Icilenga Abantu Ukuya ku Gileadi Mutima wa Kuitemenwa
ISUKULU lya Baibolo Ilya Gileadi Ilya Watchtower lyabelako ku kukansha abaume na banakashi abaipeelesha ku kubomba umulimo wa bumishonari mu fyalo fimbi. Ni bani bafikapo ukuya kwi Sukulu lya Gileadi? Bantu baitemenwa abene. (Amalumbo 110:3) Aba mwi kalasi lyalenga 111 balangile ukuti baliitemenwe abene ilyo bapwishishe sukulu pa September 8, 2001.
Abasambi ba mwi kalasi lilya baliitemenwe abene ukushe ndupwa, ifibusa, ne fyalo baleikalako no kuyabombela ukwali ukukabila kukalamba. Ilyo bacitile co, balyeseshe abene ukumona nga kuti bayalula imikalile yabo no kuyaikala ku fyalo fimbi. Ku ca kumwenako, Richer na Nathalie bayalwile imikalile yabo no kuya ku Bolivia, Todd na Michelle baile ku Dominican Republic, e lyo David na Monique baile ku calo caba ku Asia ku kuyashimikila imbila nsuma ya Bufumu bwa kwa Lesa. Abasambi bambi batalile babombela ku Nicaragua, ku Ecuador, na ku Albania.
Christy alikoseleshiwe ukusambilila iciSpanish ilyo ali kwi sukulu lya ku sekondari, kabili ici camwafwile ukupekanishisha ukwikala imyaka ibili ku Ecuador ilyo ashilaupwa. Bambi ilyo bali ku fyalo bafuma, bakuukiile ku filonganino ifilanda indimi sha ku fyalo fimbi. Saul na Priscilla bena bali no kuteuluka muli fimbi, baliitemenwe abene ukukosapo ukusambilila bwino iciNgeleshi ilyo bashilaya kwi sukulu.
Imilungu 20 iya kukanshiwa mu fya bumishonari yalipwile bwangu. Ilyo ubushiku balepwishe sukulu bwafikile, abasambi bali kabili pamo ne fibusa na balupwa, kabili bakutike ku kufunda kwa mano na ku mashiwi ya kukoselesha aya kulekelesha.
Uwali ceyamani wa programu ni Theodore Jaracz, uwapwishishe Isukulu lya Gileadi mwi kalasi lyalenga 7, kabili nomba aba mwi Bumba Litungulula ilya Nte sha kwa Yehova. Amashiwi abalilepo ukulanda mwali icishinka ca kuti fwe baba mu kuteyanya, tatwalaba ico abasambi bakanshiwilwa mwi Sukulu lya Gileadi. Lyabelako ku kushimikila imbila nsuma ya Bufumu ku ba pano isonde bonse. (Marko 13:10) Isukulu lya Gileadi lipangasha abasambi bafikapo ku kubomba uyu mulimo wa kushimikila ukucila pa fyo baleshimikila kale kabili na mu ncende sha pano calo umo bamishonari bakanshiwa balekabilwa sana. Munyinefwe Jaracz akonkomeshe abasambi ukubomfya bwino ifyo bakanshiwe mwi Sukulu lya Gileadi ilyo baleilunda nomba kuli bamishonari abalebomba pali ndakai mu fyalo 19 uko abapwishishe sukulu bakayamukubombela.
Ukufunda kwa pa Nshita Isuma ku Bapwishishe Isukulu
Lyene kwali amalyashi ayakonkene. William Van De Wall, uwaba mu Komiti wa Musambo wa ku United States alandile ilyashi ilyaleti “Ukupimpa kwa Bumishonari Kwishibisha Abena Kristu ba Cine.” Alandile sana pa mulimo wa ‘kulenga abantu ukuba abasambi,’ uwaba pali Mateo 28:19, 20, kabili akonkomeshe abasambi ati: “Mulepashanya Yesu, uwabombele no kupimpa no kucincila umulimo wakwe uwa bumishonari.” Pa kwafwilisha aba bamishonari ukuti batwalilile no kupimpa kwabo muli bumishonari, abakoseleshe ati: “Mulekonka ukutantika kusuma ukwa nshita; lyonse muleba ne sambililo lisuma ilya pa lwenu, mwilashalila mu filecitika mu kuteyanya kwa kwa Lesa; kabili lyonse muleibukisha ico mulebombela umulimo wenu.”
