Beni no Kusekelela Kwaba mu Kupeela!
“Ukupeela ce shuko ukucilo kupokelela.”—IMILIMO 20:35.
1. Yehova alanga shani ukuti alasekelela mu kupeela?
UKUSEKELELA kwaba mu kwishiba icine ne fyo tumwenamo fyaba fya bupe fyaumo mutengo ukufuma kuli Lesa. Abaishiba Yehova balikwata ifingi ifibalenga ukusekelela. Lelo, nangu ca kuti ukupokelela ubupe kulaleta ukusekelela, mwaliba ukusekelela na mu kupeela. Yehova e Upeela “ica kupeelwa conse icisuma ne ca bupe conse icafikapo,” kabili ni “Lesa wa nsansa.” (Yakobo 1:17; 1 Timote 1:11, NW) Asambilisha ifisuma kuli bonse abakutika, kabili alasekelela ilyo abo alesambilisha balemumfwila, nge fyo fye abafyashi basekelela ilyo abana babo balenakila ku fyo babafunda.—Amapinda 27:11.
2. (a) Cinshi Yesu asosele pa kupeela? (b) Ni nsansa sha musango nshi tukwata ilyo twasambilisha bambi icine ca mu Baibolo?
2 Na Yesu ilyo ali pe sonde aletemwa ilyo abantu baleyankulako bwino ku kusambilisha kwakwe. Umutumwa Paulo alembele ukuti Yesu atile: “Ukupeela ce shuko ukucila ukupokelela.” (Imilimo 20:35) Insansa tukwata ilyo twasambilisha bambi icine ca mu Baibolo te kumfwa fye bwino pantu twalenga umo ukusumina ifyo twasuminamo. Ukucila, tulasekelela pa kwishiba ukuti tulepeela icintu ica mutengo wa cine cine kabili ubelelela. Nga twapeela abantu ifintu ifyakwata umutengo wa ku mupashi, kuti twabaafwa ukuinonsha nomba na ku ciyayaya conse.—1 Timote 4:8.
Ukupeela Kuleta Ukusekelela
3. (a) Umutumwa Paulo no mutumwa Yohane balandile shani pa kusekelela kwabo mu kwafwa bambi? (b) Mulandu nshi ukusambilisha abana besu icine ca mu Baibolo kwabela kutemwa?
3 Ca cine ukuti filya fine Yehova na Yesu basekelela mu kupeela ifya bupe fya ku mupashi, e fyo na Bena Kristu basekelela. Paulo alisekelele pa kwishiba ukuti alyafwile bambi ukusambilila icine ca mu Cebo ca kwa Lesa. Alembele ku cilonganino ca ku Tesalonika ukuti: “Ica kucetekela cesu, napamo ica kusekelelapo cesu, napamo icilongwe cesu ica kutakishishako, cinshi ku cinso ca kwa Shikulwifwe Yesu pa kwisa kwakwe? (Bushe te imwe bene?) Pantu imwe muli bukata bwesu kabili ukusekelela kwesu!” (1 Abena Tesalonika 2:19, 20) Umutumwa Yohane na o ilyo alelanda ku bana bakwe aba ku mupashi, alembele ukuti: “Nshikwete ukusekelela ukwacisha pali uku, pa kuumfwe fyo abana bandi baleenda mu Cine.” (3 Yohane 4) Na kabili tontonkanyeni pa nsansa shaba mu kwafwa abana besu ukuba abana ba bumupashi! Abafyashi kuti balanga ukutemwa pa kukushisha abana mu “kufunda no kukonkomesha kwa kwa Shikulu.” (Abena Efese 6:4) Pa kucite fyo, abafyashi balanga ukuti balangwa ku busuma bwa ciyayaya ubwa bana babo. Ilyo abana bayankulako bwino, abafyashi balasekelela sana no kumfwa bwino.
