Ifya Kucimfya Ukufuupulwa

● Asafi ailishenye ukuti: “Awe natile, Kanshi nasangulwilo mutima wandi ibusha, no kusambile minwe yandi ibusha mu kaele, apo nabo wapumwa akasuba konse, no kumono kwebaulwa ulucelo no lucelo.”—Amalumbo 73:13, 14.

● Baruki atetele ukuti: “Kalanda kuli ine! pantu Yehova alundapo ubulanda ku kukalipwa kwandi; nalifunshika ku kuteta kwandi, no kutusha nshisangile!”—Yeremia 45:3.

● Naomi alilile ukuti: “Uwa maka yonse andishe cibi akalanda; ine nafumine pano uwaisula, na Yehova ambwesha iminwe mikutwa. Cinshi ico mulenjitila Naomi, apo Yehova anengo bulanda, kabili Wa maka yonse ancusha?”—Ruti 1:20, 21.

BAIBOLO yakwata ifya kumwenako ifingi ifya bakapepa ba kwa Yehova aba busumino abalefuupulwa inshita shimo. Icishinka ca kuti apo tuli bantu bashapwililika, ifwe bonse inshita shimo tulafuupulwa. Pambi ifwe bamo tulafuupulwa libili libili—napamo no kuyumfwila ubulanda—ukucila bambi pa mulandu wa kucitikilwa ifyabipa.

Lelo, nga tamuilamine, ukufuupulwa kuti kwaonaula bucibusa bwenu na bambi na Yehova Lesa. Umwanakashi umo Umwina Kristu uwatemwa ukuyumfwila ubulanda atile: “Ukwingi uko balendaalika ukuyatandala nshaleyako pantu naleumfwa ukuti nshali uwalinga ukubishanya na ba mu cilonganino.” Mwandi ukuyumfwa kwa musango yu kuti kwaleta ifyabipa mu bumi bwa muntu! Cinshi mwingacita ku kucimfya ukumfwa kwa musango yo?

Palameni Kuli Yehova

Mu Amalumbo 73, Asafi mu kufumaluka alembele pa fyo apeshiwe amano. Ilyo alelinganya imikalile yakwe ku mikalile yasanduluka iya babifi, aishileba no lunkumbwa. Amwene ukuti abashipepa Lesa bali aba matutumuko kabili aba lukaakala kabili balemoneka ukuti tabalekandwa pa fyo balecita. Lyene Asafi atendeke ukutwishika ubucindami bwa kukonkelela imikalile yalungama.—Amalumbo 73:3-9, 13, 14.

Nga Asafi, bushe mumona icimoneka kwati kutunguluka kwa babifi abaitakisha pa bubifi bwabo? Asafi acimfishe shani ukufuupulwa? Akonkanyapo ukuti: “Natile njishibe ici cintu, cali ca kucululusha mu menso yandi, nasuka naingilo mwashila mwa kwa Lesa, no kulolekeshe mpela shabo.” (Amalumbo 73:16, 17) Asafi acitile icisuma ukupitila mu kupepa kuli Yehova. Nga kubomfya insoselo umutumwa Paulo abomfeshe, Asafi acimfishe “umuntu wa cifyalilwa” ukupitila mu kubukulula “uwa bumupashi.” Pa kubukulula imimwene ya ku mupashi, aishibe ukuti Yehova alipato bubifi no kuti pa nshita iyene akakanda ababifi.—1 Abena Korinti 2:14, 15.

Fintu cacindama ukuleka Baibolo yamwafwa ukutonta pa fya cine cine ifya mu bumi! Yehova alatucinkulako ukuti alamona ifyo ababifi bacita. Baibolo isambilisha ukuti: “Mwilufiwa; Lesa tasentekwa; pantu ico umuntu abyala, e co akalobolola . . . Awe twinenuka mu kucite cawama.” (Abena Galatia 6:7-9) Yehova akabika ababifi “umwatelela”; ‘akabawisha ku kupumpuntika.’ (Amalumbo 73:18) Ubupingushi bwa bulesa bukasuka bukacimfye.

Programu wa lyonse uwa ca kulya ca ku mupashi pe tebulo lya kwa Yehova no kubishanya kusuma na bantu ba kwa Lesa fikamwafwa ukukosha icitetekelo cenu no kucimfya ukufuupulwa no kumfwa kumbi ukwabipa. (AbaHebere 10:25) Nga Asafi, ukupitila mu kupalama kuli Lesa, kuti amutungilila no kutemwa. Asafi akonkanyapo ukuti: “Ine naba kuli imwe pe; mwanjikata ku kuboko kwandi kwa kulyo, ku mano ayo mwapanda mulantungulula, na pa numa mukampokelela mu bukata.” (Amalumbo 73:23, 24) Umwina Kristu umo uo balecusha ku bwaice amwene amano yaba muli aya mashiwi. Atile: “Ukubishanya sana ne cilonganino kwanangile ulubali lumbi ulwa bumi. Nalimwene ukuti baeluda ba Bwina Kristu balikwata ukutemwa, no kuti tababa kwati ni bakapokola lelo ni bakacema.” Cine cine, baeluda ba Bwina Kristu ababa ne cililishi balabomba umulimo wacindama ku kwafwa umuntu ukucimfya ukufuupulwa.—Esaya 32:1, 2; 1 Abena Tesalonika 2:7, 8.

