Ilyashi lya Bakabilisha ba Bufumu

Lesa Afuutile Filamba mu Menso Yakwe

ABANTU abalule mikalile yabo yalingana na mafunde ya kwa Yehova ne fishinte fyakwe balapaalwa icine cine. Nangu tacayanguka lyonse ukwaluka, kwalibako ukwafwa no kukoselesha. (Amalumbo 84:11) Ica kukumanya icikonkelepo ukufuma ku Southeast Asia cilalangilila ici.

Ilyo Nte umo uwa mu France ali pa cuti alandile ku mwine we tuuka uwe shina lya Kima pa lwa bufwayo bwa kwa Yehova ubwa kwi sonde. Na kabili ashilile Kim icitabo citila Kuti Waikala Kuli Pe na pe muli Paradise Pe Sonde. Ilyo Kim alelolesha mu citabo, asangilemo amashiwi ya kuti “akafuute filamba fyonse ku menso yabo.” (Ukusokolola 21:4) Kim ebukisha ukuti: “Ici cikomo camfikile pa mutima icine cine. Ukulamoneka uwa nsansa pa ncito, nani uwaishibe ukuti nga nafika ku ng’anda icungulo, nali ne nkumbabulili pa kulala?” Pa kusokolola icamuletele ubulanda, Kim atile: “Naikele no mwaume imyaka 18 kabili nshali uwa nsansa pantu akene ukungupa. Nalefwaya ukuleka iyi mikalile, lelo apo twaikele capamo inshita ntali, nshali uwashipa ukuti ndeke.”

Tapakokwele, Kim asumine ukusambilila Baibolo ne Nte ya kwa Yehova uwe shina lya Linh. Kim atila: “Nalefwaisha ukukonka fintu nalesambilila muli Baibolo. Ku ca kumwenako, nalekele ukupepa ifikolwe, nangu ca kuti ici calengele ulupwa lwandi ukukanafwaya. Ukulundapo, nalyeseshe ukuti tulembeshe icupo cesu, lelo umunandi alikene. Pali iyi inshita nali no bu bwafya, Nte wa ku France atwalilile ukulantumina impapulo sha Baibolo, kabili Linh alenkoselesha nga nshi. Ukutekanya no kutungilila kwabamo kutemwa ukwa aba bankashi kwangafwilishe ukushipikisha ukufikila natendeka ukwishiba bwino bwino imisango ya munandi. Naishileishiba ukuti kale kale ali na ‘bakashi’ 5 na bana 25! Ici canengele ukuti nshipe no kumusha.

“Ukusha ing’anda iikalamba iisuma tacayangwike. Kabili, uyu mwaume naikele nankwe alempatikisha ukuti mbwelele ku kwikala nankwe, no kulantiinya ukuti nga nakana ali no kundemanika kuli asidi. Mu kwafwilishiwa na Yehova nacitile icalungama.” Kim alitwalilile ukulunduluka kabili asukile abatishiwa mu April 1998. Na kabili, bankashi yakwe babili no mwana wakwe umwaume umupungwe batampile ukusambilila Baibolo ne Nte sha kwa Yehova.

Kim atila: “Naletontonkanya ukuti nshakabe ne subilo mu mikalile yandi. Pali lelo, ndi uwa nsansa, kabili nshiba ne nkumbabulili pa kulala. Yehova alifuuta kale ifilamba mu menso yandi.”

[Futunoti]