Ifipusho Ukufuma ku Babelenga

Daniele ali kwi ilyo balya baHebere batatu baeshiwe pa ntanshi ya cimpashanya Nebukadnesari aimike mu nika ya Dura?

Baibolo tayalanda, e co takwaba umuntu lelo uwingalanda ukwali Daniele ilyo kwali bulya bwesho.

Bamo batubulula ukuti icifulo Daniele akwete mu buteko nelyo ifyo asenaminwe kuli Nebukadnesari fyacilile pa fyo cali kuli Shadraki, Meshaki, na Abednego no kuti Daniele talekabilwa ukuya ku nika ya Dura. Daniele 2:49 ilangilila ukuti pa nshita imo Daniele akwete icifulo cacilile ifya banankwe batatu. Lelo tatukwete ubushinino bwa kuti ici e camulengele ukukanalongana na bambi pa ntanshi ya cimpashanya.

Pa kwesha ukulondolola umulandu Daniele ashasangilweko, bamo batila napamo ali natumwa ku milimo nelyo ali mulwele na muli fyo afililwe ukusangwako. Lelo, Baibolo taisose fyo. Nalyo line, tapaali apa kulengulwila Daniele, pantu nga te ifyo abalashi ba kalumwa abena Babele ukwabula no kutwishika nga basangile apa kumupeelela umulandu. (Daniele 3:8) Ilyo ubu bwesho bwa pa nika ya Dura bushilabako na pa numa ya kubako, Daniele ali wa bumpomfu, uwa cishinka kuli Lesa te mulandu no bwesho ubwamuponene. (Daniele 1:8; 5:17; 6:4, 10, 11) E co, nangu Baibolo tailanda umulandu Daniele ashabelelepo pa nika ya Dura, kuti twashininkisha ukuti acetekele Yehova Lesa umupwilapo.—Esekiele 14:14; AbaHebere 11:33.