Bushe Isubilo Lya Kupusuka E Ko Lyaba?

Basosa abati umwanda wa myaka uwalenga 20 e wacililepo ukusumwamo umulopa ukutula apo abantu babela pa calo. Bumpulamafunde, inkondo, ulukaakala lwa pa mikowa, imiti ikola, ukubulwa ubufumacumi, no lukaakala fyaliseeka sana maka maka muli iyi yine imyaka yapita. Ukulunda pali ifi, abantu balakalipwa no kucula pa mulandu wa malwele, ubukote, ne mfwa. Nga nani uushingatemwa ukulubulwa kuli aya mafya yakulisha ayali mu calo ndakai? Ilyo tuleenekela ifya ku ntanshi, bushe kuli isubilo lya kupusuka?

TONTONKANYENI pa cimonwa umutumwa Yohane amwene nalimo imyaka 2,000 iyapita. Alembele ati: “Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” (Ukusokolola 21:3, 4) Kasesema Esaya na o asobele ukuti: “Akamine mfwa ukumina kwa pe. Shikulu Yehova akafuuta ne filamba pa finso fyonse, no kuseebana kwa bantu bakwe akafumyapo pano isonde ponse; pantu Yehova asosa.”—Esaya 25:8.

Tala esheni fye ukwelenganya ifyo ukufikilishiwa kwa malayo ya kwa Lesa kukaba! Abantu bakalubulwa ku kutitikishiwa, ku lukaakala, na ku filenga ukucula no kumanama. Nangu fye malwele, ubukote, ne mfwa tafyakatukume! Baibolo, Icebo ca kwa Lesa, catulaya umweo wa muyayaya mu bwikashi ubusuma nga nshi pano pene pe sonde. (Luka 23:43; Yohane 17:3) Uyu mweo epo waba kuli bonse aba ukabila. ‘[Lesa] afwaya abantu bonse ukupusuka no kufika ku kwishibe Cine.’—1 Timote 2:3, 4.

Lelo, pa kuti tumwenemo mu malayo ya kwa Lesa, tufwile ukumfwikisha umulimo wa kwa Yesu pa lwe pusukilo lyesu no kumutetekela. Yesu umwine atile: “Pantu Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Ukulanda pa lubali lukalamba Yesu Kristu abomba muli uyu mulandu, umutumwa Petro atile: “Ipusukilo talili muli umbi nakalya, nangu lishina limbi takuli mwi samba lya muulu ilyapeelwa mu bantu, umo tuli no kupusukila.” (Imilimo 4:12) Umutumwa Paulo no munankwe Sila bacincishe uwabepwishe mu bufumacumi ati: “Tetekela Shikulu Yesu Kristu, e lyo ukapusuka, iwe na ba mu ng’anda yobe.”—Imilimo 16:30, 31.

Ca cine, Yesu Kristu “Mwiminishi Mukalamba uwa bumi,” kabili ipusukilo lishila fye ukupitila muli wene. (Imilimo 3:15, NW) Lelo ni shani umuntu umo engalumbukile fyo pe pusukilo lyesu? Ukwishiba bwino umulimo wakwe muli uyu mulandu kufwile ukukosha isubilo lyesu ilye pusukilo.

[Abatusuminishe Ukubomfya Icikope pe bula 2]

Ibula 3: Indeke sha mabomba: Icikope ca ba USAF; abana abaondoloka ku nsala: UNITED NATIONS/J. FRAND; icibwato ca nkondo icilepya: icikope ca ba U.S. Navy