4. Cinshi cacitike icilanga ukusekelela kwaba mu kupeela ifya ku mupashi?
4 Dell, ni painiya wa nshita yonse kabili akwata abana basano. Atila: “Ndomfwikisha icalengele umutumwa Yohane ukulanda yalya mashiwi pantu ndatasha sana ukuti abana bandi bane ‘baleenda mu cine.’ Nalishiba ukuti Yehova alacindikwa no kupeelwa ubukata ilyo indupwa shili ishaikatana mu kupepa kwa cine, e ico ndasekelela sana ilyo ndemona ifyo ampaalile ilyo nalebombesha ukusambilisha abana bandi icine. Ukwenekela kwawamisha ukwa kwikala ku ciyayaya mu Paradise no lupwa lwandi kulampela isubilo kabili kunenga ukushipikisha nangu ca kutila kuti nakwata amafya na macushi.” Ku ca bulanda, umwana mwanakashi umo uwa kwa Dell alitamfiwe mu cilonganino pa kukonkelela inshila ishili ya bwina kristu. Lelo, Dell alabombesha pa kutwalilila ukucetekela. Atila: “Ndesubila ukuti bushiku bumo umwana wandi akaicefya no kubwelela kuli Yehova mu kufumaluka. Lelo ndatasha Lesa pantu abana bandi abengi baletwalilila ukumubombela ne cishinka. Ukusekelela kwandi kulankosha icine cine.”—Nehemia 8:10.
Ukupanga Ifibusa Fibelelela
5. Ilyo tuleipeelesha mu mulimo wa kulenga abasambi, kwishiba nshi ukutusansamusha?
5 Yesu aebele abakonshi bakwe ukulenga abasambi ba Bwina Kristu no kubasambilisha pali Yehova ne fyo afwaya. (Mateo 28:19, 20) Yehova na Yesu ukwabula akaso balyafwa abantu ukusambilila inshila ya cine. E ico ilyo tuleipeela mu mulimo wa kulenga abasambi, tulasansamuka pa kwishiba ukuti tulepashanya Yehova na Yesu, nge fyacitile Abena Kristu ba kubalilapo. (1 Abena Korinti 11:1) Nga twabombela pamo na Lesa wa Maka yonse no Mwana wakwe uwatemwikwa, ubumi bwesu bulaba no bufwayo bwine bwine. Caba lipaalo ukuba pali abo “ababombela pamo” na Lesa! (1 Abena Korinti 3:9) Kabili bushe tatusansamuka ukuti nangu fye ni bamalaika balabombako muli uyu mulimo wa kushimikila imbila nsuma?—Ukusokolola 14:6, 7.
6. Ni bani baba ifibusa fyesu ilyo tulepeela lwa ku mupashi?
6 Na kuba, ilyo tulebombako umulimo wa kupeela lwa ku mupashi, kuti twacila pa kuba fye ababombela pamo na Lesa—kuti twaba ifibusa fyakwe ifibelelela. Abrahamu aitilwe cibusa wa kwa Yehova pa mulandu wa citetekelo cakwe. (Yakobo 2:23) Na ifwe bene kuti twaba ifibusa fya kwa Lesa ilyo tuletukuta ukucita ukufwaya kwa kwa Lesa. Nga twacite fyo, tulaba ifibusa fya kwa Yesu. Aebele abasambi bakwe ukuti: “Namwita abanandi; ico namulenga mwishibe fyonse ifyo naumfwile kuli Tata.” (Yohane 15:15) Abengi balasekelela pa kuba ifibusa fya bantu balumbuka nelyo abakwata ififulo fikalamba, lelo ifwe kuti twaba ifibusa fya bantu babili abakulisha mu bubumbo bonse!
7. (a) Umwanakashi umo apangile shani icibusa cine cine? (b) Bushe ica musango umo wine calimucitikilapo?
7 Na kabili, ilyo twayafwa abantu ukwishiba Lesa, nabo balaba ifibusa fyesu, ukutulenga ukuba ne nsansa shaibela. Joan, uwikala ku United States, atendeke ukusambilila Baibolo no mwanakashi we shina lya Thelma. Nangu ca kuti Thelma balemukaanya kuli balupwa wakwe, alishipikishe kabili alibatishiwe ilyo papitile umwaka. Joan alembele ukuti: “Ukubishanya kwesu takwapwilile fye palya pene, kwalikulile no kuba bucibusa bwatwalilila pa myaka 35 nomba. Ilingi twaleya pamo mu butumikishi na ku mabungano. Nasukile nakuukila ku ng’anda ipya apali amakilomita 800 ukufuma uko twaleikala. Lelo, Thelma alatwalilila ukuntuminako bakalata basuma kabili aba kusansamusha, ukunjeba ukuti alanjibukisha no kutemwa no kuntasha pa kuba cibusa wakwe kabili ica kumwenako na pa kumusambilisha icine ca mu Baibolo. Ukuba na cibusa wapalamisha kabili uwa kutemwa uwa musango yo caba cilambu pa kubombesha nacitile ku kumwafwa ukusambilila pali Yehova.”
