Mwalikwata Insambu sha Kusumina mu fyo Mulefwaya
Napamo mwalikatamika insambu mwakwata isha kusumina ifyo mulefwaya. E fyo caba na kuli bambi. Pa kuba ne shi nsambu, abekashi ba pe sonde ababa amabilioni 6 balenga kwaba ifisumino fyalekanalekana. Nga fintu kwaba amalangi yalekanalekana, ifintu fyalekanalekana mu mimonekele, ifintu fyumfwika ifyalekanalekana nga twafikata, ne fyalekanalekana ifyo tusonda, icena calekanalekana, ne ciunda calekanalekana, ifintu fyaba mu bubumbo, ilingi ifisumino fyalekanalekana filalenga abantu ukufwaisha ukwishiba ifyo fisumino, filacincimusha, kabili filenga twaipakisha ubumi. Ukulekanalekana kwa musango yu kuti kwalenga imikalile ukuwama.—Amalumbo 104:24.
LELO tufwile ukucenjela. Ifisumino fimo tafyaba fye ifyapusana lelo kuti fyatuletelela. Ku ca kumwenako, mu kutendeka kwa mwanda wa myaka uwalenga 20, abantu bamo batendeke ukusumina ukuti abaYuda na ba mu kabungwe ka Freemasons bakwete amapange “ya kupumfyanya ukulunduluka kwa buKristu no kupanga icalo ico bali no kulateka.” Cimo icalengele ukuti kube ici cisumino ni trakiti uwalembelwe ku bashalefwaya abaYuda uwaleti Protocols of the Learned Elders of Zion. Uyu trakiti atile amapange yabo yasanshishemo ukutungilila ukulipilisha imituulo iikalamba, ukutungilila ukupanga ifyanso, no kulenga akampani kamo ukuti kaleangalila ubukwebo bonse pa kuti ‘ifyuma fya bena Fyalo fingonaulwa mu kwangufyanya.’ Uyu mutunganya wasanshishemo no kunyonganya amasomo pa kuti ‘abena Fyalo bakwate amano ya bunama,’ no kupanga inyanji ya pa nshi iya kutwala ku misumba ikalamba pa kuti abakalamba mu baYuda ‘bengacimfya abalebakaanya pa kubepaya.’
Ifi fyonse fyali bufi—ifi fyebo bakubenye fye pa kuti balenge abantu ukupata abaYuda. Mark Jones uwa ku Ng’anda ya Babenye iya ku Britain atile ‘Ifi fyebo fya kwelenganya fyasalangene mu Russia,’ uko fyamoneke umuku wa kubalilapo mu cipande ca nyunshipepala ya mu 1903. Ifi fyebo fyafikile ku nyunshipepala ya The Times iya ku London pa May 8, 1920. Ilyo papitile umwaka, inyunshipepala ya The Times yasosele ukuti ifi fyebo fya bufi. Lelo ubonaushi bwali nabucitwa kale. Jones asosa ukuti ‘calyafya ukupwisha ubufi bwa musango yu.’ Lintu abantu basumina ifya bufi, ubufi buleta ifisumino fyabipa nga nshi—ifiletelela ilingi, nga fintu ifyacitika mu mwanda wa myaka uwalenga 20 fyalanga.—Amapinda 6:16-19.
Ifisumino ne Cine
Kwena ifisumino fyalubana kuti fyabako ukwabula no bufi. Inshita shimo, tulosha fye mumbi ifintu. Bantu banga abafwila pa cintu ico basumine ukuti calilungama? Na kabili, ilingi tusumina mu cintu pa mulandu wa kuti tulefwaya ukusuminamo. Profesa umo asosa ukuti na basayantisti bene “balakatamika ifyebo basosa.” Ifyo basuminamo fibalenga ukukanapingula bwino. Na kabili ubumi bwabo bonse kuti babubomfya fye mu kutungilila ifisumino fyalubana.—Yeremia 17:9.
Fimo fine e fyacitika na ku fisumino fya mipepele—ifyaba ifyapusana nga nshi. (1 Timote 4:1; 2 Timote 4:3, 4) Umuntu umo kuti alitetekela sana muli Lesa. Umbi kuti atila ulya muntu “atetekela apabula nangu cimo.” Bamo batila mwalikwata umweo uushifwa. Bambi basumina ukuti lintu mwafwa mulaloba, ukukanabako umupwilapo. Kwena ifisumino fiipilika nge fi te kuti fyonse fibe ifya cine. E co, bushe te ca mano ukushininkisha ukuti ifyo mwasuminamo fya cine, no kuti te fintu fye ifyo mufwaya ukusuminamo? (Amapinda 1:5) Bushe kuti mwacita shani ico? Icipande cikonkelepo calalanda pali ili lyashi.
[Icikope pe bula 3]
Icipande ca mu 1921 icasansalike trakiti wa “Protocols of the Learned Elders of Zion”