Pokeleleni Ukufunda kwa kwa Yehova

Baruki, kalemba wa kwa kasesema Yeremia aliilishenye pa mulandu wa fyo umulimo wakwe walemulenga ukuba uwakanshika. Lelo, Yehova mu cikuuku aebele Baruki ukutontonkanya pa fintu fya cine cine. “Na iwe bushe uleifwaile fikalamba? Wifwaye fi; pantu mona, nkaleto bubi pa bantunse bonse, cisemo ca kwa Yehova; lelo napeela kuli iwe umweo obe ku kube ca kutapa cobe konse uko wingaya.”—Yeremia 45:2-5.

Ukwabula no kupita mu mbali Yehova alondolwele ukuti bukaitemwe bwa kwa Baruki e bwalelenga ukuti alebipilwa. Baruki afililwe ukusanga insansa mu mulimo Lesa amupeele pantu pa nshita imo ine aleifwaila ifikalamba. Na imwe kuti mwasanga ukuti icisuma cine cine ica kucita ku kucimfya ukufuupulwa kutaluka ku fya kupumfyanya no kupokelela umutende ufuma ku kuteka umutima ukwa bakapepa.—Abena Filipi 4:6, 7.

Mukamfwilwa Naomi talekele ukumanama ukumutalusha ku bantu mu Moabu ilyo umulume wakwe na bana bakwe babili bafwile. Lelo, cimoneka kwati pa nshita imo alibipilwe pa mulandu wakwe na pa mulandu wa banafyala. Ilyo abebele ukuya, Naomi atile: “Kalanda nga nshi kuli ine pa mulandu wenu, apo kwafumina pali ine ukuboko kwa kwa Yehova.” Na kabili ilyo afikile ku Betelehemu, aleti “Mwinjita Naomi [“Ubusuma Bwandi”], munjite Mara [“akalanda”]; pantu Wa maka yonse andishe cibi akalanda.”—Ruti 1:13, 20.

Lelo Naomi taikele eka no kulalosha fye—ukutaluka kuli Yehova na ku bantu bakwe. Mu Moabu aumfwile ukuti “Yehova napempula abantu bakwe ku kubapeele cilyo.” (Ruti 1:6) Alishibe ukuti uko ali no kuba ukwawamisha, kuba pamo na bantu ba kwa Yehova. Pamo na nafyala Ruti, Naomi abwelele ku Yuda kabili mano mano atungulwile Ruti mu fyo ali no kucita kuli lupwa wabo Boasi, ndubulwila wakwe.

Na lelo, aba bucishinka abalufya abanabo ba mu cupo mu mfwa balecimfya ukukanshika ukupitila mu kutwalilila ukuba abapamfiwa mu cilonganino ca Bwina Kristu. Kwati ni Naomi, balaibikilishako ku fya ku mupashi, ukubelenga Icebo ca kwa Lesa cila bushiku.

Ubusuma Bwaba mu Kubomfya Amano ya Bukapepa

Aya malyashi ya mu Baibolo yatulangilila ifyo umo engacimfya ukufuupulwa. Asafi aile umwashila mwa kwa Yehova ku kufwaya ubwafwilisho no kulolela mu kutekanya pali Yehova. Baruki aumfwile ukufunda no kutaluka ku kufwaisha ifikwatwa uko kwaba cintu cipumfyanya. Naomi atwalilile ukuba uwacincila pa bantu ba kwa Yehova, ukupekanishisha umukashana Ruti imilimo ya mu kupepa Lesa wa cine.—1 Abena Korinti 4:7; Abena Galatia 5:26; 6:4.

Kuti mwacimfya ukufuupulwa no kuyumfwa kumbi ukwabipa ukupitila mu kutontomesha pa kucimfya kwa bulesa uko Yehova apeela abantu bakwe, umo umo kabili pamo nge bumba. E co, muleetetula pa ncitilo yapulishamo iya kwa Yehova iya kutemwa mu kumupekanishisha icilubula. Katamikeni ukutemwa kwine kwine ukwa bumunyina bwa Bwina Kristu. Tonteni pa bumi bwenu mu calo cipya ica kwa Lesa cili mupepi. Kabili ankuleniko nga Asafi uwatile: “Ine, ukupalama kuli Lesa e cawama kuli ine; nacita Shikulu Yehova ukube cubo candi, ku kuleka nondolole imilimo yenu yonse.”—Amalumbo 73:28.