8. Kucetekela nshi ukukatwafwa mu butumikishi?
8 Ukwenekela ukusanga umuntu ulefwaya ukusambilila icine kuti kwatwafwa ukushipikisha nangu ca kuti abengi tusanga tabatemwa sana nelyo fye ukukanatemwa Icebo ca kwa Yehova. Ukukanayangwako kwa musango yo kuti kwaesha icitetekelo no kushipikisha kwesu. Lelo, ukucetekela kukatwafwa. Fausto, uwafuma ku Guatemala, atile: “Ilyo nashimikila kuli bambi, ntontonkanya ifyo cingawama nga ca kuti umuntu ndelanda na o aba munyina nelyo nkashi wa ku mupashi. Ntontonkanya ukuti nangu fye umuntu umo uo nasanga kuti asuka asumina icine ca mu Cebo ca kwa Lesa. Ukutontonkanye fyo kunenga ukutwalilila no kundetela ukusekelela kwine kwine.”
Ukulonganika Ifyuma mu Muulu
9. Cinshi Yesu alandile pa fyuma fya mu muulu, kabili cinshi twingasambilila kuli ici?
9 Ukulenga abasambi, nampo nga bana besu nelyo bantu bambi, takwayanguka. Kufwaya inshita, ukutekanya, no kushipikisha. Lelo, ibukisha ukuti bamo balaitemenwa ukubombesha ku kuilonganikila ifyuma fya ku mubili, ifintu ifishibaletela ukusekelela kabili ifishibelelela. Yesu aebele abalemukutika ukuti cawama ukubombela ifyuma fya ku mupashi. Atile: “Mwiilonganikila fyuma pano isonde, apo icipelebesha ca bushiku ne ndalawa filonaula, apo abapupu batulamo no kwiba: lelo ilonganikileni ifyuma mu muulu, umo icipelebesha nangu ni ndalawa tafyonaula, umo abapupu tabatulamo nangu kwiba.” (Mateo 6:19, 20) Pa kukonkelela amabuyo ya ku mupashi—ayasanshamo ukubombako umulimo wacindama uwa kulenga abasambi—kuti twaikushiwa pa kwishiba ukuti tulecita ukufwaya kwa kwa Lesa kabili akatulambula. Umutumwa Paulo alembele ukuti: “Lesa tali uushalungama; takalabe umulimo wenu, no kutemwa uko mwalangile kwi shina lyakwe.”—AbaHebere 6:10.
10. (a) Mulandu nshi Yesu akwatile ifyuma fya ku mupashi? (b) Yesu aipeele shani, kabili bambi banonkelamo shani?
10 Nga twabombesha mu kulenga abasambi, tulailonganikila “ifyuma mu muulu,” ukulingana ne fyo Yesu alandile. Ici cituletela ukusekelela kwaba mu kupokelela. Nga twapeela ukwabula akaso, tulainonsha. Yesu abombele Yehova pa myaka imintapendwa. Tontonkanyeni pa fyuma anonkele mu muulu! Lelo, Yesu taleifwaila ifyakwe. Umutumwa Paulo alembele ukuti: “[Yesu aipeele] pa mulandu wa membu shesu, ukuti atupokolole ku bwikashi bwa bubifi ubulipo nomba, umwabelo kufwaya kwa kwa Lesa kabili Shifwe.” (Abena Galatia 1:4) Yesu taipeele fye umwine mu butumikishi lelo apeele ubumi bwakwe nge cilubula pa kuti bambi bengaba ne shuko lya kulonganika ifyuma mu muulu.
11. Mulandu nshi ifya bupe fya ku mupashi fyacindamina ukucila ifya ku mubili?
11 Nga twasambilisha abantu pali Lesa, tubaafwa ukwishiba ifyo na bo bengailonganikila ifyuma fya ku mupashi ifishingonaika. Ca bupe nshi icacilapo ico mwingapeela? Nga mwapeela cibusa wenu inkoloko, motoka, nelyo ing’anda, uyo cibusa akatasha no kusansamuka, kabili na imwe mukaba no kusekelela kwaba mu kupeela. Lelo bushe ico ca bupe cikaba shani pa numa ya myaka 20? Pa numa ya myaka 200? Nelyo ilyo pa kapita imyaka 2,000? Lelo, nga mwaipeelesha ukwafwa umuntu ukubombela Yehova, kuti anonkelamo muli ici ca bupe ku ciyayaya.