Uwakonkelepo ukulanda ni Guy Pierce, uwa mwi Bumba Litungulula. Alandile pa mutwe we lyashi uwaleti “Twalilileni Ukulundulula ‘Amaka Yenu aya Kupelulula.’” (Abena Roma 12:1, NW) Apandile abasambi amano ayengabomba, no kubakoselesha ukulabomfya amaka Lesa abapeela aya kutontonkanya no kupelulula. Atile: “Twalilileni ukutontonkanya sana pa fyo Yehova alesosa kuli imwe mu Cebo cakwe. Ici e cikalamulinda.” (Amapinda 2:11) Kabili Munyinefwe Pierce akonkomeshe abasambi ukukanalemenena fye kumo mu kutontonkanya kwabo pa kuti becilikila ‘amaka yabo aya kupelulula.’ Cine cine, ifyo babacinkwileko pa nshita isuma fikaafwa abapwishishe sukulu ilyo bakalabomba bumishonari bwabo.
Lyene ceyamani aitile Lawrence Bowen, umo uwa bakafundisha be Sukulu lya Gileadi, uwalandile pa mutwe we lyashi uwaleti “Pangeni Ukukanaishiba Akantu.” Asosele ukuti muli bumishonari bwakwe ku Korinti, umutumwa Paulo ‘apangile ukukanaishiba akantu . . . kano Yesu Kristu, na wene untu atanikwe.’ (1 Abena Korinti 2:2) Paulo alishibe ukuti amaka ayakalamba mu muulu na pano isonde, umupashi wa mushilo, yatungilila ubukombe bwaba muli Baibolo yonse ubwa kuti: Ukwebelwa kwa bumulopwe bwa kwa Yehova ukupitila mu Bufyashi bwalaiwe. (Ukutendeka 3:15) Abasambi 48 abapwishishe sukulu bakoseleshiwe ukupashanya Paulo na Timote no kubomba bwino bumishonari, no kulakonka “icipasho ca fyebo fituntulu.”—2 Timote 1:13.
Umutwe we lyashi lya kulekelesha waleti “Muletasha Pe Shuko Lyenu Ilya Mulimo, Ilyaba ca Bupe Kuli Lesa.” Uulemba abaleingila mwi Sukulu lya Gileadi, Wallace Liverance, ayafwilishe abapwishishe sukulu ukumfwikisha ukuti amashuko ya mulimo e nshila Lesa alangilamo icikuuku ca bupe fye, te cintu ico bakwatilapo insambu nelyo icintu ico abene bacuulilepo. Pa kulanda pa ca kumwenako ca mutumwa Paulo, Munyinefwe Liverance atile: “Icalengele ukuti Yehova asale Paulo ukuba umutumwa wakwe ku bena fyalo te milimo iyo, pantu ico nga camoneke kwati Paulo alikwete nsambu sha kubomba ulya mulimo, nalimo kwati aliwaminwe ukusalwa. Te bukokole nelyo ukubelesha ifyalengele ukuti asalwe. Nga ni mu buntunse fye, camoneke kwati Barnaba e wali no kusalwa. Tasalilwe pa mulandu wa kulamuka kwakwe; pantu kwati Apolo alelanda bwino ukucila Paulo. Ukusalwa kwakwe kwali pa mulandu wa cikuuku ca bupe fye ca kwa Lesa.” (Abena Efese 3:7, 8) Munyinefwe Liverance akoseleshe abapwishishe sukulu ukubomfya ica bupe cabo, nelyo ishuko lyabo ilya mulimo, ku kwafwa abantu ukuba ifibusa fya kwa Lesa no kupokelela ‘ica bupe ca kwa Lesa, umweo wa muyayaya muli Yesu Kristu Shikulwifwe.’—Abena Roma 6:23.
