‘Imwe Mufwile Ukupepa Ifi Amuti’

BUSHE mwalilishiba Ipepo lya We Shifwe? Lipepo lya cilangililo ilyo Yesu Kristu asambilishe. Mu Lyashi lyakwe ilyalumbuka ilya pa Lupili, Yesu atile: “E ico imwe mufwile ukupepa ifi, amuti.” (Mateo 6:9) Apo ni Yesu e wasambilishe ili ipepo, ilingi line litwo kuti Ipepo lya kwa Shikulu nangula ipepo lya We Shifwe.—Mu ciLatin, Paternoster.

Abantu abengi mwi sonde lyonse baliswatila ili Pepo lya We Shifwe ku mutwe, kabili balalibwekeshabwekeshapo cila bushiku. Mu myaka ya ndakai, abantu abengi balabelenga ili pepo mu masukulu na mu kubungana kwa pa lwalala. Mulandu nshi Ipepo lya We Shifwe limwenwa ilyacindama sana?

Cyprian uwasoma ifya mapepo uwa mu mwanda wa myaka uwalenga butatu alembele ati: “Takwaba ipepo lya bumupashi ilyacila pa lyo Kristu atulangile. . . . Takwaba ukupepa kuli Wishi ukwingaba ukwa cine ukucila pali kulya uko Umwana uwaba e Cine atulangile.”—Yohane 14:6.

Mu mafundisho ya mwi Calici lya baKatolika, basambilishamo ukuti ipepo lya We Shifwe e “pepo line line ilya Bena Kristu.” Icitabo ca The World Book Encyclopedia cilondolola ifyo ili pepo lyacindama mu mipepele yonse iya mu Kristendomu, ukutila ni limo ilya “fyebo ifyacindamisha apashimpwa icitetekelo ca Bena Kristu.”

Lelo, tufwile twamona ukuti abengi abaswatila nelyo ukubelenga mu kubwekeshabwekeshapo Ipepo lya We Shifwe tabaishiba bwino bwino umo lyalola. Inyunshipepala ya Ottawa Citizen iya ku Canada yalandile ukuti: “Nga ca kuti mwakushiwe Umwina Kristu mufwile mulalanda ili pepo lya We Shifwe lubilo lubilo ukwabula no kupemwina. Lelo limbi kuti camwafya ukulilanda panono panono no kumfwikisha umo lyalola.”

Bushe cine cine calicindama ukuti tumfwikishe umwalola amapepo ayo tupepa kuli Lesa? Cinshi Yesu atulangiile Ipepo lya We Shifwe? Kabili bushe lyalola mwi kuli imwe? Nomba natulande pali aya mepusho.