Ukufwaya Abalefwaya Icine
12. Abantu abengi baipeela shani pa kuti bafwe bambi lwa ku mupashi?
12 Pa kuti na bo bakwateko insansa shaba mu kupeela lwa ku mupashi, abantu ba kwa Yehova bafika na ku mpela she sonde. Abantu abengi balisha ku mwabo no lupwa ku kubomba umulimo wa bumishonari mu fyalo umo basambilila indimi ne ntambi shipya. Bamo bakuukila ku ncende sha mu fyalo fyabo ukwaba ukukabila kukalamba ukwa bakabilisha ba Bufumu. Bambi na bo balisambilila ululimi lwa ku calo cimbi no kutendeka ukushimikila ku bantu abafuma ku fyalo fimbi lelo abekela ku cifulo bekala. Ku ca kumwenako, pa numa ya kukusha abana babili abo nomba balebombela pa maofeshi yakalamba aya Nte sha kwa Yehova, abaupana ba mu New Jersey, ku U.S.A., batendeke ukubomba bupainiya no kusambilila ululimi lwa ciChinese. Mu myaka itatu, basambilishe Baibolo ku bantu 74 abalanda iciChinese abali pa koleji yali mupepi. Bushe kuti mwakushako ubutumikishi bwenu mu nshila imo pa kuti mwingasanga ukusekelela mu mulimo wa kupanga abasambi?
13. Cinshi mwingacita nga mulefwaya ukutunguluka mu butumikishi?
13 Nalimo mulafwaisha ukusambilisha umuntu Baibolo lelo mwalifilwa ukucite fyo. Mu fyalo fimo calyafya ukusanga abalefwaya ukusambilila. Nalimo abantu musanga tabafwaya ukusambilila Baibolo. Nga cabe fyo, nalimo kuti mwalanda ifyo mulefwaya libili libili mwi pepo, ukwishiba ukuti Yehova na Yesu Kristu balitemwa sana umulimo kabili kuti bamwafwa ukusanga umuntu uwapale mpaanga. Ipusheni aba mu cilonganino ababelesha kabili ababomba bwino mu butumikishi ukuti bamupandeko amano. Bomfyeni bwino ukukansha ne mitubululo ipeelwe pa kulongana kwa Bwina Kristu. Nonkelenimo mu kufunda kwa bakangalila benda na bakashi babo. Icacindamisha, mwinenuka. Umwaume wa mano alembele ukuti: “Ku lucelo tande mbuto shobe, ukufika na ku cungulo wileka kuboko kobe kutushe; pantu tawishibe ico cikashuka.” (Lukala Milandu 11:6) Muleibukisha abaume babusumino pamo nga Noa na Yeremia. Nangu ca kuti banono sana bayankwileko bwino ku fyo bashimikile, balitungulwike mu butumikishi bwabo. Kabili icacindamisha ca kuti ubutumikishi bwabo bwatemwine Yehova.
Bombeni Apapela Amaka Yenu
14. Bushe Yehova amona shani abakote mu mulimo wakwe?
14 Nalimo te kuti mubombeshe nge fyo mwingafwaya pa mulandu wa fintu mulepitamo. Ku ca kumwenako, ubukote kuti bwamulenga ukukanacita ifingi mu mulimo wa kwa Yehova. Lelo, ibukisheni ico umwaume wa mano alembele: “Umutwe wa mfwi cilongwe icayemba, cisangwa mu mibele ya bulungami.” (Amapinda 16:31) Yehova amona ababomfya ubumi bwabo mu mulimo wakwe ukuti basuma. Na kabili Amalembo yatila: “Awe, ukufika pa bukote, nine [Yehova] wine, ukufika na ku mfwi ine nakulamupaapa; ine nacita, kabili nakulasenda, nakulapaapa no kulengo kupusuka.” (Esaya 46:4) Shifwe wa muulu uwakwata ukutemwa alaya ukwafwa no kutungilila aba cishinka bakwe.
15. Bushe mwalisumina ukuti Yehova alishiba imibele mwabamo? Mulandu nshi?
15 Napamo muleshipikisha ubulwele, ukukaanya ku mwina mwenu uushatetekela, imilimo yaafya iya kusakamana ulupwa, nelyo ubwafya bumbi ubukalamba. Yehova alishiba ukupelebela kwesu ne mibele, kabili alitutemwa pa fyo tubombesha no kufumaluka ilyo tulemubombela. Ici ca cine nangu ca kuti ifyo twingacita kuti fyacepako pa fyo bambi bacita. (Abena Galatia 6:4) Yehova alishiba ukuti tatwapwililika, kabili tenekela ifyacilamo kuli ifwe. (Amalumbo 147:11) Nga twabombesha apo twingapesha, kuti twacetekela ukuti twalicindama mu menso ya kwa Lesa kabili takalabe imilimo yesu iya citetekelo.—Luka 21:1-4.
