Yesu ku kuyabika.—Marko 15:39-46.

Mu Nshishi Tamwasangilwe Icitumbi

Inshishi mushasangilwe umubili yapeele abasambi ubushininkisho bwa kubalilapo ubwa kubuuka kwa kwa Yesu, kabili takwaba abakaana ubu bushininkisho. Yesu abikilwe mu nshishi ipya, umwali mushilabikwa muntu nangu umo. Iyi nshishi yali mupepi na po bamupopele e co tayali ni ninshi iyo abantu bengafilwa ukumona. (Yohane 19:41, 42) Amalandwe yonse yatila lintu ifibusa fya kwa Yesu fyaile ku nshishi ulucelo ubushiku bwakonkelepo pa numa ya mfwa yakwe, basangile umubili wakwe tamuli.—Mateo 28:1-7; Marko 16:1-7; Luka 24:1-3; Yohane 20:1-10.

Abalwani ba kwa Yesu ne fibusa fyakwe balipapile ilyo basangile ukuti mu nshishi tamuli icitumbi. Ni kale abalwani bakwe batendeke ukutulukusha ukuti epaiwe no kubikwa. Pa numa ya kucita ico balefwaya, babikilepo uwa kulinda no kucilika ku nshishi. Lelo, mu nshita ya lucelo pa bushiku bwa ntanshi ubwa mu mulungu, basangile mu nshishi tamuli icitumbi.

Bushe ifibusa fya kwa Yesu e fyafumishe icitumbi mu nshishi? Te bacitile fyo, pantu Amalandwe yashimika ukuti babipilwe nga nshi ilyo aipaiwe. Na kabili, abasambi bakwe nga tabalekele ukulabapakasa fye umo shacela no kwipaiwa pa cintu ico baishibe ukuti ca bufi.

Ni bani bafumishe icitumbi mu nshishi? Na balwani ba kwa Yesu bene bafwile te basendele cilya citumbi. Pantu nga balwani basendele icitumbi, ilyo abasambi baletila Yesu nabuuka kabili ali no mweo nga baliciletele ku kubashinina. Lelo te fyo cali, pantu Lesa e wamubuushishe.

Ilyo papitile imilungu, abalwani ba kwa Yesu tabakeene lintu Petro ashimike ubunte bwa kuti: “Mwe baume abena Israele, umfweni ifyebo ifi: Yesu umwina Nasarete, umuntu uo Lesa alangiile kuli imwe mu fya maka ne fipesha amano ne fiishibilo ifyo Lesa acitiile muli wene mu kati ka imwe, ifyo mwe bene mwaishiba; uyo, pa kupooswa ku kupanga ukwalingwa na ku kwishibila kabela kwa kwa Lesa, [mwamupopele pa cimuti , NW] mu minwe ya bapulumushi no kumwipaya; uyo Lesa aimishe kabili ilyo akakwile ifya bukali fya mfwa; pantu wene ukwikatililwa ku mfwa tacingacitika. Pantu Davidi amusosa, ati, Namwene Shikulu ku menso yandi pe; . . . no mubili wandi na o ukekala mu kucetekela; ico tamwakaleke umweo wandi ku Mbo, nangu kuleko Wa mushilo wenu amone ukubola.”—Imilimo 2:22-27.

Bengi Bamwene Yesu Wabuushiwe

Mwi buuku lya Imilimo, kalemba wa ili Landwe Luka atile: “[Ku batumwa] kabili, pa numa ya kucula kwakwe, [Yesu] ailangile uwa mweo mu fiishibilo ifingi, alemoneka kuli bene mu nshiku amakumi yane, no kusose fya bufumu bwa kwa Lesa.” (Imilimo 1:2, 3) Imiku iingi abasambi abengi bamwene Yesu uwabuushiwe—mwi bala, pa musebo, ilyo balelya, na ku Mumana wa Tiberia.—Mateo 28:8-10; Luka 24:13-43; Yohane 21:1-23.

Abalengulula balatwishika uku kumoneka kwa kwa Yesu. Batila bakalemba ba aya malyashi baelengenye fye, nelyo bambula mumo umo Amalandwe yapusana mu bulondoloshi. Na kuba, ubupusano bunono ubwaba mu malyashi ya mu Malandwe bushininkisha ukuti abalelemba tabapangene. Ukwishiba Yesu kulafulilako nga ca kuti kalemba umo alanda pa fyebo fishaba mu malyashi yambi aya fyacitikile Kristu pe sonde.