Kabili pakonkele kafundisha na umbi uwe Sukulu lya Gileadi, Mark Noumair, uwalanshenye na basambi bamo pa mutwe we lyashi uwaleti “Ukupekanya Kulafumamo Ifisabo Fisuma.” (Amapinda 21:5) Ifya kukumanya fyalangilile ukuti umutumikishi nga apekanya bwino ubutumikishi bwakwe, maka maka nga apekanya umutima wakwe, akatemwa sana abantu. Takalewayawaya ifya kulanda. Lelo akalanda no kucite fintu ifya kuti abafwilishe mu fya ku mupashi. Ilyo alandile pa fyo abombele bumishonari mu Afrika, munyinefwe Noumair asosele ati: “Ici e cafwa ukubomba bwino bumishonari.”
Bumishonari Mulimo Uulete Nsansa
Ralph Walls na Charles Woody baipwishe bamishonari bamo ababelesha, abaishile ku kukanshiwa kwaibela pa Patterson Educational Center. Ilyo babepwishe, ico bakomailepo ca kuti ukutemwa abantu e kulete nsansa muli bumishonari. Abasambi ne ndupwa shabo ne fibusa abali mwi bumba balikoseleshiwe pa kukutika kuli balya bamishonari babelesha ilyo balelondolola abene umulandu bumishonari bwabela mulimo uulete nsansa.
John E. Barr, uwa mwi Bumba Litungulula, alandile lyashi likalamba ilya pa bushiku bulya, ilyaleti “Imbeni Kuli Yehova Ulwimbo Lupya.” (Esaya 42:10) Munyinefwe Barr alandile ukuti amashiwi ayatila “ulwimbo lupya” yaba mu Baibolo imiku 9. Aipwishe ati, “Bushe ulu lwimbo lupya lulanda pali cinshi?” Umwine ayaswike ati: “Amashiwi yonse yalangilila ukuti ulwimbo lupya lulembwa pa mulandu wa fintu ifipya ku fyo Yehova abomfya bumulopwe bwakwe.” Akoseleshe abasambi ukutwalilila ukulaimbako amalumbo ya Bufumu bwa kwa Lesa ubwacimfya kabili ubwaba mu maboko ya Mfumu Mesia, Kristu Yesu. Munyinefwe Barr asosele ukuti ifyo bakanshiwe mwi Sukulu lya Gileadi fyalibaafwile ukumfwikisha imilandu yalekanalekana iya ulu “lwimbo lupya” ukucila ifyo cali kale. Kabili atile: “Isukulu nalikomailapo ukuti ‘muleimbila’ Yehova amalumbo capamo na bamunyinenwe ne nkashi konse uko mwaya; lyonse mulebombesha ukuti mwikatane na bambi mu mulimo mulebomba.”
Ilyo abasambi bapeelwe amadiploma yabo, uwaleimininako abasambi banankwe abelengele kalata wa kutasha ukufuma pa nshi ya mutima pa fyo bakanshiwe mwi Sukulu lya Gileadi.
Bushe kuti mwabombesha umulimo wenu kuli Lesa no kuulenga ukutwale fisabo ifingi? Nga ni fyo, bombesheni nge fyo aba basambi bapwishishe sukulu babombeshe. E cabafwile ukuti bafikepo ukubomba bumishonari. Ilyo umuntu aitemenwa umwine ukuipeela ne nsansa mu mulimo wa kwa Lesa, e lyo asekelela apakalamba.—Esaya 6:8.
[Akabokoshi pe bula 25]
UKULONGANIKA IFIPENDO FYA BALI MWI KALASI
Bafumine ku fyalo: 10
Bakayabombela mu fyalo: 19
Ubwingi bwa basambi: 48
Imyaka ya kufyalwa nga kwakanya pali umo: 33.2
Imyaka ya kuba mu cine nga kwakanya pali umo: 16.8
Imyaka ya kuba mu mulimo wa nshita yonse nga kwakanya pali umo: 12.6
[Icikope pe bula 26]
Abapwishishe isukulu aba mwi kalasi lyalenga 111 ilye sukulu lya Baibolo Ilya Gileadi Ilya Watchtower
Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo umo.
(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.