16. Ni mu nshila nshi icilonganino conse cibombako mu mulimo wa kulenga abasambi?
16 Ibukisheni na kabili ukuti umulimo wa kupanga abasambi mulimo wa kubombela pamo. Takwaba umuntu uwingaba umusambi eka, nge fyo ne toni limo ilya mfula lishingatapilila icimenwa. Ca cine ukuti Nte umo kuti asanga umuntu ulefwaya ukusambilila no kumusambilisha Baibolo. Lelo ilyo uyu mupya aisa ku Ng’anda ya Bufumu, icilonganino conse cilamwafwa ukwishibe cine. Ubwananyina bwa kutemwa bulanga ukuti twafwilishiwa no mupashi wa kwa Lesa. (1 Abena Korinti 14:24, 25) Abaice na bapungwe balasuka ifyasuko fya kucincimusha, ukulanga umuntu umupya ukuti abacaice besu tababa nga bacaice ba ku calo. Abalwala, abalemana, na bakote ababa mu cilonganino basambilisha abapya ico ukushipikisha kusanshamo. Nampo nga tuli baice nelyo abakalamba kabili te mulandu no kupelebela kwesu, bonse tulabombako umulimo wacindama mu kwafwa abapya ilyo ukutemwa kwabo ukwa Baibolo kulekoselako kabili ilyo balelunduluka ukulola ku lubatisho. Inshita yonse twapoosa mu butumikishi, icipempu ca kubwelelamo conse ico twacita, lyonse ilyo twalanshanya no ulesekelela pa Ng’anda ya Bufumu, ifi kuti fyamoneka nge fishacindama, lelo fyaba lubali lwa mulimo ukalamba Yehova alebomba.
17, 18. (a) Ukulunda pa kubombako umulimo wa kushimikila, kuti twaba shani ne nsansa shaba mu kupeela? (b) Nga tulepeela no kusanga ukusekelela kwaba mu kupeela, nani tupashanya?
17 Kwena, ukulunda pa kubomba mu mulimo wacindama uwa kulenga abasambi, ifwe fwe Bena Kristu tulaba ne nsansa shaba mu kupeela mu nshila na shimbi. Kuti twapaatulako indalama sha kusangwilako ku kutungilila ukupepa kwa cine no kwafwa ababulishe. (Luka 16:9; 1 Abena Korinti 16:1, 2) Kuti twafwaya utushita twa kusekelela bambi. (Abena Roma 12:13) Kuti twatukuta ‘ukubombe cisuma kuli bonse, no kucishamo ku ba bwananyina bwa mu citetekelo.’ (Abena Galatia 6:10) Kabili, mu nshila shayanguka lelo ishacindama, kuti twayafwa bambi—ukubalembelako kalata, ukubatuminako lamya, ukubapeela ica bupe, ukubafwa, no kubebako amashiwi ya kukoselesha.
18 Nga tulepeela, tulanga ukuti tupashanya Shifwe wa mu muulu. Na kabili tulanga ukutemwa kwesu ukwa bwananyina, ukwishibisha Abena Kristu ba cine. (Yohane 13:35) Ukwibukisha ifi kuti kwatwafwa ukuba ne nsansa shaba mu kupeela.
Bushe Kuti Mwalondolola?
• Yehova na Yesu baba shani ica kumwenako mu kupeela kwa ku mupashi?
• Kuti twapanga shani ifibusa fibelelela?
• Cinshi twingacita pa kuti tutunguluke sana mu butumikishi?
• Ni shani bonse aba mu cilonganino bengaba ne nsansa shaba mu kupeela?
[Ifikope pe bula 13]
Abana nga banakila ku kukansha kwa bafyashi, abafyashi balasekelela no kumfwa bwino
[Icikope pe bula 15]
Pa kulenga abasambi, kuti twapanga ifibusa fya cine cine
[Icikope pe bula 16]
Yehova talekelesha abakote
[Ifikope pe bula 17]
Mu nshila shayanguka lelo ishacindama, tulaba ne nsansa nga tulepeela