Bushe ukumoneka kwa kwa Yesu pa numa ya mfwa yakwe kwali fye kwelenganya? Ukukaana ukuti Yesu tabuushiwe te kuti kushininkishiwe pantu bengi bamumwene. Pa bamumwene pali abalondo, abanakashi, umubomfi wa buteko, na Toma wine uwaletwishika, uwashininwe fye ilyo amwene ubushininkisho bwine bwine ubwa kuti Yesu alibuushiwe ku bafwa. (Yohane 20:24-29) Imiku iingi, pa kubala abasambi ba kwa Yesu tabaleishiba ukuti ni Shikulu wabo uwabuushiwe. Inshita imo, abantu ukucila pali 500 balimumwene, pali abo icinabwingi e ko bali lintu umutumwa Paulo abomfeshe ilyashi lya ico cacitike pa kusoselako ukubuuka.—1 Abena Korinti 15:6.

Yesu wa Mweo Alakuma Abantu

Ukubuuka kwa kwa Yesu te cintu ca kufwaya fye ukwishiba nelyo ukukansaninapo. Icishinka ca kuti wa mweo cakuma abantu konse konse mu nshila iisuma. Ukutula mu mwanda wa myaka uwa kubalilapo, imintapendwa ya bantu balyaluka ukufuma ku kuba abantu bashifwaya ubuKristu no kubukaanya fye ku kuba abashininwa ukuti uku kupepa kwa cine. Cinshi cabalwile? Ukusambilila Amalembo kwabashinine ukuti Lesa abuushishe Yesu ku kuba icibumbwa ca ku mupashi ica bukata ica ku muulu. (Abena Filipi 2:8-11) Batetekela muli Yesu na mu kupayanya kwa kwa Yehova Lesa ukwe pusukilo ukupitila mwi lambo lya cilubula ilya kwa Kristu. (Abena Roma 5:8) Abantu ba musango yu basanga insansa shine shine mu kucita ukufwaya kwa kwa Lesa no kwikalila ku fisambilisho fya kwa Yesu.

Moneni ifyo calepilibula ukuba Umwina Kristu mu mwanda wa myaka uwa kubalilapo. Mu buKristu tamwali ukunonka ubusambashi, amaka, nelyo icuma. Lelo, Abena Kristu abengi aba mu kubangilila ‘basekelele na pa kupokwa ifyuma fyabo’ pa mulandu wa citetekelo cabo. (AbaHebere 10:34) Pa kuba Umwina Kristu icalekabilwa kwikala imikalile ya kuipusula kabili kwaleba no kupakaswa uko ilingi line kwalefumamo ukufwila icisumino.

Ilyo bashilaba abakonshi ba kwa Kristu, bamo balikwete ishuko lya kuba abasambashi kabili aba cuma. Shauli wa ku Tarsi asambilishiwe kuli kafundisha wa Malango uwalumbuka Gamaliele kabili atendeke ukulunduluka mu menso ya baYuda. (Imilimo 9:1, 2; 22:3; Abena Galatia 1:14) Lelo, Shauli aishileba umutumwa Paulo. Wene na bengi bambi bakeene ubusambashi na maka ifyo cino calo cabatambike. Mulandu nshi? Pa kuti bengananya ubukombe bwe subilo lya cine ilya malayo ya kwa Lesa ne cishinka ca kuti Yesu Kristu alibuukile ku bafwa. (Abena Kolose 1:28) Bali abaipekanya ukuculila ico baishibe ukuti ca cine.

E fyo ne mintapendwa ya bantu ilelo bacita. Kuti mwabasanga mu filonganino fya Nte sha kwa Yehova mwi sonde lyonse. BaNte bali ne nsansa pa kumwita ku cibukisho ca pa mwaka ica mfwa ya kwa Kristu, icikabako pa numa ya kuwa kwa kasuba pa Mulungu, pa April 8, 2001. Bakatemwa ukuba na imwe pa cibukisho na pa kulongana kwabo konse ukwa kusambilila Baibolo ukubako pa Mayanda yabo aya Bufumu.

Sambilileni na fimbi pa mfwa no kubuushiwa kwa kwa Yesu na pa lwa bumi bwakwe ne fisambilisho. Atulaalika ukuya kuli wene. (Mateo 11:28-30) Citenipo cimo nomba ku kusambilila icine pali Yehova Lesa na Yesu Kristu. Ukucite co kuti kwamuletela umweo wa muyayaya ilyo Ubufumu bwa kwa Lesa ubwaba mu maboko ya Mwana wakwe uwatemwikwa bukalateka.

[Futunoti]

[Ifikope pe bula 7]

Imintapendwa basanga insansa shine shine pa kuba abakonshi ba kwa Yesu Kristu

[Abatusuminishe Ukubomfya Icikope pe bula 6]

Ukufuma mu Self-Pronouncing Edition of the Holy Bible, iyakwata ubupilibulo bwa King James no bupilibulo bwa Revised